السيارة لا تستجيب للريموت إطلاقا - صنى 2011

[zinger]

السلام عليكم ورحمه الله ,

زى ما هو واضح ف العنوان فجأه وبدون مقدمات الريموت أصبح لايعمل إطلاقا , قولت يمكن بطارية !!!!! غيرت البطارية ولا فائده اطلاقا , ياترى هل ده من الريموت ولا من العربية ؟
وإزاى أتاكد ان الرموت سليم ولا لأ ؟ وهل يمكن إعاده برمجه الريموت (reset)
وهل الضمان يسرى على أعطال الريموت ؟ وهل فيه حد حصلت معاه الحكاية دى ؟ وعمل فيها إيه
أرجوا الإفاده ولكم جزيل الشكر ياأحلى صقور .

[asyl84]

والله انا مكسوف اقولك انها حصلت معايا بس كان ذكاء خارق منى لان المفتاح كان فى الكونتاكت وانا ماسك الريموت وعمال اجرب لكن اعتقد انك محتاج حد يبرمج الريموت تانى على العربية والله اعلم

[HOSSAM_GABRE]

اعمل ريسيت للعربية بالطريقة دى ( مقتبس من موضوع الاخ بيشوى منسق مساعد القسم ) :
كيفية عمل ريسيت لكمبيوتر العربية نيسان صني ؟

الموضوع سهل جدا و بسيط لكن بخطوات مرتبة حتي يتم عمل ريسيت لكمبيوتر العربية بطريقة صحيحة بدون ادني مشكلة و هي :



1- يجب ان تقوم بغلق جميع نوافذ العربية عشان تسمع ما سيحدث في العربية بالظبط و تكون العربية في وضع عدم الادارة .


2- وضع المفتاح في كونتاكت العربية و لفه لوضع التشغيل بدون ما تدور العربية كما هو موضح بالصورة بالاسفل و بعد ان تغلق لمبة OverDrive بعد حوالي ثانيتين .. تقوم بلف المفتاح الي وضع الاغلاق فورا بدون خروجه من الكونتاكتت و بعدها بحوالي 5 ثواني هتسمع صوت تكة من الناحية اليمين لطابلوه العربية

3- بعد سماع هذه التكة تقوم بإعادة الخطوة رقم 2 مرة اخري و هي : لف مفتاح العربية لوضع التشغيل بدون ما تدور العربية كما هو موضح بالصورة و بعد ان تغلق لمبة OverDrive بعد حوالي ثانيتين .. تقوم بلف المفتاح الي وضع الاغلاق فورا و بعدها بحوالي 5 ثواني هتسمع صوت تكة من الناحية اليمين لطابلوه العربية

4- هتقوم بلف مفتاح السيارة لتدويرها كالعادة .

5- من هنا تم عمل ريسيت او اعادة تهيئة لنظام كمبيوتر العربية نيسان صني

المشاكل اللي بيحلها ريسيت كمبيوتر العربية ؟

النقاط التي ستسرد الآن هي نقاط اثارها اعضاء القسم و ايضا ً توكيل نيسان و تجاربي الشخصية و عند حدوث اي من المشاكل الآتيه فاننا بنتوجه في المقام الاول لعمل ريسيت لكمبيوتر العربية و اذا لم تحل المشكلة فإنه بدورنا نتوجه للوكيل لحل المشكلة اذا كانت كهربائية او ميكانيكية :

اضغط هنا لمشاهدة الصورة بالحجم الطبيعي.

1- الاستهلاك العالي للبنزين : حيث ان ريسيت الكمبيوتر بيقوم بتظبيط حساس TPS " throttle positioning sensor " و هو يتصل هذا الحساس ببوابة هواء الدخول للمحرك بزراع معين لينقل صوره حيه عن وضع البوابه لوحدة التحكم.....وعند حدوث ضغط على الأكسراتير بالقدم فأن البوابه وضعها يتغير وبالطبع ولابد من توفر عنصر فى دايرة الحقن يقوم بنقل الصوره عن وضع البوابه لوحدة التحكم لكى تقوم بالتفاعل مع الوضع الجديد.....وهذا هو دور هذا الحساس

2- عند اضاءة لمبات التحذير و لكنها لم تغلق في وقتها مثل لمبة AirBag او لمبة الموتور و بيكون قصور في برمجة الكمبيوتر و عادة بتحل بعمل ريسيت لكمبيوتر العربية

3- الاحساس بنقلات الفتيس الاوتوماتيك . حيث انه بعد عمل ريسيت بيقل الاحساس بنقلة الفتيس عند التسارع و غالبا كمبيوتر العربية بيحدث به برجلة عند الشد و القرص علي العربية و هذا ما يحدث معي شخصيا ً

4- السحب الضعيف او التسارع للعربية .

