حيرة مخلياني عاوز أقتني الشكل الجديد

[miceg]

السلام عليكم ورحمة الله
اولا ممنوع دخول المتعصبين بين ملاك الشكل القديم والجديد
ومن حق كل واحد يكون ليه وجهة نظر
ولكن في حدود النقاش وليس التعصب
انا معايا صني 2010 اوتو (( ايرباج وايه بي اس ) ماشي بيها 52 الف كيلو
وبما إن العربية حاليا خارج الضمان والهاجز النفسي اللي بيقولي خليك فعربية زيرو وضمان 3 سنوات او 100 الف كيلو
بقالي يومين بتصفح موضوعات النيسان 2013
ومن كثر كلام الناس بالسلبيات وإلايجابيات خلتني عاوز انزل اوتو إيجيبت واحجز ال 2013
ومش مستعجل لغاية ماييجي ميعاد التسليم أكون بعت العربية
اللي مخليني متردد اني صرفت كتير عالعربية اللي معايا ومقتنيها (( اخرها كاوتشات ب 3000 ج)) وفرش جلد وإكسسوارات ... الخ
عجبني فال 2013 وسع الكنبه والشكل مكنتش مقتنع بيه شوية لكن من كتر ماقابلته فالشارع حسيت إنه فخم فيه طلة من عربيات العالية (( كورولا - النترا ))
وعلى كلام الناس الموتور ليس بالبطيء او السىء
العربية إقتصادية من ناحية البنزين وده أكيد شىء يهمني
عاوز مشورتكم من ناحية باقي السلبيات او الايجابيات اللي تأيد أو تعارض قرار الترقية الى 2013
خاصة اني شايف الفرق ممكن يكون 20 الف جنيه بعد البيع وإعادة الشراء
نصيحتكم بقا يانيسانوية .........

[Dr'AhmZZong]

بص حضرتك أنا هاقولك المفيد من الآخِر :

الصني الجديدة تتميز عن القديمة في حجتين فقط : استهلاك البنزين و الوسع الداخلي ..

غير كده متتجبش ..

[MohammedAladel]

بلاااااااااااااااااااااااااااااااااااااااااااااااا اااااااش

عربيتك شكلها أحلى .... موتورها أقوى ومعاك abs خليك فى عربيتك واحمد ربنا

انا شخصيا مكنتش معجب بشكل الصنى القديم خصوصا من ورا فوانيسها البومبيه لكن بعد ما شفت الشكل الجديد حبيت الصنى الشكل القديم وحسيت أنها تحفة فنية بجد مش بهزر

[HSE_eng_ramy]

بص يا باشا
على الرغم من ان العربية واسعة والتكييف قوى وموفرة فى البنزين بس شوف انتا بتقول ايه على الشكل (على الرغم من انها صفقة اكثر من رابحة فى فئاتها السعرية) نصيحة اخوك خليك فى الشكل القديم ولو عايز تجيب حاجة جديدة فكر فى التيدا مثلا لو عايز نيسان بردو او جرب حاجة جديدة والله المستعان

[HSE_eng_ramy]

جمعة مباركة عليكو جميعا وقبل ما انام عشان صلاة الجمعة بقى
شوف الستروين C- Elysee وتقاريرها فى قسم ستروين واعملها مقارنة والله المستعان

[shaaban2008]

