صوت فى نيو صنى هيجننى

[malta]

بقالى فترة لما بمشى فى طرق غير ممهدة او وانا نازل من على مطب بس صوت فى العربية من تحت ادام زى ما يكون حاجة بتلق. فضيت درج التابلوة تماما و ثبت حزام الامان و اى حاجة ممكن تعمل صوت تخبيط مع الحركة و تاكدت ان الصوت طالع من برة العربية من تحت.حجزت عند السبع و روحت قلت للمهندس على الموضوع و صوت صفير التيل و طلعت فى الاستراحة اتفرج عليها الفنى فك العجلتين اللى ادام و بعد شوية ركبهم و العربية اتغسلت و المهندس قالى احنا ربطنا العفشة و المهندس فلان جربها و مفيهاش حاجة و الصوت لسه موجود انا هتجنن و الله مش عارف اروح لمين او اكشف عليها فين او الصوت ده ممكن يكون من ايه هل من مجيب ؟؟

[youssef_u]

بص تحت الكراسي و شيل كل حاجه من التابلوه و لو كده روح تاني اي مركز خدمه و يفضل اوتو ايجيبت و اطلع مع المهندس جربها و خير ان شاء الله

[Chemist Shehap]

متابع

[man1974]

السلام عليكم
معلش سؤال: هي العربية ماشية كم ألف كيلو؟

[malta]

96 مشاهدة و 3 ردود بس !!! العربية عاملة 2100 كيلو

[man1974]

2100 كيلو متر، يعني العربية لسه زيرو، مش هقدر أقول إلا حسبي الله ونعم والوكيل في كل بني آدم لا يتقن صنعته.

بالنسبة للصوت، التوكيل قالك مفيش حاجة وبرده لو رحت لواحد مكانيكي هيقلك ما فيش حاجة ورعبيتك زي الفل. عارف ليه، لأن الناس دي مش عايزة تضيع وقت. هو بيحسبه إزاي؟ مميكن يخاد نص ساعة ولا ساعة وهو يبدور على السبب ويمكن يكتشفه ويمكن ما يكتشفوش، ويمكن يكون مجرد مسمار ولا صاموله عايزة تتربط، فهل الزبون (أي زبون، لا أقصد حضرتك طبعا)، هيحسبه على أي أساس، على أساس ساعة ضاعت وهو بيدور على المشكلة ولا على أساس مجرد صامولة واتربطت؟
ومن الآخر الناس دي عايز حد لما يروحلها يقولهم الحاجة دي مكسورة أو مستهلكة وعاوز أغيره، يقوم مغير بسرعة ويخاد حسابه. يعني بمعنى أصح مش عاوز يتعب نفسه، وومشع عاوز يشغل دماغة، ومش عاوز يضيع وقته.

أنا بقولك الكلام ده عن تجربة. أنا من سنتين كنت باسمع صوت زنة في العربية من تحت، وكنت شاكك في الشكمان على الرغم إنه كان فابريكا، رحت لثلاثة بتوع شكمان مختلفين، كل واحد يبص عليه ويقول: المشكلة مش من الشكمان، واحد فيهم قلي المشكلة مش من الشكمان وأوعى تروح لحد تاني يلعبلك في الشكمان، أصله حرام ده لسه فابريكا. المهم الموضوع ده استمر حوالي شهرين وفي يوم جيت أنا وأخويا، هو ركب العربية وبقى يدوس على البنزين وانزلت أنا تحته وبقيت أبص عليها من تحت ولكن للأسف مقدرناش نوصل برده لمصدر الصوت. تاني يوم روحت أنا وأخويا محطة غسيل قريبة. رحنا بدري جدا عشاق ناخت وقت براحتنا واحنا بنبص عليها، ورفعت العربية بحيث أنها تكون قريبة مني وأنا ببص عليها. وكانت المفاجأة. لقت ماسور الشكمان إلي طالعة من الموتور ومتصلة بعلبة الشمكان، من ناحية علبة الشكمان. مشروخة شرخ دائري عند اتصالها بالعلبة. والشرخ ده دقيق جدا زي الشعرة ومبطلعش عادم ولا دخان أسود ولا هواء حتى. بعد كده نزلت العربية ورحت لواحد بتاش شكمان، وشاورتله على المكان وقلته عاوز ألحم الكسر ده. لحمه وأخد 10 جنيه. وانتهت المشكلة.

