كيفية ضبط طارة الدركسيون وسؤال عن المقص

[kabara]

إخــــــــــــــــــوتي الأحباء
كل عام و أنتم بخير
عندي إستفسار
من يومين أكلت مطب علي سرعة كبيرة لدرجة إن الجنطين إللي قدام حصل فيهم تنية صغيرة
فذهبت عند عفشجي و كشف علي العربية و نزلت معاه تحت العربية بعد فك الكوتشين و لقينا كل حاجة سليمة ما عدا المقص اليمين حصل له لوحة ( إعوجاج بسيط
و طبعا الكوتشين فتحوا للخارج شوية فرحت ضبط زوايا و ترصيص و إستعدلت الجنطين
لكن طارة الدركسيون مش مزبوطة مع الكوتشين يعني الطارة واخدة شمال شوية و العفشجي و بتاع الزوايا حاول يزبط من تحت و قالي ده أخره عشان المقص اليمين لازم يتغير
الإستفسار الأول
فهل الطارة بتتزبط من تحت العربية و إلا من فوق من فوق عند الطارة
والإستفسار الثاني
لما سألت علي المقص لقيت فيه نوعين الأول ياباني بتاع التوكيل و سعره620
و الأخر برضه ياباني شركات و ثمنه 300
فإيه الفرق بين الإثنين طالما الإثنين ياباني و أشتري أيه فيهم
شكرا لكم و اسف للإطالة

[Sehsss]

لازم المقص يتعدل والأفضل والأصح يتغير

[Ahmedmiy]

بسم الله الرحمن الرحيم

بسم الله الرحمن الرحيم

اللهم صل على محمد وعلى آله وصحبه أجمعين

ما شاء الله كان وما لم يشاء لم يكن

الحمد لله أولاً وآخراً

أخى العزيز بعد قراءة الموضوع أخاف أن يبدأ الأمر معك فى محاولة الإصلاح إلى المعاناة لذا من وجهة نظرى الشخصية مع العلم بأن معلوماتى الفنية ليست مثالية .

أولاً إذا كان العفشجى رجل أمين ومحل ثقة فى عمله فأنصحك بتغير المقص اليمين فقط وإذا لم يكن العفشجى متمكن تماما من التشخيص أنصحك بشراء المقص اليمين والشمال بسعر الواحد 300 جنيه وهذا الوضع سيمكنك بالتأكيد من معرفة حالة الجنوط بعد الإستعدال الذى تم .

وإن شاء الله تكون الأمور جيدة

وأنصحك أيضا بعدم الإهمال فأظن أن هناك مخاطرة بالتحرك بهذا الوضع

والله خير حافظ وهو أكرم الأكرمين

وبالتأكيد هناك صقور نيسان من أصحاب الخبرات والأراء السديدة إن شاء الله تجد أراء أخرى أفضل



خالص الأمنيات بالنجاح والسداد إن شاء الله


سبحان الله العظيم وبحمده " من قالها غرست له نخلة بالجنة إن شاء الله "

لا حول ولا قوة إلا بالله العى العظيم

الحمد لله

[MohammedAladel]

نفسى أعرف لما بيضبط زوايا هو بيلعب فى إيه بالضبط ؟؟ يعنى إيه الأجزاء اللى بيحركوها من تحت فى العفشة عشان يضبطوا الزوايا

[mostafait]

طبعا يافندم لو فيه اعوجاج فى احد المقصات السياره لايمكن ضبط زايا لها سوا يمين او شمال
واضح انك اكلت مطب جامد فعلا .حاول تغير المقصات وتضبط زوايا وان كان فى مشكله فى الجنوط فيجب استبدالها او تغيرها .بخصوص الزوايا معظم الناس بتضبط الزوايا عن طريق البارات الخارجيه ودى بتكون عباره عن تيش او وصله فى موخره العجله تعمل عند تحريك التيش او الباره فان زوايا العجله تتاثر .لو فيه استفسار 01022660567

[MohammedAladel]

بس عرفت يبقى التيش دا اللى فيه قلاووظ وليه صامولة كدا

[buddha]

الخبطة الجامدة فى الجنط او المطب الجامد بيقوم بثنى المقص او المساعد او ممكن يكسر المقص او المساعد او يلوح الدشمة
لما تيجى تكشف على الزوايا بتلاقى CAMBER or CASTER
نتيجة الصدمة طبعا
المركز بتاع ظبط الزوايا بيقوم بحل مؤقت بانة بيعمل(زرجينة) وطبعا بتكون بشكل بسيط وفعلا بيعالج جامد بس بيكون فى فروقات بسيطة ولا تعالج الا بعد استبدال ما تلف

