انطباعي عن الصني 2013 واستفسار بسيط

[د.محمدعبدالعال]

الحمد لله يا جماعة اشتريت صني 2013 سوبر صالون .. وعاوز أشكركم لأنكم كنت سبب في شرائي للعربية دي ..
طبعا دي أول مشاركة ليا هنا في المنتدى بس أنا تقريبا قرأت معظم اللي كتبتوه عن النيو صني وانطباعي المبدأي عنها انها عربية جميلة جدا .. واسعة ومريحة وناعمة على الطريق خصوصا لو فيه تكسير في الطريق .. طبعا أنا لسه مجرتش سرعتها لأني يا دوب عملت 450 كم بس .. العربية امكانياتها كويسة بس فيها شوية حاجات كانت غامضة زي موضوع الانذار وعرفت انه موجود بفضل المنتدى هنا .. كمان موضوع الدلايات ده مدايقني جدا ف قررت اجيب دلايات واركبهم بنفسي زي ما قرأت في المنتدى هنا برضه

المهم فيه استفسار محيرني شوية .. من يومين ببص ورا بدالات البنزين والفرامل لقيت صدر الدواسة اللي قدام كرسي السواق مفيش فيها فيبر .. لدرجة ان عمود الدريكسيون باين واللباد اللي في صدر العربية باين برضه .. يا ترى كل النيو صني كده ولا عربيتي انا بس اللي نسيو يحطوا الفيبرة دي فيها ؟؟؟

[Bishoy.Girgis]

الف الف مبروك دكتور محمد .. ربنا يبارك لك فيها و يديك خيرها علي طول
بالنسبة للباد اللي في صدر العربية دد عزل العربية عن من الداخل عن الخارج من ناحية الموتور
بالنسبة لموضوع ظهور عمود الدركسيون انا مش فاكر المفروض يكون شكله ايه انما ممكن حضرتك في صيانة الـ 1000 كيلو تقول لهم في التوكيل علي الموضوع ده و برده استني رأي الاعضاء
و اهلا بيك بقسم نيسان

[د.محمدعبدالعال]

ألف شكر يا أ. بيشوي .. أنا عارف طبعا ان اللباد لعزل داخل العربية عن الموتور عشان السخونة .. لكن الفكرة هل اللباد ده وعمود الدريكسيون ده بيبقى ظاهر ورا بدالات البنزين والفرامل كده ولا المفروض فيه فيبر بيغطي الكلام ده بس مش موجودة عندي .. عموما انا ناوي فعلا اقولهم على الموضوع ده في صيانة الألف كيلو ..

[mohamed.rabea]

ألف مبروك العربية يا دكتور و ربنا يرزقك خيرها و يعيذك من شرها و انا برضه معايا العربية و عمود الدركسيون باين برضه و أعتقد انى قريت ان هى كلها كده و حد كمان معاه تيدا قال انها كده برضه بس فعلا شكلها مش ظريف

[د.محمدعبدالعال]

الله يبارك فيك يا أ. محمد .. وشكرا لذوق حضرتك ..

بالنسبة للشكل هي مش باينة قوي لكن الفكرة ان التراب ممكن يأثر على الحاجات اللي باينة دي أو يلاقي منفذ لحتت تانية جوه ويسبب مشاكل على المدى الطويل

[mhf_77]

اولا مبروك للعربيه والنيسان شركة محترمه والصنى سمعتها كويسه فى مصر
الصنى الجديده ( على حسب معلوماتى) انها تقفيل مصرى وبعض مكوناتها مصرى زى بعض الكاوتشات او السيور او الزجاج ( ده اللى قرأته) وعشان كده هتلاقى سعرها ارخص نوعا ما من مثيلاتها فى نفس فئتها واوبشانها ووسائل امانها
فده طبيعى ان التقفيل المصرى هتلاقى فيه ملاحظات وده عموما مش هيعيب العربيه بشكل واضح هى بس هتاخد فتره لغاية لما الموضوع يقدم وناخد فيه خبره وربنا يكرم ونوصل لصناعة سياراه مش تجميع بس والف مبروك مره تانيه وربنا يديك خيرها ويبعد عنك شرها

[khaled.elameer]

ألف مبروك يا دكتور و ربنا يرزقك خيرها و يكفيك شرها و لو سمحت إذا التوكيل عرف يغطى الجزء ده يا ريت تقولنا و شكرا

[د.هشام]

مليون مبروك
الموضوع دا موجود في التيدا
يبقى أكيد العربية مصممة كدة

[Sehsss]

كل النيو صني كده

[M.Nabeeh]

تقبل هذا اﻷمر

[Sehsss]

تقبل هذا اﻷمر

ياااااااا رااااااااااااااايق

[Dr.M_baz]

ألف مبروك ... وربنا يبارك لك فيها.

[ahmed452003]

كل انيو صني كده !!!

[HaNo_ELBeh]

انا عربيتى فيها كدة نفس القصة ومن الواضح ان النيو صنى كلها كده
ألف مبروك عليك العربية وربنا يكفيك شرها ويديلك خيرها
استمتع بيها العربية لسه جديده

[limo81]

الف مبروك وربنا يباركلك فيها
ونورتنا