الخلاصة إنك تحاول تبص على العربية بنفسك وحاول تستنتج المشكلة فين بالضبط وفي أنهي جزء من العربية. وربنا معاك.

[hossam_elwani]

2100 كيلو متر، يعني العربية لسه زيرو، مش هقدر أقول إلا حسبي الله ونعم والوكيل في كل بني آدم لا يتقن صنعته.

بالنسبة للصوت، التوكيل قالك مفيش حاجة وبرده لو رحت لواحد مكانيكي هيقلك ما فيش حاجة ورعبيتك زي الفل. عارف ليه، لأن الناس دي مش عايزة تضيع وقت. هو بيحسبه إزاي؟ مميكن يخاد نص ساعة ولا ساعة وهو يبدور على السبب ويمكن يكتشفه ويمكن ما يكتشفوش، ويمكن يكون مجرد مسمار ولا صاموله عايزة تتربط، فهل الزبون (أي زبون، لا أقصد حضرتك طبعا)، هيحسبه على أي أساس، على أساس ساعة ضاعت وهو بيدور على المشكلة ولا على أساس مجرد صامولة واتربطت؟
ومن الآخر الناس دي عايز حد لما يروحلها يقولهم الحاجة دي مكسورة أو مستهلكة وعاوز أغيره، يقوم مغير بسرعة ويخاد حسابه. يعني بمعنى أصح مش عاوز يتعب نفسه، وومشع عاوز يشغل دماغة، ومش عاوز يضيع وقته.

أنا بقولك الكلام ده عن تجربة. أنا من سنتين كنت باسمع صوت زنة في العربية من تحت، وكنت شاكك في الشكمان على الرغم إنه كان فابريكا، رحت لثلاثة بتوع شكمان مختلفين، كل واحد يبص عليه ويقول: المشكلة مش من الشكمان، واحد فيهم قلي المشكلة مش من الشكمان وأوعى تروح لحد تاني يلعبلك في الشكمان، أصله حرام ده لسه فابريكا. المهم الموضوع ده استمر حوالي شهرين وفي يوم جيت أنا وأخويا، هو ركب العربية وبقى يدوس على البنزين وانزلت أنا تحته وبقيت أبص عليها من تحت ولكن للأسف مقدرناش نوصل برده لمصدر الصوت. تاني يوم روحت أنا وأخويا محطة غسيل قريبة. رحنا بدري جدا عشاق ناخت وقت براحتنا واحنا بنبص عليها، ورفعت العربية بحيث أنها تكون قريبة مني وأنا ببص عليها. وكانت المفاجأة. لقت ماسور الشكمان إلي طالعة من الموتور ومتصلة بعلبة الشمكان، من ناحية علبة الشكمان. مشروخة شرخ دائري عند اتصالها بالعلبة. والشرخ ده دقيق جدا زي الشعرة ومبطلعش عادم ولا دخان أسود ولا هواء حتى. بعد كده نزلت العربية ورحت لواحد بتاش شكمان، وشاورتله على المكان وقلته عاوز ألحم الكسر ده. لحمه وأخد 10 جنيه. وانتهت المشكلة.

الخلاصة إنك تحاول تبص على العربية بنفسك وحاول تستنتج المشكلة فين بالضبط وفي أنهي جزء من العربية. وربنا معاك.