السلام عليكم ورحمة الله
اولا ممنوع دخول المتعصبين بين ملاك الشكل القديم والجديد
ومن حق كل واحد يكون ليه وجهة نظر
ولكن في حدود النقاش وليس التعصب
انا معايا صني 2010 اوتو (( ايرباج وايه بي اس ) ماشي بيها 52 الف كيلو
وبما إن العربية حاليا خارج الضمان والهاجز النفسي اللي بيقولي خليك فعربية زيرو وضمان 3 سنوات او 100 الف كيلو
بقالي يومين بتصفح موضوعات النيسان 2013
ومن كثر كلام الناس بالسلبيات وإلايجابيات خلتني عاوز انزل اوتو إيجيبت واحجز ال 2013
ومش مستعجل لغاية ماييجي ميعاد التسليم أكون بعت العربية
اللي مخليني متردد اني صرفت كتير عالعربية اللي معايا ومقتنيها (( اخرها كاوتشات ب 3000 ج)) وفرش جلد وإكسسوارات ... الخ
عجبني فال 2013 وسع الكنبه والشكل مكنتش مقتنع بيه شوية لكن من كتر ماقابلته فالشارع حسيت إنه فخم فيه طلة من عربيات العالية (( كورولا - النترا ))
وعلى كلام الناس الموتور ليس بالبطيء او السىء
العربية إقتصادية من ناحية البنزين وده أكيد شىء يهمني
عاوز مشورتكم من ناحية باقي السلبيات او الايجابيات اللي تأيد أو تعارض قرار الترقية الى 2013
خاصة اني شايف الفرق ممكن يكون 20 الف جنيه بعد البيع وإعادة الشراء
نصيحتكم بقا يانيسانوية .........

بس كده متبقاش ترقيه
يعني انا لو معايا صني ممكن أحس بالترقيه مثلا لو غيرت للقشقاي
اوياباني اعلي زي الهوندا السيفيك مثلا
او اوروبي زي الجيتا اوالفانتازيا اوالاسترا مثلا
انما صني بصني

[د.هشام]

السلام عليكم ورحمة الله

عاوز مشورتكم من ناحية باقي السلبيات او الايجابيات اللي تأيد أو تعارض قرار الترقية الى 2013
خاصة اني شايف الفرق ممكن يكون 20 الف جنيه بعد البيع وإعادة الشراء
نصيحتكم بقا يانيسانوية .........

السلبيات:
١- أكيد حيبقى فيه خسارة مادية، وبالاخص علشان ظروف البلد وغلاء أسعار العربيات
٢- دا مش يكون upgrade زي الاخوة الافاضل ما قالوا
٣- الصني القديمة صاجها انتقل وال stability احسن شوية
٤- شكل التابلوه أجمد
٥- قطع الغيار منتشرة، بس أكيد الجديدة حتتوفر بالتدريج

الايجابيات:
زي ما انت قولت عربية جديدة وليها ضمان، شكل جديد، سواقة ممتعة اكتر (باور كهرباء، عفشة انعم، صوت الموتور منخفض)، استهلاك بنزين اقتصادي، اوسع....

وبالتوفيق ان شاء الله

[Grendizer]

رأيي الشخصي أنها أسوأ شكل ظهر من الصني إلى الآن !!

[limo81]

المشكله
انا شايف الناس اللى بتهاجم بحده وبتعصب بخلاف ما طلبه صاحب الموضوع لا تمتلك أصلاً نيسان
الرجاء دخول الساده أعضاء نيسان القديمه والجديده اللى يقدروا يفيدوا بحكم قيادتهم وتعاملهم الفعلى مع العربيه ...مش مجرد أهواء
وخلى بالك .!! فكرك ورأيك ممكن يغيروا قرار الواحد سواء للأسوأ أو للأحسن

المسأله مش أهواء

[abdulmoniem]

السلام عليكم ورحمة الله وبركاته

أنا معايا سوبر صالون الشكل الجديد ..

بس عمري مسقت النيسان القديمة خالص الحقيقة.

فهتكلم عن إللي معايا وعن الشكل بتاعها مقارنة بالقديم

1 - الشكل
دي وجهة نظر .. ولولا اختلاف الأزواق لبارت السلع .. أنا شايف إن الجديد شكلها أحلى بكتير .. وكان قدامي أجيب القديمة وسعرها أرخص من الجديدة طبعاً لكن الحقيقة حسيت إن شكلها عامل زي التاكسي ومفيهاش لمسة إبداع واحدة!

