العربية لسة جديده لانج واتحكت

[motor82]

السلام عليكم
يا جماعة انا مخنووووووق جدا ومش طايق نفسي.. انا ربنا كرمني الحمد لله ولس جايب تيدا جديدة.. لسه مبقلهاش تلات شهور.. النهارده الصبح في اتوبيس كسر عليا جامد جدا ومفيش مكان اهرب منه. حطيت ادي على الكلاكس و وقفت وده ولا هو هنا وحكلي المرايه الشمال كلها..

اتكحتت وفي حتت بقى لونها ابيض عشان البطانة البيضاء اللي تحت ظهرت .. شكلها وحششششش جدا ومضايقني ودمي محروق مش قادر اقولكوا اد ايه..

مش عارف اعمل ايه ومش عارف اصلحها ازاي .. مش عارف في حاجة تداريها ولا اغيرها ولا اعمل ايه

مستني ردكو

[heldin_67]

الحمد لله ان جت علي كده


تذكر دائما ان سيارتك هي ملك لك من الداخل فقط و من الخارج هي ملك للناس

[Dr.A.Nabil]

ماعلش وحصل خير
بكره تتعود على كده

[hossam_elwani]

هيا دى مشكل الزيرو فى مصر بالذات

لنا الله

وكبر مخك

العربيات بتيجى لينا من بره متقطعه مفيهاش ولا خربوش وحتى الكشافات مابتكونش صفرا زى عندنا عجبى على ناس مصر وشوارع مصر وجو مصر !!!!!!!!!!!!!!!!!!

[aldesha989]

صلى على النبى وروق ما دايم الا وجه الله كلنا لها

كل واحد بينزل بعربيته مغسوله بيرجع بيها ما شاء الله كان عربيه رمل قلبت عليك وانتا ماشى
كل واحد بيروح يرش عربيته بيبقى عارف انه كلها اسبوع وايد الشعب كله هتطولها

عادى يعنى امبارح نزلت شويه علشان مخنوق ما بقتش عارف ارجع :d

اصل مسمار المقص طار والكوبلن ملص :d والحياه فل :d

[horas3000]

طب يا باشا كتر خير الدنيا
بقالك 3 شهور عربيتك فابريكه اللهم لا حسد
انا عربيتي تاكس حكهالي يوم ما استلمتها و يوم ما رخصتها واحد لبس فيا من ورا بهدلي الاكصدام

عموما امرها سهل ان شاء الله
ممكن تفك الكڤر بتاع المرايا و ترشه
او تغطيه بستكر و ليكن كاربون فايبر او حاجه و يكون للمرايتين
ك new look للعربيه

[miceg]

قدر الله وماشاء فعل
والله مهما كان السواق كلنا ماشيين بقدر ربنا
ده نصيب نصيبك هيصيبك لا مفر له
اصبر واحتسب
وإليك النصيحة
لا تأخذ الموضوع تحدي مع الأتوبيسات بالذات هو وبتوع الميكروباصات
ولو لقيت أتوبيس بيلف يمين اوعى تمشي شماله
والعكس
لو لقيت أنوبيس بيلف شمال اوعى تيجي يمينه
لانه بيقفل عليك ولا قدر الله ممكن تلاقي جمبك كله مخبوط بسبب دخولك معاه الملف
واخيرا ربك هو الستار
ولازم تاخد شر عين الناس والحمد لله انها مجتش فيك ولا في أهل بيتك

[horas3000]

شوف اهو كمان

http://www.nilemotors.net/Nile/343897-a.html

[khaled_bibo]

يا باشا متشلش هم ديه علامه اي عربيه جديده لازم تاخدها بكره تتعود على كده و الحمد لله انك سليم

[asyl84]

بص هقولك حاجة الناس هنا قالتهالى وجربتها وادينى بجرب اهو ..سيبها تاخد العين دة الحل وبعد شوية نبقى نشوف الحلول لكن حتى لو لقيت حل ماتنفذوش دلوقتى لانى عملت زيك كدة وحليتها جاتلى فى الفانوس لازقتة وسيبتة بعد ما كنت هجيب واحد جديد واهو الحمد لله بدل ماكانو بيقولولى العربية الجديدة ياعم بيقولولى انت لحقت يابنى اول ما بسمعها برتاح اووى الصراحة

[horas3000]

طب خد دي يمكن تنسي

Comic #118237 - Egypt's Sarcasm Society.

[jojojojo]

قدر الله وما شاء فعل انا اول مستلمت العربيه واحد معاه فيات دخل فيا من ورا وبهدلني الاكصدام خالص بس قلت قدر الله وما شاء فعل وكويس انها بتيجي في الحديد وبالنسبه لشكل الكافر فيه كافرات نيكل بتتحط علي كافرات المرايا لونها فضي وديه كمان بتحمي كف المرايا من الحاجات ديه وخاصه اننا في مصر معظم الوقت بيبقي في زحمه فبتحمي المرايات من الحكات والله الموفق

[Land_Cruiser]

ما تزعلش نفسك و عامه الموضوع بسيط و يتوقف علي حجم الخرابيش ممكن تفك ال cover و ترشه بنفس لون العربيه لو الخرابيش عميقه او يتعمل ب واكس مثلا و لو مش نافع خالص غيّره و هات واحد جديد و رشّه . ان شاء الله بسيطه و بعدين العربيه لسه جديده فمش هيبقي في فرق في اللون

[Ahmed_selmy]

عادى يا باشا حتى علشان العين

[dodyam]

الحمد لله وقدر الله وماشاء فعل
وسيبها تاخد العين
ولو عاوز تعملها ممكن بفرشة رفيعة و تشترى نفس اللون و تعملها بايدك
أو تروح لحد من بتوع تصليح الخرابيش هيعملها بمبلغ اى كلام