تحذير من سائقي التوكيلات

[hany79]

السلام عليكم جميعا
و أنا بقلب في موضوعات القسم لسه شايف أحد الأعضاء كان المفروض يستلم صني 2013 من السبع في شارع الحرية لكن بيقول بناء على تنبيهات الأعضء روحت انا بنفسي استلمتها من المخزن بتاع السبع فممكن لو حد يقولي على موضوع التحذيرات ده و غير كده هل ينفع استلم من المخزن و مكان المخزن بتاع السبع فين؟؟
اسف على الاطالة

[Youssef.Awad]

دى خلاصة الكلام الموجود فى مشاركتين بالموضوع اللى حضرتك تقصده ..
وده الرابط الخاص بالموضوع http://www.nilemotors.net/Nile/307647-a.html

دلوقتى انا ممكن استلم النهاردة او بكرة بالكتير ,,,,, بس المندوب اللى هناك قالى انها هتيجى من المصنع للمعرض بسواق مش على عربية النقل بتاعت المعرض علشان العدد اللى جاى قليل.... فبصراحة الموضوع دا قلقنى بس هوا طمنى وقالى دول سواقين كويسين ومش اول مرة يجيبوا عربيات وما تقلقش...فهل الموضوع عادى ما يقلقش؟؟"سبع المنصورة"يعنى هتيجى من 6اكتوبر للمنصورة

فعلا المعلومة اللى قالهالك دى صحيحة 100% لان التريلا لازم تطلع ب8 عربيات ولو اقل من كده اما الانتظار (وده خطر ان العربية تتسحب على فرع تانى محتاج) او سواقين يجيبوها (وفى الحالة دى العداد المفروض ما يزيدش عن 200 كم بأى حال من الاحوال ولو كان اقل من 150 كم اعرف مليون فى المية ان العداد كان مفصول)

نصيحة من القلب لأنى رايح جاى على الطريق الزراعى بصفة يومية وكنت باشوف مهازل بجد مش هاقولها طبعا عشان ما تقفلش منهم او تشيل من العربية والوسوسة تشتغل
بس عمر ما حد هايحافظ على عربية الا اللى دافع فيها فلوس وتعبان فيها مهما كان مستوى مهارته فى السواقة حتى لو مايكل شوماخر نفسه
وبنفسى كنت باشوف صنى قديمة معلقة نمر تجارية وعليها الاستيكرات البيضاء واللى راكبها طايرعلى 120 مثلا او اكتر وغرز يمين وشمال ولا تهدية فى المطبات ولا غيره وكمان مشغل التكييف وعايش حياته
والمؤدب منهم تلاقيه فاتح ربع الزجاج بدون تكييف ومشغل نوره ويسوق بعقل شوية بس برضه بدون حرص على مطبات ولا ظروف الطريق السىء جدااااااااااااا ومليان بلاوى وربنا يسلم

الافضل عشان تقطع الشك باليقين ويكون بالك مرتاح اتفق معاهم تروح بنفسك تستلمها من اى فرع بالقاهرة ومعاها ورق الملكية وايصال الاستلام (ضرورى جدااااااا وما تتحركش بدونهم عشان المرور والكماين اليومين دول شغالة الله ينور وطبيعى عربية زيرو هاتلفت النظر)
وحل تانى برضه لو خايف من رهبة السواقة لعربية جديدة على طريق زحمة وكده .. يبقى تتفق مع ونش طبلية مثلا زى بتاع الاعطال وهايكلفك من 300-500ج بالكتير اوى

وبالنسبة للاستلام من المخزن بيكون بالتنسيق مع المعرض اللى حضرتك هاتستلم منه .. مش هاتروح من نفسك يعنى لأن المفروض حضرتك حاجز والعربيات فى المخزن متوزعة مسبقا على العملاء الحاجزين عشان ورق العربية هايطلع باساميهم ..

[hany79]

١٠٠٠ شكر يا استاذ يوسف
حضرتك اللي دايما بترد عليا تسلم و ربنا يباركلك

[assaf]

معلومات ممتازه الله ينور