تقريري المتواضع عن النيو صني بعد 2000 كيلومتر

[alex pharmacy]

السلام عليكم
ازيكم يا صقور
النهاردة كملت 2000 كيلومتر وتقريبا ممكن احكم على العربية من وجهة نظري المتواضعة

المميزات :
اكتر حاجة مميزة للعربية في وجهة نظري هو استهلاك البنزين ... ولسه كمان الاستهلاك حيقل بعد ال 5000 مقارنة باللوجان عشان مع اخوية النيسان اقتصادية جدددددا

العربية واسعة جدا من جوة وشنطتها واسعة وكرسي السواق مريح جددددددا وخصوصا اني من اصحاب القامات الطويلة والوزن التقيل فالموضوع ده يفرق معايا اوي

تسارع العربية كويس وخصوصا لو ماشي يعني لو قرصت عليها مرة واحدة استجابة العربية كويسة بس الانطلاق من الثبات اعتقد انه بطئ شوية

ارتفاع العربية عن الارض ممتاز يعني ببقى مركب 4 وبعدي على مطبات عالية والحمد لله العربية مش بتحك ودي ميزة مهمة جدا في شوارعنا الجميلة

فرامل العربية ماشاء الله ممتازة ولو اني لحد دلوقت ما اختبرتهاش في موقف صعب ولله الحمد بس حاسس ان ورايا رجالة :d

عزل العربية للصوت كويس



العيوب :
بصراحة اكتر عيب في العربية دي وهو عيب وحش جدددددا هو الصاج ... مهما قولتلكم الصاج خفيف قد ايه مش حتتخيلوا .... انا كل يوم بنزل الاقي العربية مخبوطة في حتة وهيا واقفة !!!! يا اما حد سند عليها وطبق الرفرف يا اما الكبوت نزل عشان العيال بيلعبوا كورة ونزلت على العربية ... حاجات المفروض انها ما تأثرش في العربية بس بتبهدل الصاج !!!!!!
يعني النهاردة كنت واقف في باركينج كارفور وتقريبا عربية كانت راكنة جنبي وفتح الباب بغباوة خبط في العربية المهم ان العربية بتاعتي اتبهدلت !!!!!! ده غير الاكصدام اللي نزلت من البيت لقيتة داخل جوة بشكل غريب تقريبا في حد ريح عليها بس تريحة تبهدل العربيةى بالشكل ده !!!
بصراحة موضوع الصاج ده ده اكتر حاجة مضايقاني

تسارع العربية من الثبات مش حلو

كماليات السيارة الداخلية متواضعة

الكاوتش سئ جدا وصوته عالي وبيلم زلط كتييييير كل شوية تسمع صوت الزلط وهو بيخبط في بيت الكاوتش وخصوصا على السرعات العالية


ثبات العربية كويس لحد 120 او 140 بالكتير ومن يومين كنت ماشي 120 والدنيا هوا حسيت العربية عايمة مني خالص لدرجة انها بتغير الحارة لوحدها !!!! فطبعا هديت السرعة شوية

دي ابرز ملاحظاتي عن العربية وبصراحة انا كنت من اشد المعجبين بالصني ومعتبرها صفقة كسبانة بس بعد تجربتي مع الصاج حسيت انه عيب يخليك تعيد التفكير قبل الشراء


وربنا يسترها وتكون دي اخر الاحزان عشان انا فعلا بدأت اتشائم منها :S

[blazer]

مبروك على العربيه ومتقفلش من العربيه لان مفيش عربيه كامله
بس ياريت تقول ال 20 لتر بيعملوا معاك كام كيلو فى السواقه العاديه على سرعه 100 فى طريق مفتوح

[mhf_77]

ياسيدى موضوع الصاج ده تقريبا فى معظم الجديد
انا معايا سيراتو بقفل الشنطه فحسيت انها علقت فبضغط عليها من فوق طبقتها وواحد جارنا يبفتح باب عربيته كانت راكنه جانبى خبط فى بابى علم عندى زى مايكون خبطه بشاكوش كبر دماغك ده العادى دلوقتى

[SonaSteel]

الف الف مبارك علي الصني .... ربنا يرزقك خيرها ويكفيك شرها :))

[esam_ayad]

شكرا علي التقرير. وربنا يباركلك في العربيه.
لكن حضرتك ماإتكلمتش عن عفشتها اللي ناس كتيره قالو مش حلوه وناشفه بس مش ناشفه قوي.
وماتكلمتش عن معدل استلاك البنزين في الصفيحه.

[hossam_elwani]

الف مبروك عليك ... كل ملاحظاتك سليمه وجزئية الصاج بالتحديد + (الشكل من الخلف ) هما الى خلونى اصرف نظر عنها


احنا عارفين ان صاج العربيات الجديده كله خفيف لكن للاسف الصنى اخف كمان وكمان منهم كلهم

[haitham fares]

انا كان معايا لوجان وكان الصاج بتاعها اضعف بكتيييير ..بس للامانة كانت العفشة انعم بكتير

[Dr.M_baz]

ألف مبروك ... وربنا يبارك لك فيها.
أنت ممكن مبدئيا تغير الكاوتش بماركه نظيفه ... هيحسن ثبات العربيه وهترتاح من مشاكل الكاوتش إللي فيها.

[S O P H O S]

مبروك
والمميزات اقوي فراي

[miceg]

الف مبروك
بس الصاااااااااج بالحال ده حرام بجد
أكيد كل واحد مننا معرض أنه يركن العربية في الشارع راكن تحت البيت او فمشوار او تحت الشركة
معقول الصاج ده ورق بيطبق ؟
ده على كده الشكل القديم برقبتها فموضوع الصاج ده

[ahmed_hanafi]

الف مبروك علي السيارة وتقرير ممتاز.....وعموما مفيش عربية كاملة من كل حاجة

المهم انت تكون مرتاح للعربية بقدر كبير

[john55]

يا باشا كل العربيات الجديده كدا انا معايا اكسنت بخاف اريح جسمي علي الباب ليطبق لجوه دي نظريه لتخفيف احمال العربيه علشان توفير البنزين وربنا يحفظتا من الحوادث يمتص الصاج قوه الصدمه فكل الجديد كدا وشكرا

[canner]

الف مبروك و ربنا يديك خيرها و يكفيك شرها متهيألى ان كل الاعضاء المحترمين ما سابوش حاجة الا و اتكلموا عنها و زى ما قالوا مافيش عربية كاملة من كلة يعنى لو لقيت عربية فيها المشاكل اللى انت شايفها محلولة مش ح تجبها علشان سعرها عالى و دى مشكلة جامدة جدا من وجهه نظرى

[Sehsss]

للأسف علشان من ضمن الحاجات اللي اتعملت في الشكل الجديد علشان تقليل الاستهلاك عن الشكل القديم (الصاج الخفيف) علشان الوزن

[haissam24h]

الاول كان الصاح سمك 1 ملى
الوقتى بقا 7 من عشرة ميلى وده طبعا عشان العربيه تبقى اخف واسرع وعارفين طبعا ان كل البلاد الطرق محترمه وقياده امنه مش بياخدو فى الاعتبار سكان العالم الثالث