العربيه بتسخن

[Mohamed Abosef]

معايا صني ٢٠٠٩ و بتسخن مني علي الطريق و الميه بتنقص من القربة بشكل ملحوظ
يا ريت لو حد يفيدني اعمل ايه

[tarekMANDOUH]

حضرتك ممكن تروح التوكيل او مركز خدمة يكشف على دورة التبريد عشان اكيد فية تسريب مدام القربة بتنقص

[john55]

ممكن مشكله في الثرموستات

[Mohamed Abosef]

هو الفروض القربه دي غطاها جواه جوان ولا لأ؟

[Ramy Rateb]

لو المياه بتنقص فى الريداتير لازم تبص على الزيت لان ممكن يكون جوان وش السلندر ضرب (لا قدر الله) .. كمان حاول تبص على الشكمان و العربية دايرة و كمان تبص تحت الكبوت كويس و تحاول تشوف هل فيه تسريب ولا .. حاول تحجز فى التوكيل على الاقل تعرف القصة إيه و بعدين شوف هل تعملها عندهم و لا عند حد بره.
بالتوفيق ان شاء الله

[mem]

طالما حضرتك بتقول الميه بتنقص بشكل ملحوظ
يبقى اكيد فى تسريب راجع على الخراطيم وانت مدور كده وبص شوف فى ميه بتيجى من اى خرطوم ولا لا
وبص على الردراتيير لو كله تمام
شيك على الغطا بتاع الرادرتيير بس والعربيه بارده وفكه وشوفه من جوه هل الكاوتش بتاعه سليم ولا لا
لان ممكن يكون مقطوع وبيكون فيه تنفيس وهو ده اللى بيخلى المياه تنقص والعربيه تسخن
وبعد كده روح لاى حد ياخد لك هوا على شان اكيد الدوره خدت هواا
وكله هيبقى تمام ان شاء الله وتبص على المراوح بتشتغل ولا لا

[lidosasa]

الأفضل فى حالة موجهة أى مشكلة فى العربية إننا نبدأ فى التفكير فى المشاكل بشكل تصاعدى . يعنى الحاجات البسيطة الأول يعنى نبص الأول لو فيه تسريب فى دورة التبريد أو إنسداد

[Dr'AhmZZong]

أول حاجة حضرتك تعمل كبس للدورة و شوف في تسريب ولا لأ ..

غير غطا الريدياتر بواحد اصلي ..

شيك على ثرموستات الكوعة ..

غير المية كلها ..

آخر حاجة تكشف عليها وش السيليندر ..

[Mohamed Abosef]

الحمد لله الحرارة اتظبطت لما اخدت الهواء من الريدياتير واضح ان دي كانت المشكلة
وشكرا

[egyptiandiver]

ألف مبروك