النيتروجين

[خالد عادل]

شباب انا اول ما جبت العربية رحت برديجيستون ومليت الكاوتش بالنيتروجين وكان في فرق جامد جداً عن اول ما استلمتها وكنت بروح اتابع الضغط في بنزينة مصر للبترول اللي في روركسي عشان عندهم نيتروجين المهم بعد فترة بعد صيانة الالف تقريبا حسيت باختلاف كبير في العربية سواء في المشي والسحب والمطبات والنقر ورحت للتوكيل اكتر من مرة عشان يشوفوا الاختلاف اللي انا حاسس بية دة من اية وكان في كل مرة يقولولي ان مفيش مشكلة خالص .. المهم الاسبوع اللي فات كنت معدي من قدام برديجستون اللي في عباس العقاد قلت اخش اظبط العجل وانا بتكلم مع العامل اللي هناك سئلتة هل لو اني زودت العجل هواء وهو مملي نيتروجين اية اللي يحصل قالي عادي بس النيتروجين هيفقد خواصة وبالتالي مميزاتة فجالي شك ان ممكن في التوكيل كانوا بيزودوا العجل هوا علي النيتروجين واحتمال كمان البنزينة اللي كنت بزود فيها يكون النيتروجين مغشوش .. المهم قلتلة يفضي العجل ويملي من اول وجديد ويظبط الضغط وبعد مخلص العربية مشاء الله فرق السما عن الارض في السحب والاتزان والمطبات كأن العربية اتبدلت .... المشكلة بقي دلوقتي ان بعد ٥ مشاوير ولا حاجة العربية رجعت تاني تعمل نفس الحركات القديمة الدب والنط وفي فرق في التوازن احلها ازاي المشكلة دي؟؟؟؟؟؟

[saint2011]

شوف حضرتك الضغط الأمامى والخلفى كام ذى ما هو مكتوب على قائم العربية لما تفتح باب السواق وظبط الضغط وأنشاء الله خير

[abdo7000]

النتروجين ممتاز بس سعرة غالي ملي العجلة الواحدة ب 5 جنية عموما اضبط ضغط الاطارات عند محطة واحدة فقط لان هناك تفاوت كبير في مقياس الضغط بين العدادات في المحطات

[خالد عادل]

هو المفروض اروح اظبط ضغط العجل كل قد اية

[hassanin_lada]

المفروض ان النيتروجين بيدوم لحوالي 6 شهور يعني مش زي الهوا العادي كل اسبوعين تكشف عيله

[خالد عادل]

طب لية الضغط بتاعة بينقص عالطول وبيحتاج يتزود كل اسبوع تقريبا

[_hema]

شوف حضرتك الضغط الأمامى والخلفى كام ذى ما هو مكتوب على قائم العربية لما تفتح باب السواق وظبط الضغط وإن شاء الله خير

[kliken]

حضرتك شاغل بالك و بتروح كتير تظبط و تتأكد من عند كذا حد و مقاس الكاوتش عند بتوع الكاوتش معظمهم مخرف و محدش بيعاير المقاس عنده
رأى الشخصى تتأكد على المقاس من عند واحد بتثق فيه و خلاص و كل كام شهر تظبط مقاس طالما مفيش مشاكل محسوسه
انا من ساعه لما جبت العربيه يومها الحمد لله مليت نيتروجين و من ساعتها بقالى داخل فى شهرين تقريبا لا بشوف مقاس و لا اى حاجه و الدنيا ما شاء الله ماشيه مفيش مشاكل

[szaalouk]

حضرتك املا العجل و ظبط الضغط و ثبت مكان واحد فقط للقياس و المتابعة
او انك تشتري مقاس عجل ياباني او إيطالي و ما تستعملش غيره و كده تكون
مطمئن علي ضغط الإطارات دائماً

[Youssef.Awad]

عن نفسى كنت باعيد ضبط الضغط نيتروجين بعد كل صيانة 10 الاف كم فى التوكيل وتدوير العجل مع ضبط الزوايا كل 3 شهور تقريبا
وده بسبب ان الضغط الامامى فى الصنى مختلف عن الخلفى