بخصوص استلام ورق النيسان صنى الجديده

[hossam_elwani]

اخ من المنتدى هنا اتصل بيا عشان يدخل مكانى فى استلام الصنى الى المفروض إنى استلمها بكره

وبسأل حضارتكم هل الورق الى حستلم بيه بيكون غير مسمى بأسم ولا لازم يكون مسمى بأسم لزوم الترخيص وخلافه

وايه هو الورق بلتحديد الى بيبقى عليه اسمى .. او اسم المشترى بشكل عام من موزع معتمد؟؟

[Youssef.Awad]

استاذ حسام ..
طبعا يحزننا انك تعدل عن فكرة امتلاك الصنى الجديدة
ولكنا سعداء بمشاراكاتك وموضوعاتك على مدار الفترة القليلة الماضية
وطبعا نتمنى استمرارك فى القسم بفعالية ونشاط مثلما عودتنا فى الفترة المقبلة باذن الله
--------------
بالنسبة للرد على استفسارك ..
من واقع معلوماتى المتواضعة وتجربتى الشخصية فى استلام الصنى 2010
اوراق الاستلام كالاتى وجميعها يلزم احتوائها على رقم الشاسيه والمحرك ويشترط وجودها للترخيص فى المرور:
(1) شهادة ملكية العربية

ودى بتكون فيها بيانات العربية كاملة زى الافراج الجمركى بالنسبة للعربيات المستوردة ويكون مكتوب فيها إنتاج محلى
ومختومة بخاتم نيسان مصر المعتمد وخاتم الموزع المعتمد وتاريخ الانتاج من المصنع.

(2) مبايعة العربية أو خطاب المرور

ودى بتكون مثل عقد البيع من المعرض لحضرتك ويكتب فيها اسمك بالكومبيوتر مع بيانات العربية كاملة
وفيها صيغة توجيه الى المرور المعنى بترخيص العربية من واقع محل اقامة حضرتك (من واقع بيانات الرقم القومى وايصال كهرباء او غاز للسكن)
وبهذا يكون ترخيص العربية باسمك لو تم كتباتها مسبقا ويشترط للترخيص باسم المشترى الجديد منك عقد بيع جديد منك له لضمه فى ملف المرور
ويكتب فيه عبارة (مع حظر البيع لصالح بنك ..... وعدم التجديد الا بموجب خطاب وتفويض من البنك) فى حالة الشراء بالتقسيط بقرض بنكى

(3) خطاب تخصيص سيارة

وده يتوفر فقط فى حال الشراء بالتقسيط مع احد البنوك ويوجه باسم البنك المسحوب منه القرض مع ذكر بيانات العربية من شاسيه ومحرك واللون ويكتب فيها اسم المالك او صاحب القرض

(4) ايصال استلام
ويتم كتابته بعد استلام العربية من المعرض بتحديد اليوم والتاريخ والساعة ايضا لأخلاء مسؤولية المعرض عن العربية من ساعة تاريخه

(5) كتيب الضمان
يتم كتابة بياناته من واقع رخصة السيارة واسم المالك بعد الترخيص

[Optiplex]

تسلم ايدك عالشرح الوافى

[hossam_elwani]

انا مكنتش متوقع الكرم والمجهود الكبير منك ده يا استاذ يوسف ........ مليون شكر ليك ولروحك العاليه

الموضوع ده لازم يتثبت لانه قيم جدااااااااا وخصوصا انه مرفق بيه مستندات من الواقع للبيان وللتوضيح لكل مقبل على الشراء

وانا معاكم على طول ويشرفنى التواصل معاكم

وان شاء الله يكون ليا حظ فى السوبر صالون لما الظروف تتحسن بمشيئة الله

وعلى فكره انا نيساوى برضه بس نيساوى 83 قديمه شويه وجدة العربيات الشبابى الى معاكم ههههه

ربنا يديم المحبه وكل الخير بين كل اعضاء منتدانا الكريم تحياتى ليك وللجميع

[Youssef.Awad]

يا حسام بيك ..
حظك انى كنت قاعد فى طرحك للموضوع ..
والعبد لله كل ورقة خاصة او شغل باحتفظ بنسخة هارد مصورة فى فايل ورق ونسخة سوفت سكان على الكومبيوتر
وطالما عندى معلومة .. ليه ابخل بيها عن حد بيسأل ؟!!!
حتى وان كان السائل قرر الاستغناء عن تجديد انضمامه لقسمنا بعربية جديدة
وبعدين بالنسبة للتثبيت والموضوعات .. اطمن خالص
ان شاء الله القادم افضل بكتير وهتلاقى تنسيقات واعادة طرح موضوعات بشكل جديد
بالاضافة للتعاون مع الكبير اوى احمد tv وجونى .. قصدى بيشوى

[dodyam]

أستاذ حسام
أعتقد بخصوص الورقة رقم 2 المبايعة أو خطاب المرور ممكن تطلع باسم العضو اللى هيشترى بدالك علطول
لان انا علشان الورق يطلع باسمى دفعت الأول مبلغ صغير فى الشركة كرسوم استخراج أوراق المرور
ويفضل تدفع بدرى قبل ما تستلم علشان لما يبقى العربية تيجى معاها ورقها

[Youssef.Awad]

هاه ما قولتلناش عملت ايه فى الاستلام النهاردة يا استاذ حسام ..