تقرير عن الاصوات الناتجة عند الفرملة فى صنى 2013

[Mohamed.Ali]

السلام عليكم

فى البداية اوجه تحية لادارة واعضاء المنتدى اللى انا بجد بستفيد منهم اكتر من التوكيل نفسه فى معلومات عن الصنى 2013 ومشاكلها ومميزاتها

نخش فى الموضوع بقى , انا اشتريت العربية شهر اخر شهر 7 وكنت مبسوط بيها جدا و الحمد لله على ما رزقنا , وخلصت تليين وعملت صيانة الالف فى مودرن موتورز والعربية بقت حاجة تانية بعد الصيانة

المهم مش هطول عليكة عند 3000 كم بدا بيظهر صوت تزييقة كدا عند الفرملة وبدات ادور على الانترنت على اراء المستخدمين اللى قبلى فى العربية واداءها لحد ما عترت فى المنتدى ده اللى فيه شغل اكثر من رائع وتقارير ممتازة عن السيارة وفوجئت انها مشكلة عامة , وكان فيه زميل عامل موضوع انه عالجوله المشكلة دى فى السبع

المهم رحت توكيل السبع عشان يظبطلى زوايا ويحللى مشكلة الصوت المهم ولا ظبطولى زوايا ولا حللولى المشكله لان صاجو التيل الخلفى " على حد قوله " مش متوفرة , وفى اقرب فرصة هيتصلوا بيا عشان يعالجوها اول متوصل " وطبعا اول فرصة دى مبتجيش خالص "

المهم عشان مطولش عليكو قلت هستحمل لخد صيانة ال 5000 ورينا يحلها من عنده , المفاجاه بقا ان عند 4000 كيلو بدا يظهر صوت جديد صفارة من التيل الامامى مكنتش مصدق بصراحة !!!!!! الصفارة كانت فى البداية بسيطة وبدات تزيد وبعدين بدات قوة الفرامل تقل تدريجيا ويبقى فى رعشة عند ضغط الفرامل وكمان حدفه فى اتجاه اليمين

المهم صبرت لحد ميعاد صيانة ال 5000 واخدت براي الناس هنا فى المنتدى ورحت اوتو ايجيبت بما ان تقييمها افضل مركزخدمة !!

عملت صيانه ال 5000 والباشمهندسة ادتنى تقرير عجيب غريب !!!! العربية محتاجة تغير طنابير امامى وتيل !!!!!!!!!!!!!!!!!!!!!!!!!!!!!!!!!!!!!!!!!!!!!!1

طيب يا باشمهندسة الغربية مش فى الضمان ؟؟ قالتلى اه طبعا بس هنبعت للشركة نجيب موافقة وبعدين نغيرهم ! قولت اوكى , قالتلى هنتصل بحضرتك كمان يومين

وعدى اسبوع ومحدش اتصل !! اتصلت انا .... قالتلى لسا الموافقة مجاتش

بينى وبين نفسى قلت هستنى اسبوعين تلاته يمكن بعتوا الموافقة بالحمام الزاجل

المهم رحت متصل الاثنين اللى فات يوم 27 بشركة نيسان نفسها قدمت شكوى بكل المشاكل اللى العربية ... وكان الرد هيكون فى خلال 72 ساعة عمل " نخلصوش من يوم الاتنين لحد دلوقتى على فكرة "

ما علينا ... قمت متصل باوتو ايجيبت نفسهم ورازع شكوى تانى فى نفس اليوم " الاتنين "

بصراحة المهندسة اتصلت بيا فى نفس اليوم وقالتلى الطنابير موجودة وحضرتك تقدر تيجى تركبهم فى اي وقت ... سالت على موضوع الصاجة الخلفية قالتلى لا دا لسا عليه شوية

رحت يوم الاربعاء التوكيل فى ابو رواش وسبتلهم العربية ورحت الشغل رجعت الساعة 1 لقيتها خلصانة .... مشكورين

طبعا كان عندى اسئلة اولها موضوع الصاجة بقى قلتلها مش همشى الا اما اعرف ايه المشكلة !! قالتلى المشكلة ان ادا عيب قى تصميم السيارة نفسة واما يجيلنا الحل ان شاء الله هنتصل ونغير لكل العربيات اللى فيها مشاكل

والسؤال التانى عل هتتكرر مشكلة الطنابير والتيل ؟؟؟ لان تكلفتهم زى مفهمت 1300 جنيه !!!

الرد ... ان شاء لله لا وبعدين لو اتكررت احنا متنصلناش من المسئولية اهو وغيرناهم !!!!