2 - وسائل الأمان
الشكل الجديد فيه 2 وسائد هوائية .. Abs .. Ebd ... ده غير وسائل الأمان الأخرى داخل الكابينة زي قفل السنتر أوتوماتيك وإنتا ماشي .. زي مجموعة من الإنذارات والتنبيهات لو سبت نور العربية مفتوح أو المفتاح جوة العربية ... إلخ

3 - الوسع
سواء داخل الكابينة .. أو في الشنطة .. الوسع بسم الله ما شاء الله لا قوة إلا بالله .. تستحق التفكير جداً خاصة لو بتفكر في سيارة عائلية .. ودي أكتر الأشياء إللي شدتني ليها جداً .. والشنطة بتشيل حوالي 490 لتر .. وداخل الكابينة .. برجع الكرسي الأمامي للأخر والناس إللي ورا مهما كانت طويلة بسم الله ما شاء الله مش بتلمس الكرسي الأمامي أصلاً

4 - الموتور واستهلاك البنزين
بالنسبالي أنا مش بسمع صوت الموتور مطلقاً .. وفي مرة كنت مدوره .. ونسيت إني دورته .. وافتكرت العربية مبطلة وحاولت أدورها تاني! :d ..
استهلاك البنزين في الطرق السريعة حوالي من 6 - 7 لتر في ال 100 كيلو .. وداخل المدينة حوالي 8-9 لتر .. اقتصادية لأبعد درجة .. وبتشيل 92 مش محتاجة 95 ..
1500 سي سي .. أنا مش شايفه عيب .. أنا مش بشد ولا بعمل غرز ولا بجري .. والعربية أنا مش حاسس بفرق نهائي بينها وبين أي عربية 1600 .. على العكس هيخفف في استهلاك الوقود ..

5 - المظهر الداخلي
أنا حابه جداً .. وشايفه حلو .. وحاسس بالفخامة جوة .. بغض النظر عن الأراء .. ولكن أنا عجباني كدة .. ومش بحب مثلاً التابلوه إللي عامل زي الخشب .. برضه بيحسسني إني قاعد في ميكروباص

6 - الفرامل
بسم الله ما شاء الله عليها .. بتهدي العربية وبتقف في الوقت المناسب من غير متحس إنك بتنط لقدام زي عربيات كتير

7 - النقلات
في عربيات أوتوماتيك ركبتها قبل كدة كراكب مش سائق .. كنت بحس بالعربية وهي بتنقل بين النقلات إنها بتنتش كدة .. بسم الله ما شاء الله دي مش كدة ومش بحس إني وصلت لل 100 كيلو أصلاً .. وممكن أسرح لو مش مركز وأفضل معدي في السرعة. بس طبعاً بلحق نفسي عشان معديش ال 100 كيلو في أول ألف كيلو

9 - التكييف ..
جربته كام دقيقة أول مجبتها بس للتجربة .. وعلى سرعة واحد .. سقعت ومقدرتش أستحمل أصلاً

10 - كماليات وإضافات
السوبر صالون في نظري سعرها مقابل إللي فيها فهي تنافس كل من في فئتها وتتفوق عليهم من حيث الكماليات

11 - الكاوتش ..
في ناس بتشتكي منه .. بس أنا متعايش معاه ومش حاسس إنه وحش أوي كدة الحقيقة نهائياً

بالنسبالي إلى الآن شايف إنها صفقة رابحة جداً ولله الحمد ومقتنع بيها جداً .. وأنا مشيت بيها حوالي 600 كيلو

[asyl84]

