حقيقه ولا افتكاسه كهربائى!!!!

[khaled25_9]

السلام عليكم ورحمه الله وبركاته
انا بطرح الموضوع ده عسى انه يضيف معلومه جديده او يمنع حدد انه يقع فى خطا فادح بطريقه بسيطه....

الموقف

من حوالى شهر كنت نازل مع صديقى الى قاهره المعز ومعانا عربيه جولف4, وبعد ما دخلنا القاهره العربيه عملت الدنيئه وشمينا ريحه شياط ووقفت على كده. طبعا اتضح ان صاحب العربيه مكانش بيعملها صيانات و سير الدينامو اتقطع وضيع معاه بليه الدينامو. المهم ودينا العربيه لكربائى وجيبنا سير وبليه والكهربائى ركبهم, وكان فى الفتره دى حاط البطاريه على جهاز كده مش فاكر اسمه عشان تشحن, وجاب من عنده بطاريه عشان ندور العربيه.
المهم الراجل ركب البطاريه بتاعته على العربيه والعربيه دارت تمام والدينامو بيشحن فل, وبكده المشكله خلصت .
ركزو باه فى الحته الجايه دى,,,, بعد مالعربيه دارت قلت للكهربائى نشيل باه البطاريه بتاعته من العربيه ونركب بتاعتنا والعربيه دايره ونسيب العربيه دايره عشان البطاريه تكمل شحن الكهربائى قالى ماشى لسه رايح ناحيه البطاريه عشان اشيل الكابل لقيت الراجل اتنفض زى مايكون خدله 220 فولت فى جانبه وقالى هاتعمل ايه انا فاكرك بتهزر, قولتلو لا مبهزرش انا بعمل كده علطول فى عربيتى(اقصد هيونداى اكسيل 97), قالى العربيات دى فيها كمبيوتر ولو فصلت البطاريه او ركبتها والعربيه شغاله ممكن تحرق الكمبيوتر.
بالصدفه البحته كان واقف ساعتها عربيه نيسان صنى تقريبا موديل 2008 فسالته العربيه دى فيها الموضوع ده قاللى اه. وقالى كان عنده نيسان صنى بتتصلح وفصل البكاريه بتاعتها وركبها تانى والعربيه دايره فحرق الكمبيوتر وصاحبها وداها لتوكيل.

السؤال هو هل فعلا لو فصلت البطاريه او ركبت البطاريه على العربيه وهى دايره ممكن احرق الكمبيوتر؟؟ولا ده كهربائى مهيس او حظه وحش وعمل قفله بدون ما يعرف !!!!

معذره على الاطاله عارف انى وجعت دماغكو كنت عايز بس احطكم فى الصوره......

[Sehsss]

هو اللي أنا أعرفه إن ممكن يخلي الكمبيوتر يخرف مش أكثر، خصوصا لو أمبير البطاريتين مختلف، والجهاز اللي حطلك عليه البطارية اسمه (التونجر)

[khaled25_9]

هو اللي أنا أعرفه إن ممكن يخلي الكمبيوتر يخرف مش أكثر، خصوصا لو أمبير البطاريتين مختلف، والجهاز اللي حطلك عليه البطارية اسمه (التونجر)

يااااااااه بقالى اسبوعين عمال افتكر فى اسمه مش عارف الذاكره راحت فين .
اتمنى ان الموضوع فعلا يبقى كده لان الامر وارد جدا ان كبل البطاريه يفك وكنت متعود يحصل كده فى الهيونداى.

[AbO MosTaFa]

افتكاسة طبعا
الحالة الوحيدة يكون عكس اقطاب البطارية

[hossam_elwani]

والله ياجماعه وارد الى بيقوله الكهربائى ده يكون بيحصل بس مش مع كل العربيات

يعنى مثلا حد يجروء يعمل حركه زى دى فى ميجان ولا ستروين ؟؟؟


وعلى فكره انا بعمل الطريقه دى فى عربيتى وبدون ادنى مشكله

[khaled25_9]

افتكاسة طبعا
الحالة الوحيدة يكون عكس اقطاب البطارية

المشكله انى مافتكرش اى كهربائى ممكن يركب البطاريه مقلوبه ولا يكون ضايع خالص.
يبقى الحل التانى انه بيفتكس, بس ساعتها ليه اتخض اوى لما حاولت اشيل البطاريه؟؟!!!

[khaled25_9]

والله ياجماعه وارد الى بيقوله الكهربائى ده يكون بيحصل بس مش مع كل العربيات

يعنى مثلا حد يجروء يعمل حركه زى دى فى ميجان ولا ستروين ؟؟؟


وعلى فكره انا بعمل الطريقه دى فى عربيتى وبدون ادنى مشكله

استاذ حسام ممكن تقول عربيتك نوعها ايه وموديل كام واذا كان فيها كمبيوتر ولا لأ؟؟؟
وانا فعلا كنت بعمل كده بس بعربيتى الاكسيل 97 ومكانش فيها كمبيوتر طبعا

[mbx4e]

ممكن ووارد يعمل قفله في سوفت الكونترول

[moaaz]

ممكن بس بنسبة ..يعنى مش اكييد .... من المثل بيقول من خاف سلم ...و احنا نختار الطريق السلم

[khaled25_9]

ممكن ووارد يعمل قفله في سوفت الكونترول

ممكن تشرحلى ايه هو السوفت كنترول, وتحصل عليه قفله ازاى؟؟

[ملك فرنا]

انا يعملها على طول
هى المشكلة بس هى انك و انت بتشيل الكابل بتاع الكهرباء يلمس فى اى جزء من العربية يعمل قفلة هى ده فعلا المشكلة

[khaled25_9]

ممكن بس بنسبة ..يعنى مش اكييد .... من المثل بيقول من خاف سلم ...و احنا نختار الطريق السلم

كلام صحيح بس اللى ميعرفش(زى مانا ماكنتش اعرف)؟؟

[khaled25_9]

انا يعملها على طول
هى المشكلة بس هى انك و انت بتشيل الكابل بتاع الكهرباء يلمس فى اى جزء من العربية يعمل قفلة هى ده فعلا المشكلة

ياترى دى الحاله الوحيده؟؟ وشكرا لمتابعتك

[hossam_elwani]

استاذ حسام ممكن تقول عربيتك نوعها ايه وموديل كام واذا كان فيها كمبيوتر ولا لأ؟؟؟
وانا فعلا كنت بعمل كده بس بعربيتى الاكسيل 97 ومكانش فيها كمبيوتر طبعا

عربيتى هيا الى فى توقيعى

[misoalex]

لا الكهربائى مش بيهيس ولا بيفتكس الكلام ده صح طبعا

ده لو القواطيش بتاعه البطاريه مش مربوطه كويس او مهربه ومشيت بيها فتره كده ممكن الكنترول يتحرق

الكهربائى عنده حق ده كده بيفهم مش حمار ده مره كهربائى حمار عمل كده عندى والعربيه بطلت وانا قلبى وقع

عموما مش كل مره تسلم الجره هو مش شرط كل مره يعمل كده الكنترول يضرب هو الموضوع ده بيعتمد على الظروف ساعتها يعنى الشحن عالى او الكابل وهو بيركبه شرز منه فعمل شوشره جامده اثرت على دايره بداخل الكنترول وهكذا يعنى

بالظبط زى واحد غسل حوض عربيته فى بنزينه العربيه مرضيتش تدور وواحد تانى غسل عربيه اختها فى نفس البنزينه ودارت