كلامك سليم البلد دى عيزه الواحده يشتغل فيها صنايعى لكل حاجه

[د.هشام]

خليك وراهم لغاية ما تتحل، بسيطة ان شاء الله

[malta]

شكرا لكل الاخوة اللى ردوا هو الواحد بس كان فرحان ان ربنا كرمه و خلصنا من الميكانيكية و البهدلة بس الظاهر انه فعلا لازم اكتشف بنفسى اليوم اللى رحت فى السبع خدته اجازة و اطلطعت ساعتين و نص و فى الاخر كله تمام انا خايف بس تكون حاجة خطيرة و ربنا يسترها علينا جميعا و كل سنة و انتم طيبين

[youssef_u]

شكرا لكل الاخوة اللى ردوا هو الواحد بس كان فرحان ان ربنا كرمه و خلصنا من الميكانيكية و البهدلة بس الظاهر انه فعلا لازم اكتشف بنفسى اليوم اللى رحت فى السبع خدته اجازة و اطلطعت ساعتين و نص و فى الاخر كله تمام انا خايف بس تكون حاجة خطيرة و ربنا يسترها علينا جميعا و كل سنة و انتم طيبين

لا ان شاء الله حاجة خفيفة و يكون مسمار يتربط و خلاص ،، متبوظش فرحة العربيه بالحجات البسيطه دي

[bebo382]

روح خاليهم يحطوا كاويتش (هما عارفينه ).. ده متاح الان بعد ما جابوه من بره !!

[the_air_devil]

حاجة مفكوكة وبتعمل صوت قدام ... الحاجات اللي في الموتور وتحت الكبوت مش هاتعمل صوت لو مفكوكة غالباً ...

1- اتأكد ان نمرة العربية الأمامية مربوطة كويس

2- اتأكد ان الشبكة الأمامية مربوطة كويس

3- حد سند جامد على الكبوت وطبق حتة من قدام أو خلى فيه رواحة بين مفتاح الكبوت والكبوت

4- شوف كاوتش البربريز الأمامي مقفل كويس ولا لأ علشان ده عيب عام في الكاوتش المصري

5- اتأكد ان الكبوت من جوة مافيهوش حتة مفكوكة تعمللك صوت

6- شيك على كل غطيان الزيت , الفرامل, قربة الرادياتير , قربة مياه المساحات, شوفهم لو مفكوكين ممكن يعملولك صوت بس ده هايكون خفيف, وكذلك على وضع مقاس الزيت

7- شيك على ان كل حاجة متصلة بالموتور مربوطة صح , هزها بإيدك وشوف لما تضغط على العربية والكبوت مفتوح هايجيلك صوت منين.... ممكن تكون جسم غريب دخل غرفة المحرك وبيعمل الصوت ... انا مرة لقيت مشبك غسيل !!!


ان شاء الله ماتلاقيش حاجة كبيرة هاتكون بسيطة بإذن الله , وياريت تطمنا لما تعرف

[Dr.M_baz]

غالبا الصوت ده هيطلع تيل الفرامل بيلق في مكانه نتيجة ضعف في الكاليبر إللي ماسكه أو التيل خفيف.
عشان تتأكد شوف في المطبات و أنت دايس فرامل لو الصوت بيختفي أو بيقل يبقى هي أكيد لو فضل زي ما هو يبقى حاجه تانيه.

[malta]

متشكر اوى على الردود و الاقتراحات ان شاء الله هاشوف الحاجات اللى قولتولى عليها و اقولكم ان شاء الله بس بمناسبة تيل الفرامل انا من يومين كدة و انا دايس على الفرامل و برجع لورا حسيت بالدواسة سايبه يعنى دايس على الاخر و مفيش مقاومة و بعدين مسكت تانى الحكاية دى حصلت مرتين فى نفس اليوم ممكن يكون لها علاقة بالصوت ده ولا ايه معلش تعبتكوا معايا بس الاعتماد الحقيقى على الله و عليكم بجد

[د. علاء ابراهيم]

اعتقد العفشة ما اتربطتش كويس

فى صيانة ال 5000 حسيت بشىء مشابه و راح بعد التربيط الجيد و بعد الفين كيلو بدا يرجع تانى