منظومة الامان فى سيارات نيسان

[د. علاء ابراهيم]

اخوانى الاعزاء
انا كنت كتبت الموضوع ده كجزء من موضوع كبير لكن لم يقدر لهذا الجزء ان يرى النور
فاستخسرت انى اترك هذه المعلومات اللى جمعتها و لا افيد بها الاعضاء ( و اهى فرصة نرجع نقرا معلومات بدل ما نقرا خناقات)
و بالرغم من ان كتير من الصقور عندهم خلفية عن المعلومات دى لكن اعدكم ان بكون الموضوع مفيد و ممتع لمن عنده خلفية و لمن لبس عنده خلفية عن هذه المعلومات

ثوابت تعتمد عليها نيسان فى سياراتها كحزمة اساسية للامان

بعيدا عن ال airbags المعروفة و المتوفرة فى كل موديلات نيسان ( على الاقل انا لا اعرف اى موديل فى مصر مافيهوش على الاقل وسادة هوائية للسائق ايا كانت فئة السيارة السعرية)

اولا نظام المكابح المانعة للانغلاق - ABS
انت لما بتفرمل التيل يضغط على الطنابير يوقفها تماما عن الدوران فالعجل يقف
عن الدوران
كده العربية فرملت بس مش معنى انها فرملت انها حتتوقف عن الحركة لان لسه فى
نقطة تانية انت مش متحكم فيها و هي وجود قدر كافى من الاحتكاك بين كاوتش العجل
و الطريق
طب لنفرض انك فى حته الاسفلت فيها زلق ( عليه رمال-تراب-مياه-زيت او حتى
الاسفلت ناعم زياده عن اللازم فى المكان ده من الطريق) الكاوتش فى الحالة دى
بيكون متعرض لاحتكاك اقل من الطبيعى مع الطريق ( و يا سلام لو حضرتك كنت مندفع
فى الحالة دى قوة اندفاعك بتولد قصور ذاتى يزيد بزيادة وزن السيارة و بزيادة
سرعتها مما يتطلب قوة احتكاك اعلى من العادى- كمان- من الطريق مع اطارات
السيارة) و يصبح الانزلاق حتمى
مميزات نظام الABS انه بيقوم بتجديد نقاط تلامس الكاوتش مع الاسفلت كل ما
العجلة تقف و تبدا تنزلق يروح سايب فرامل تقوم العجلة ترجع تلف تانى و تبطل
تنزلق
بيضغط فرامل و يسيب تانى و بعدين يرجع يضغط و يسيب بسرعة كبيرة جدا تعجز انت
كسائق عن تنفيزها ( النظام الموجود فى سيارات نيسان بيعمل الحركة دى 18 مرة فى
الثانية الواحدة)
و ده فديو بيشرح الحكاية دى ببساطة
How ABS (Anti-Lock Brakes) Work - YouTube

ثانيا نظام EBD
و هذا النظام هو مكمل للABS ( يعنى مافيش عربية فيها EBD و مافيهاش ABS لكن فى
عربيات فيها ABS مافيهاش EBD )
النظام ده شغلته توزيع الفرامل على الاربع عجلات لكن مش شرط بالتساوى بل حسب
ما تقتضى الظروف و حسب الوزن الموجود على كل عجلة ليحقق التوقف الامثل للسيارة
بدون ما تفقد توازنها او تنحرف
و ده بردك فديو بسيط بيشرح الخاصية دى
How Electronic Brake force Distribution (EBD) works - YouTube
و ده فديو تانى هيفهمنا اكثر
Electronic Brake froce Distribution (EBD) - Toyota New Zealand - YouTube

نظام Brake Assist- BA
و ده شغلته التحقق من كبح تسارع السيارة بشكل كامل اثناء الطوارىء
ازاى؟؟؟؟
لنفرض انك فوجئت بشىء امامك فى الطريق تطلب انك تدوس فرامل فجاة!!! لو ضغطت
الدواسة بقوة المفروض العربية تستجيب و تتوقف تماما
لكن ماذا يحدث لو انك ضغطت الدواسة بسرعة لكن مش للاخر ( كامل مشوار الدواسة)
ايا كان السبب ( انت ملبوخ او مش واخد على السيارة او قصير الطول او عندك
مشاكل صحية فى رجلك ) فى الحالة دى السيارة العادية حتقل من سرعتها لكن مش
حتتوقف
اما مع هذا النظام السيارة بتشعر ان ضغطة الفرامل دى ضغطة غير عادية بل ضغطة
سريعة فجائية و ده معناه ان حصل شىء مفاجىء خلاك تفرمل و فى الحالة دى الفرامل
حتتصرف كانك ضغط للاخر بكامل قوتك و كامل مشوار دواسة الفرامل
و تتوقف
نبص بصة هنا على الفديو عشان نفهم
Brake Assist (BA) - Toyota New Zealand - YouTube

احزمة الامان و دى مزودة بحاجتين
حاصية الشد المسبق PRE-TENSIONER
فى السرعات العالية حاضر و جاهز لو حصل حادث بيشد الحزام على السائق
و خاصية LOAD LMITER
توزيع الاحمال
ما يتركزش الشد كله على الصدر لكى لا تؤدى لكسور فى الاضلاع نتيجة التوقف
المفاجىء
و ده فديو بيشرح الخاصيتين دول
Pre-tensioner and Force Limiter - Toyota New Zealand - YouTube

و ارجو ان اكون افدتكم

[S O P H O S]

تسلم الايادي
مجهود رائع ..

[ahmed88]

ربنا يجزيك كل خير ...

[assaf]

شكرا علي الموضوع الممتاز

[the_air_devil]

عشرة على عشرة ياجميل .... بسم الله ماشاء الله تسلم إيديك , نسيت كمان توضح للناس ان الصاج بتاعها معمول خفيف علشان ماحدش يعتمد على الحاجات دي اعتماد كلي, بالإضافة ان السرعات العالية مش بينفع معاها وسائل أمان أصلاً (فوق 160)

[dodyam]

الله ينور تقرير مفيد جدا

[Ahmed_Mega]

تقرير اكثر من رائع تسلم ايدك

[gadoo30]

تسلم ايدك

[د.هشام]

شكرا، تقرير ﻣﻤﺘﺎﺯ

[د. علاء ابراهيم]

عشرة على عشرة ياجميل .... بسم الله ماشاء الله تسلم إيديك , نسيت كمان توضح للناس ان الصاج بتاعها معمول خفيف علشان ماحدش يعتمد على الحاجات دي اعتماد كلي, بالإضافة ان السرعات العالية مش بينفع معاها وسائل أمان أصلاً (فوق 160)

توضيح صغير
العربية ثابته لحد 160 بس ده لو غيرت الكاوتش و مقاسه لنوع انسب
و طبعا مع السرعات العالية دى انت كده بتغامر بنفسك بس بردك وسائل الامان ( على الاقل الموجودة فى منظومة الفرامل ) ممكن تساعد فى انها تلحقك

و طبعا موضوع الصاج الخفيف زى ما هوا عيب لكن هو ميزة من ناحية الامان لانه بيمتص الصدمة و ده بيساعد فى تقليا الخطر على الركاب و على المشاة ايضا

[youssef_u]

جميل جدا و خصوصا ان في ناس بتقرا الحجات دي بس مبتفهمش لزمتها ايه

[Sehsss]

تسلم إيدك

[Youssef.Awad]

تسلم ايدك ع المجهود

[saint2011]

ايه الجمال ده يا دكتور ده شغل أوروبى خالص تسلم أيديك يا صديقى

[د. علاء ابراهيم]

اشكركم يا اخوانى