عداد البنزين بعد ما فولت

[abdulmoniem]

السلام عليكم ورحمة الله وبركاته

أنا عربيتي نيسان صني سوبر صالون 2013 (نيو صني) لسة ماشية حوالي 700 كيلو

دلوقتي أنا بحاول أعود نفسي أمون لما نص التانك يفضى .. فأروح أفول التانك .. بمون في وطنية

دلوقتي أنا بقول للراجل أول ما المسدس يفصل يشيله خلاص .. لأن في ناس بتستغبى وتقعد تزود يروح نازل على الصاج ومع الوقت ممكن يبوظ

النهاردة لما عملت كدة ..

اكتشفت حاجة غريبة .. إن عداد البنزين .. ناقصه شرطة مش مليان للأخر .. مع إني مفول لغاية ما المسدس ما فصل ..

أول مرة ألاحظ الحكاية دي؟

إيه رأيكم؟

[dodyam]

أعتقد ان المشكلة يا فى المسدس نفسه

أو بسبب ان زور تانك النيوصنى ضيق شوية

فبيخلى المسدس يفصل

[HaNo_ELBeh]

بص ياباشا انا امبارح فولت وكان ناقص حولى 20 لتر وبعدين المسدس فصل بس انا قولت للراجل يزود تانى وبعدين لاقيت البنزين هيتكب بره فقلت كفاية بس ماخدتش غير لتر واحد بس بس ممكن يكون فعلا الزور ضيق شويه وممكن يكون التنك كدة على الاخر

[moumen_hs]

معلوماتى من بتاع البنزينة أن معظم العربيات لما المسدس بيفصل بيكون لسة فى حوالى 10 لتر ممن تذودهم لحد الزور والموضوع دةحصل مع اخويا من يومين كام مغير عوامة البنزين علشان المؤشر مخرف فى سيارة نوبيرا ولما روحنا نمون للزور المسدس فصل وبعد كدة كمل لغاية 11 لتر بالزبط بس طبعا كل شوية يفصل المسدس ويزود تانى ولما سالنا الراجع أكد المعلومة دية فكل العربيات وموضوع الفصل دة علشان بالبلدى العربية بتشرق فلازم تحط البنزين براحة لو عايز التنك يملى للزور

[abdulmoniem]

معلومة إن المسدس لما بيفصل ده معناه إن لسة في 10 لتر دي جديدة عليا فعلاً

هو في جميع الأحوال أنا مش خسران حاجة معينة .. أكتر من إني هضطر أروح أموت تاني قريب قبل المعاد الطبيعي بس مخسرتش حاجة في الفلوس

[Dr_MaTrix]

ممكن تكون العوامة مثلا ....... بس اللى اعرفه ان الادق انك تمون لحد الزور ...كنت فاكر كده زيك فى الاول انه لحد تكة المسدس بس مش بتبقى ثابتة كل مرة ... الادق لحد الزرو

[BassamHafez]

الفكرة ان ضغط المسدس ساعات بيبقى قوي شويه فا بيفصل بدري عن المعتاد

[ahmed_hanafi]

الموضوع كله ببساطة ان ضغط المسدس بيكون عالي وبيمون بسرعة في الاول ولما بيفصل بيخلي الراجل يمون علي السرعة البطيئة لان المسدس بيكون فيه سرعتين

[Sehsss]

فعلا ضغط المسدس هو السبب وانا طول عمري بفول لحد الزور وما فيش مشاكل الحمد لله

[abdulmoniem]

جزاكم الله خيراً :)

[alex pharmacy]

انا عندي ملاحظة يمكن تطمنك شوية

انا معايا نيو صني وبرضه ماشية 600 كيلو

الشرطة الاولى في التانك مش بتطول عندي
يعني بفول العربية وامشي حاجة بسيطة الاقي المؤشر نزل شرطة

الموضوع ده حصل معايا مرتين من اصل 3 مرات فولت فيهم العربية
يمكن يكون ده نفس موضوعك بس يمكن عندي الراجل بيزود لترين تلاتة عنك

[abdulmoniem]

انا عندي ملاحظة يمكن تطمنك شوية

انا معايا نيو صني وبرضه ماشية 600 كيلو

الشرطة الاولى في التانك مش بتطول عندي
يعني بفول العربية وامشي حاجة بسيطة الاقي المؤشر نزل شرطة

الموضوع ده حصل معايا مرتين من اصل 3 مرات فولت فيهم العربية
يمكن يكون ده نفس موضوعك بس يمكن عندي الراجل بيزود لترين تلاتة عنك

جزاك الله خيراً :)

[youssef_u]

امبارح بردو بعد ما فولت كانت ناقصة شرطة و مش بخلي العامل يزود عشان هتفور و تقع عالبوية بتاعت العربية

[abdulmoniem]

امبارح بردو بعد ما فولت كانت ناقصة شرطة و مش بخلي العامل يزود عشان هتفور و تقع عالبوية بتاعت العربية

أنا برده بخاف من الحكاية دي جداً

[youssef_u]

أنا برده بخاف من الحكاية دي جداً

وانا خارج من التوكيل وقعت عالبوية في اول تفويلة بس رش عليها مية علطول

مفروض في الحالة دي ترش عليها شوية مية و متدعكهاش بأي حاجة و تسيبها تطير مع الهوا