5- عدم قدرة ريموت انذار العربية للتشغيل .. فإنه عند عمل ريسيت للكمبيوتر بنسبة كبيرة جدا يرجع عمل ريموت جهاز انذار العربية مباشرة

6- علو صوت موتور العربية .

7 - اي برجلة تحدث بكهرباء العربية ممكن و بنسبة معقولة انها تتظبط بعمل ريسيت لكمبيوتر العربية.

[Sehsss]

شيل كابل البطارية 10 دقائق ورجعه تاني

[mem]

جرب الريسيت وان شاء الله تنحل

[exact]

قبل الريسيت بص على علبة الفيوزات لأنه فيوزه بيضرب باستمرار

[engahmedadel29]

اطفاء لمبة شيك انجن نيو صنى

اولا : افتح الكونتاكت لحد ما كل لمض التابلوه تنور ... من غير ما تدور يعنى و استنى 3 ثوان

ثانيا :دوس على دواسة البنزين للأخر و شيل رجلك .. الموضوع ده لازم يتعمل بسرعة جدا ( خمس مرات فى اقل من 5 ثوان ) و بعدين نستنى 7 ثوان

ثالثا : هتفضل دايس على دواسة البنزين لمدة 10 ثوان لحد ما لمبة شيك انجن تفضل تنور و تطفى و بعدين شيل رجللك لمدة 10 ثوان.

رابعا : دوس دواسة البنزين للأخر تانى لمدة 10 ثوان هتفضل برضه اللمبة تنور و تطفى عادى. . بعدين شيل رجلك من على الدواسة و شيل المفتاح من الكونتاكت .

خامسا : دخل المفتاح و دور العربية هتلاقى اللمبة طفت .

انا عارف ان ده موضوع تانى بس حبيت اشارك بيه

[jojojojo]

حصلت معايا من شهرين بالظبط وجبت حجر وبرضه مشتغلش روحت للتوكيل طلع فيوز بتاعه وسنفره او نضفه مش عارف ورجعه تاني واشتغل انصحك تروح التوكيل في دقيقه هيعملهالك

[mido_fn]

هو ينفع اعمل الريسيت للتيدا ؟

[samo999]

ممكن يكون رطوبة او مياة داخلة بين الزراير........ ممكن تفكة وتنضفة من جوة بحيث ميبقاش فية عازل بين المفاتيح ودة اللى كان حاصل معايا ومتخفش من فكة .

[zinger]

تم حل المشكلة بنجاح عن طريق عمل الريسيت , ألف شكر لكل الزملاء الأعزاء اللى أفادونى بالرد

[Sehsss]

تم حل المشكلة بنجاح عن طريق عمل الريسيت , ألف شكر لكل الزملاء الأعزاء اللى أفادونى بالرد

مبروك حل المشكلة

[_hema]

مبرروك ان المشكله اتحلت على خير

فى احتمال تانى ودا حصل معايا


كان الريموت لايعمل وبالاتصال بالمهندس \اسلام فى السبع فطلب منى الحضور الى المركز وقام بفتح الكابوت وعرفنى ان فى فيوز فى علبه الفيوزات يحتاج يتعمل له ريست اى ان يتم خلع الفيوز من مكانه لمده 30 ثانيه ووضعه فى مكانه تانى وبالفعل اشتغل الريموت

وكان فى احتمال تانى وهو ضعف حجر البطاريه

[mem]

الحمد لله انها اتحلت وطلعت حاجه بسيطه

[Land_Cruiser]

مبرروك ان المشكله اتحلت على خير

فى احتمال تانى ودا حصل معايا


كان الريموت لايعمل وبالاتصال بالمهندس \اسلام فى السبع فطلب منى الحضور الى المركز وقام بفتح الكابوت وعرفنى ان فى فيوز فى علبه الفيوزات يحتاج يتعمل له ريست اى ان يتم خلع الفيوز من مكانه لمده 30 ثانيه ووضعه فى مكانه تانى وبالفعل اشتغل الريموت

وكان فى احتمال تانى وهو ضعف حجر البطاريه

+1
بالضبط كده ده فيوز ال anti theft و ده بيحل المشكله بتاعه الريموت و الريسيت كمان مفيد قوى لانه بيضبط كذا حاجه تانيه غير الريموت زى استهلاك البنزين و النتشه بين النقلات و عامل كده زى restart ال windows فهو العلاج السحرى لمشاكل كتير فى خطوة واحده