فاميه النيو صني

[heba_hassan]

لو سمحت أنا عاوزه أسأل عن تفييم العربيه !!!
أنا معايا نيو صني EX Salon وعاوزه أفيم الزجاج نتاعها بس خايفه من المرور - في ناس قالتلي المرور دلوقتي مش بيبص للحجات دي ولو حد رخم المخالفه 50 جنيه بس !
الكلام ده صح وإنتوا إيه رأيكوا ؟؟؟

[the_air_devil]

أول حاجة , الفيميه بيدي شكل حلو وجذاب للعربية , مافيش هنا مشكلة

لكن خلينا نتكلم بالعقل والمنطق ... اللي سايق وراكي مش هايشوف حاجة وهاتعرضيه بشكل مباشر للخطر لو حصللك طارئ يخليكي تتوقفي فجأة أو تغيري حارتك مرة واحدة وهو هايلبس في اللي انتي نجحتي تتفاديه, لأنه مش هايشوف حاجة من خلال الإزاز بتاعك


تاني حاجة, الفيميه مخالفة وتجب إزالته , وحتة الخمسين جنيه دي بيضحكوا عليكي , حضرتك هاتضطري تشيليه غصب عنك لما تيجي تجددي ترخيص العربية من تاني , وطبعاً هايكون متكلف ولما يتشال هايبقى منظره سيئ جداً


ممكن تدفعي نفس الفلوس اللي شايلاها علشان الفيميه في تركيب واقي ضد الكسر للزجاج ... أو تركبي عليه فيلم عازل حراري هايقلل دخول حرارة الشمس للعربية ويوفرلك بنزين ويحافظ على التكييف ... وهايغمق الإزاز شوية ويكون لونه مايل للأخضر أو الأزرق ... وبالشكل ده مش هايعمللك مشكلة في المرور وهايديكي ميزة مش موجودة في الفيميه


وبعدين خلينا نتكلم بصراحة , العربيات الفيميه بتجيب شبهة للي راكبها ومعظم الناس بيقعد يبحلق جواها يشوف مين قاعد جواها وبيعمل إيه .. ياريت نبعد نفسنا عن مصادر القلق والشبهات والمشاكل


تحياتي

[Land_Cruiser]

التفييم مخالف . لو حضرتك وقفتك لجنه هتديلك مخالفه و هتخللي حضرتك تشيليه ده غير ان ممكن الضابط و لا أمين الشرطه يستظرف او يستخف دمه و حضرتك كل ما تلاقي لجنه هتلاقي نفسك قلقانه . البديل ممكن تركبي افلام الوقايه من الشمس و دي ما بتغمقش الزجاج فمش مخالفه و في نفس الوقت بتمنع أشعه الشمس و لو غاليه ممكن ستائر لا تحجب الرؤيه و ان كانت مخالفه برضه بس ممكن يعدوها و في ناس عرفت تثبتها علي الرخصه

[MOK3336]

لكن خلينا نتكلم بالعقل والمنطق ... اللي سايق وراكي مش هايشوف حاجة وهاتعرضيه بشكل مباشر للخطر لو حصللك طارئ يخليكي تتوقفي فجأة أو تغيري حارتك مرة واحدة وهو هايلبس في اللي انتي نجحتي تتفاديه, لأنه مش هايشوف حاجة من خلال الإزاز بتاعك
تحياتي

ده علي أساس ان مفيش عربيات نص نقل متقفله في الشوارع و ان برضه مفيش عربيات نقل و يمكن كمان مفيش عربيات 4x4

وبعدين المفروض بقي بلاش التخلف بتاع المرور ده
أبسط مثال لو واحد لازق ستيكر علي العربية يبقي غلط لكن لو عربية مطعم مثلا بتلاقي العربية عليها ستير بإسم المطعم و خلافة

ياريت يفهموا بقي ان العربية ملكية خاصة انا حر اعمل فيها ايلي عايزة في حدود الادب و الاخلاق
و متيقلي من ابسط حقوق الواحد انه يركب فاميه لعربيته و لما بقي المرور يبقي يمسكه و هو بيعمل حاجة غلط فيها يبقي يعمل ايلي هو عايزه

[Sehsss]

لو حابة تفيمي يبقى أول درجة فقط ودي بتشيل جزء بسيط من الحرارة وأنا عن نفسي عاملها من سنتين وبادخل كماين كتير وعادي، بس طبعا لما أفحص العربية هاروح لبتاع فاميه أخليها يشيلها

[youssef_u]

انا كمان بفكر اكمل الازاز اللي قدام و يكون نفس الدرجة بتاعت فيميه الفبريكة

[heba_hassan]

لو حابة تفيمي يبقى أول درجة فقط ودي بتشيل جزء بسيط من الحرارة وأنا عن نفسي عاملها من سنتين وبادخل كماين كتير وعادي، بس طبعا لما أفحص العربية هاروح لبتاع فاميه أخليها يشيلها

شكرا يا جماعه علي ردودكم

أنا بفكر اركبه عشان الشمس بتتعبني جدا
انا كنت بفكر اركب الدرجه التانيه في الفاميه مش الغامق قوي وبرضه مش عايزه الفاتح قوي حاسه انه مالوش لازمه الفاتح قوي دا ولا ايه رأيكوا ؟

[mohamed_selim]

العازل الحرارى حتى لو شفاف فهو ملصقات و لو الظابط حابب يسخف هيعامله زى الفاميه بالظبط ....

[Sehsss]

شكرا يا جماعه علي ردودكم

أنا بفكر اركبه عشان الشمس بتتعبني جدا
انا كنت بفكر اركب الدرجه التانيه في الفاميه مش الغامق قوي وبرضه مش عايزه الفاتح قوي حاسه انه مالوش لازمه الفاتح قوي دا ولا ايه رأيكوا ؟

عن تجربة الدرجة الثانية بتتوقف في الكماين، لو الشمس بتضايقك ممكن تركبي ستائر كبس، ودي بتتشال بسهولة لو داخلة على كمين

[Dr'AhmZZong]

أنا جايب فعلا الستاير الكبس دييييه مفيدة جدا ما شاء الله ..

[د.محمدعبدالعال]

فيه ستاير كبس بتبقى للأربع أبواب والزجاج الخلفي ودي بتتشال بسهولة لو داخلة أي كمين .. وكمان ممكن أي سروجي يفصلها ويعملها عمولة لو ملقيتيش ستاير كبس للنيو صني .. بس اعتقد انها موجودة في التوفيقية .. وأنا شخصيا كنت مركب ستاير كبس في العربية الفولكس ودخلت كمين الضابط كان فاكرها فاميه ولما قلتله انها ستاير وشيلتها قدامه مشاني عادي ومقالش ولا نص كلمة

وممكن تركبي معاه عازل حراري أول درجة هيقلل حرارة العربية بشكل كبير جدا

[beshoyyy]

تحياتي للجميع
انا اول مره بصراحة اسمع عن الفيلم الحراري او العازل الحراري يا ريت حد يشرحة و عاوز اعرف تكلفتة
شكرا للجميع