طيب افرض بقى ان المشاكل دى كلها موجودة والعربية مش فى الضمان ؟؟؟؟؟؟؟

بصراحة انا تخنقت من المشاكل اللى فى العربية .... فرحة العربية الجديدة ضاعت خلاص

كنت اتمنى ان نيسان قبل متنزل عربية تبقى واثقة ان مفيهاش مشاكل او على الاقل لما تظهر المشكلة يبقى ليها حل فورى مش هنتصل بحضرتك لما يبقى فيه حل

اتمنى اكون مطولتش عليكم .. مع انى طولت .. بس كنت عايز افضفض معاكو شوية بما انكو اهل الخبرة

ويمكن اكون فدت حد فيكم بمعلومة هتفرق معاه

والسلام ختام

[zambarota]

السلام عليكم ورحمه الله

انا عندي نفس المشكله ورحت امبارح السبع قلتلهم على صوت الصفاره

كتبولى فى التقرير انها محتاجه صاجه تيل خلفى وهى غير متوفره الان

طبعا قلتله ان الصوت جاي من قدام قالى لا دى صاجه التيل الخلفى ولما تتركب كله هايبقى تمام

وهانتصل بيك اول متتوفر

طبعا دا عيب صناعه واضح وصريح واعترف بيه معظم مراكز الصيانه

لكن الصبر بدأ ينفذ لان سياسه المماطله سمه فى الشعب المصرى

[khaled25_9]

كنت اتمنى ان نيسان قبل متنزل عربية تبقى واثقة ان مفيهاش مشاكل او على الاقل لما تظهر المشكلة يبقى ليها حل فورى مش هنتصل بحضرتك لما يبقى فيه حل

انا الصراحه مش عارف العربيه دى اتنحست فى مصر ولا ايه!! العربيه موجوده من اكتر من سنه فى الهند ومن اول السنه فى السعوديه وماسمعتش شكاوى منها (ممكن فى شكاوى بس انا مش بقرأ هندى ), فا هل ياترى مصر هى اللى بتصنع تيل الفرامل؟؟ لو كده يبقى منطقى, بس مايبررش التاخير فى التعديل على صاجه التيل (لان ساعتها هم اللى هايعملوها)...

[hany63]

بص حضرتك هو مش مشكله ان العربيه تنزل بعيب صناعه و اكبر الشركات في العالم بيحصل معاها كده
انما المفروض و ده اضعف الايمان انها تتحل على الفور بس طول مافي تهافت على العربيه و اوفر برايس فمش فاضيين يركزوا في الحاجات الهايفه من وجهه نظرهم و طول ما العربيه ماشيه يبقى على ما تفرج

[ahmed88]

هوا السؤال هل عيب الصناعة ده مقصود بيه عيب في صناعة الطنابير و التيل ولا العربية تصميمها بيخليهاتِهلك الأجزاء دي بسرعة ؟

[amir]

متابع و ياريت رد شافي بدل القيل و القال

[MaHmOuD MaGdY]

أرجو من كل الأعضاء المحترمين والمشرفين على قسم نيسان القادرين على التواصل مع نيسان ايجيبت ان ينقلوا كل شكاوى ومشاكل الأعضاء لهم وأن يوجدوا حل لقطع الغيار الغير متوفرة او القطع المفترض تواجدها لعلاج عيوب الصناعة وأن يهتموا بخدمة ما بعد البيع أكثر لأن من الواضح أن خدمة ما بعد البيع لصنى 2013 بالذات سيئة جدا من كلام الأعضاء وبصراحة دة هيخسرهم كتير لأن سمعة العربية ابتدت تسوووووووء لسوء خدمة ما بعد البيع
وأنا ممكن ألتمس لنيسان العذر لو العربية نازلة بقالها شهر او اثنين لكن لما توصل الى 6 شهور معلش كدة يبقى استهبال خصوصا لما عدد المشترين بيزيد وكدة هيلاقو مرة واحدة ان الناس كلها مش عاجبها لا التوكيل ولا العربية ولا اى حاجة من نيسان اصلا لعدم توفر خدمة ما بعد البيع بالذات ان العربية لسة جديدة فى السوق ومفيش حد برا التوكيل كمان ممكن يسعف
واتمنى حل جميع المشاكل للأعضاء فى اسرع وقت ممكن ان شاء الله

تحياتى

[mohamed.rabea]

مؤيد لحضرتك فى نفس الرأى و ياريت الناس المسؤلة عن القسم تشوف لنا حل فى مشاكل خدمة ما بعد البيع اللى كتير من الاعضاء بتشتكى منها وتوصل للشركة ان مش مهم انها تبيع و بس لازم تحل مشاكل المشتريين وبأسرع من اللى فى قوائم الانتظار لأن اللى اشترى مش عايز يحس انه رمى فلوسه ع الأرض خصوصا ان العربية بصراحة ممتازة وماتستهالش الخدمة السيئة اللى بعد البيع

[Mohamed.Ali]

متابع لردود السادة الاعضاء وخصوصا الخبراء لعل وعسى بالتواصل مع الشركة يمكن ايجاد حل مناسب

[ART_tv90]

متابع باهتمام .. واتمنى من الله ان يكون الحل قريب وكلنا ثقه فى نيسان لان لو مكنش عندنا ثقه مكناش اشترينا السياره من الاول ونرجو من جميع مسؤلين نيسان ان يكونو عند حسن ظننا بهم

عندى سؤال للاخوه الذين اشتكو من الطنابير وصوت الفرامل هل بدأت المشكله بملاحظه وجود رماد اسود حول الطاسات الاماميه ام لا وشكرا لكم ..
[img2]http://nileup.com/up/uploads/nilemotors_13522393591.jpg[/img2]

[HaNo_ELBeh]

أرجــــــــــو من السادة الاعضاء المحترمين اصحاب الخبرة الرد على استفسارات بعض مالكى السيارة للاهمية