[youssef_u]

شكلك دخلت عالمطب وانتا ماسك فرامل عالاخر

[m_love4me]

نصيحه من اخ وعنتجربه

مقص مش مظبوط
شوتين وجلب هتضرب و كاوتشات الميزان هتبوظ

وحتي لو استعدلته مش هيمعمر

حضرتك من دلوقتي اشتري راحتك ووفر تكاليف مستقبليه
واشتري واحد جديد او استيراد

تحياتي لك

[Land_Cruiser]

إخــــــــــــــــــوتي الأحباء
كل عام و أنتم بخير
عندي إستفسار
من يومين أكلت مطب علي سرعة كبيرة لدرجة إن الجنطين إللي قدام حصل فيهم تنية صغيرة
فذهبت عند عفشجي و كشف علي العربية و نزلت معاه تحت العربية بعد فك الكوتشين و لقينا كل حاجة سليمة ما عدا المقص اليمين حصل له لوحة ( إعوجاج بسيط
و طبعا الكوتشين فتحوا للخارج شوية فرحت ضبط زوايا و ترصيص و إستعدلت الجنطين
لكن طارة الدركسيون مش مزبوطة مع الكوتشين يعني الطارة واخدة شمال شوية و العفشجي و بتاع الزوايا حاول يزبط من تحت و قالي ده أخره عشان المقص اليمين لازم يتغير
الإستفسار الأول
فهل الطارة بتتزبط من تحت العربية و إلا من فوق من فوق عند الطارة
والإستفسار الثاني
لما سألت علي المقص لقيت فيه نوعين الأول ياباني بتاع التوكيل و سعره620
و الأخر برضه ياباني شركات و ثمنه 300
فإيه الفرق بين الإثنين طالما الإثنين ياباني و أشتري أيه فيهم
شكرا لكم و اسف للإطالة

لو المقص اتعوج يا فندم لازم يتغير لأن هيبقى فى عوجه من ناحيته ملهاش علاج غير التغيير و تظبيط الطاره بيبقى من تحت فعلا و ما ينفعش يضيع العوجه و إلا يبقى المقص ملوش لزمه . سعر المقص اليابانى الاصلى هو اللى ب 620 أما اللى ب 300 ده احتمال كبير يكون تايوانى او من اى حته تانيه غير اليابان و ما انصحش حضرتك به خالص لانه عمره قصير و شويه و هتحتاج تغيره تانى

[kabara]

شكرا لمروركم العطر وخالص التحايا و التقدير لكم
يعني الطارة بتتظبط من تحت مش من فوق
و فعلا أنا دخلت علي المطب و أنا ماسك فرامل

[kabara]

و الكاوتش اليمين الأمامي مترحل للخلف بتاع 5 سم
و الغريب إن بعد ضبط الزوايا العربية بطلت تحدف يمين و ماشية ستريت
إن شاء الله هغير المقص و أقوللكم علي النتيجة مرة تانية بشكركم علي الإهتمام

[MohammedAladel]

لو تعديل المقص رخيص جرب وخلاص

لو مكنش كدا غير المقص عشان تحافظ على أداء باقى أجزاء العفشة والموتور كمان فى نفس الوقت

وتانى مرة لما يقابلك مطب وعر زى دا أمسك فرامل بأقصى قوة لكن لما تيجى تلبس فى المطب ترفع رجلك من ع الفرامل بسرعة وتسيبها تعدى من عليه بالتأكيد الأضرار هتكون أخف بكتير

لكن لما تدوس فرامل وأنت بتاكل مطب بسرعة إنت عارف إن العربية قدام تقيلة والعجل واقف حمولة العربية كلها هتسلم على المطب

أضعف حاجة هى العفشة كمساعدين وسست ومقصات هى اللى هتتأثر جامد

[Sehsss]

شكرا لمروركم العطر وخالص التحايا و التقدير لكم
يعني الطارة بتتظبط من تحت مش من فوق
و فعلا أنا دخلت علي المطب و أنا ماسك فرامل

أيوه بتتظبط من تحت

[mem]

غير المقص وريح دماغك ده افضل حل
والا ها تفتح معاك حاجات تانيه كتيير
العفشه بالذات غير مش تعدل وتصلح
وهات قطعه الغيار من التوكيل احسن واضمن