بص ياباشا كل الناس اتكلمت فى جزء تبديل صنى بصنى شىء مش مستحب فعلااا وانا شايف ان النيسان الشكل القديم طوروا فى بعض اجزاءها لتصبح لها شكل جديد مع التغير فى حاجتين ماتور وصاج الفتيس الاتنين يابانى واعتقد نفس المواصفات فمش هتفرق بس الماتور بتاعها خلوة 1500 واحنا هنا فى مصر اصلا كفاية علينا 1100 مع الطرق الجميلة بتاعتنا اما ضعف الصاج بتاعها فلو قارنها باى عربية فى السوق مش هتكون اسواء منهم يعنى بالنسبة لتوافر قطع الغيار اكيد بكرة الى جى احلى معاها لانها انتشرت نيجى بقى لنقط نفسية انا كنت فيها من شهر بالظبط هو اشترى الشكل الجديد والا القديم كانت وجهة نظرى ان الشكل الجديد وحش من برة وطابلوة وحش وكراسى صغيرة عشان نعمل وسع داخلى وفتيس شكلة عجيب وفقيرة فى الشكل والاحساس بالمقصورة الداخلية ومش قادر احدد هويتها يعنى مودرن والا كلاسيكى متعرفش تحسها خرامنت طيب الشكل القديم كلاسيكى وجداااا تكنولوجيا اقدم من مقارنتها فى السوق ضيق كنبة خلفية احساس بالمقصورة افضل من الشكل الجديد بس الاهم من كل دة ومن مساوىء كتير بردو فيها هو ان هل ينفع ان اشترى عربية موديل 2013 شكل قديم والفرق بينه وبين الجديدة فى السوق السودة 3 الاف بالظبط الجديدة 102 والقديمة 98 وكان عندى الى هيعملى واجب فى الجديدة واستلام فورى واتحايل عليا كمان بس انا فضلت القديمة لانها صاحبة هوية كلاسيكية انا مش بحب الكلاسيك وكتير قالولى انت اكنك واقع فيها وكبيرة عليا بس هى كعربية صاحبة شكل على عكس الجديدة مش عارف هى جديدة والا قديمة ومستحمية والا برميل بيستعبط وطالع فى دور عربية وبالرغم من كل دة متنساش انها ازواق فى المقام الاول وثانيا هى من كتر ما شفتها مابقتش فى نظرى برميل لكن محصلش استلطاف بردو

[Ramy Rateb]

اللي مخليني متردد اني صرفت كتير عالعربية اللي معايا ومقتنيها (( اخرها كاوتشات ب 3000 ج)) وفرش جلد وإكسسوارات ... الخ
.........

بعد إذنك عايزك تجاوبني على سؤالين :
هو الصرف اللى تقصده بس على الاوبشن و لا كمان العربية تعبتك فى قطع غيارها و صيانتها ؟
و انت متضايق من الشكل القديم اللى معاك من ناحية ايه ؟ (السواقة او الفتيس او الوسع) ؟ و لا مجرد فكرة انك تركب عربية فى الضمان؟
أنا محتار برضه .. هل اشترى الشكل القديم و لا الشكل الجديد

[jojojojo]

انا رايي لو عايز تغير يبقي هات التيدا عربيه ممتازه وفيها مميزات الصني الشكل القديم من حيث الصاج والمكونات الياباني وفيها مميزات الصني الشكل الجديد اللي هي الوسع من الداخل واستهلاك البنزين والتكنولوجيا الجديده وغير ده كله عربيه تقفيل مكسكي مش مصري وشكلها جميل جدا طبعا الهاتش باك وهتبقي كده ارتقيت فعلا بس انك تغير صني قديم بالجديد مش هتحس بالفرق كبير وخصوصا ان القديم ممتاز وعربيتك فيها امكانيات كويسه بخصوص abs وبالتوفيق ان شاء الله

[miceg]

بص حضرتك أنا هاقولك المفيد من الآخِر :

الصني الجديدة تتميز عن القديمة في حجتين فقط : استهلاك البنزين و الوسع الداخلي ..

غير كده متتجبش ..

أحمد باشا هنا
نورت التوبيك ياحمد باشا
شكرا لمرورك الكريم

[miceg]

بلاااااااااااااااااااااااااااااااااااااااااااااااا اااااااش

عربيتك شكلها أحلى .... موتورها أقوى ومعاك abs خليك فى عربيتك واحمد ربنا

انا شخصيا مكنتش معجب بشكل الصنى القديم خصوصا من ورا فوانيسها البومبيه لكن بعد ما شفت الشكل الجديد حبيت الصنى الشكل القديم وحسيت أنها تحفة فنية بجد مش بهزر

وجهة نظر برضه وتحترم
بس الشكل فالاخر أزواق
نورت التوبيك