اكلت 3 مطبات بالنيو صني! خللي بالكم

[elmoski]

والله البلد دي بقت تقرف و الواحد مش عارف يقول ايه..

المهم امبارح ونا علي طريق الساحل رايح مارينا وبعد الحمامات بحوالي 5 كيلو كدة كنت ماشي علي 120 تقريبا و فجأة علي بعد 50 متر كدة لقيت حاجات سودة علي الارض فلميت نفسي بسرعة الحمدلله واذا بي الاقي 3 مطبات محترمة علي الطريق و اللي يغيظ انهم ورا بعض مباشرة يعني بين كل واحد و التاني 5 متر تقريبا ... المهم وقفت و لاقيت ناس مش عارف مين دول بس شكلهم هما ملاك المطبات فقوتلهم يا جماعة حرام طيب حطوا اي نور او يافطة حتي قبل المطبات دي لان لو حد ماشي بسرعة ممكن يتقلب ( علي فكرة انا روحت مارينا الاسبوع اللي فات و الطريق ما كانش فيه المطبات دي يعني دول لسة جداد لانج) ... قالولي طيب ادينا فلوس وحنا نركب نور المهم سبتهم و مشيت... المهم قضيت يومي ونا راجع بقي بالليل طبعا طريق الساحل ضلمة كحل زي مانتم عرفين و الواحد ماشي بنور العربية فقط و طبعا انا مش مدي خوانة قمت لابس ال 3 مطبات هما هما بس في الطريق النازل علي اسكندرية بس ربنا ستر كنت ماشي علي 90 وقتها مع اني طول الطريق ماشي 140 - 160 ( ربنا بيحبني والله) طبعا قلبي اتقطع لاني مش عارف ايه اللي كان بيحصل وقتها في العربية و ماكنتش سامع غير اصوات ترزيع و كلت واحد ثم التاني ثم التالت وكل مطب البسة اسمع رزعة بنت تيييت في العربية تخيلو ... المهم من غيظي اول ما دخلت علي لجنة الحمام وقفت علي جمب و ندهت للعسكري اللي كان موجود و قلتله ان في ناس عاملة مطبات في عرض الطريق قام قالي دي المحافظة اللي عاملاهم قلتله ازاي يعني ده مفيش حتي نور ولا لوحة تحذير قبلهم قالي حاضر هبقي ابلغ.....

انا بس علشان مطولش عليكم حبيت احظركم وبالله عليكم اللي رايح الساحل يبقي ياخد بالة ... وربنا يستر و مايكونش حصل لعربيتي حاجة لحسن العملية مش ناقصة فلوس و العربية لسة زيرو .. و ربنا يسترها علينا جميعا و يكفينا شر الطريق

[hossam_elwani]

حاجه تقهر بجد وتخلى الواحد يقرف من ركوب العربيه والمشى فى السكك الفاشله دى

حسبى الله

[ابو لؤى]

حلوه ادينا فلوس واحنا نعمل دى ماحنا بندفع ضرايب يابلد

[M I D O]

لا حول ولا قوة الا بالله ربنا ستر الحمد لله بس المشكلة لو واحد و اسرتة وماشين بسرعة ولبسوهم ممكن لاقدر الله يتسبب في كارثة ولو المحافظة الي حطاهم لازم اشارات تحذيرية و الامور بتاع هات فلوس دة انا لو مكانك كنت شتمتة يعني غلطان وكمان بيبجح المهم قدر الله وما شاء فعل وحمد الله علي سلامتك

[ZOoOoMA]

انا لسه راجع من الساحل من تقريبا اسبوع و مكنش فيه المطبات ديه لحقو يعملوها لا اله الا الله ان شاء الله عربيتك تكون كويسه بس و ربنا يسترها

[2CODE]

يا اخي ده كويس ان مكنش معاك حد ورا في العربية لان صدقني عربياتنا السيدان الواطية دي لما بناخد مطب بتترزع جامد على الارض ولو كان معاك حد كانت هتترزع رزعة رهيبة جداً يمكن مكنتش تطلع منها سليمة

انا بسبب المطبات والمواضيع دي قرفت من عربيتي وبقيت بكره اركب العربية من كل شويه صوت تيت تيت تيت في العربية مع كل مطب

الواحد يعمل لك مطب هضبة والله هو بيكرر بناء الاهرامات مره تانية ولا ايه مش عارف ويفرح لما عربية تحك ولا تاكلة وتتخبط على الارض

ملحوظة : نصيحة اكشف على العربية في التوكيل - مستويات زيت - تسريبات - مساعدين ..... الخ مهم جداً

[hossam_elwani]

يا اخي ده كويس ان مكنش معاك حد ورا في العربية لان صدقني عربياتنا السيدان الواطية دي لما بناخد مطب بتترزع جامد على الارض ولو كان معاك حد كانت هتترزع رزعة رهيبة جداً يمكن مكنتش تطلع منها سليمة

انا بسبب المطبات والمواضيع دي قرفت من عربيتي وبقيت بكره اركب العربية من كل شويه صوت تيت تيت تيت في العربية مع كل مطب

الواحد يعمل لك مطب هضبة والله هو بيكرر بناء الاهرامات مره تانية ولا ايه مش عارف ويفرح لما عربية تحك ولا تاكلة وتتخبط على الارض

ملحوظة : نصيحة اكشف على العربية في التوكيل - مستويات زيت - تسريبات - مساعدين ..... الخ مهم جداً

لا الى معاه عربيه مستريح ولا الى معهوش مستريح حاجه بجد بقت متعبه

[monamize4]

ملحوظة : نصيحة اكشف على العربية في التوكيل - مستويات زيت - تسريبات - مساعدين ..... الخ مهم جداً

+11111
اكشف ع العفشة كلها و قيس كل الزيوت و الميه كمان احتياطى و خلى ميكانيكى يبصلك ع الكارتيرة و الاسكاترة من تحت و اتاكد ان العتب سليم و اكشف ع الجنوط ا اذا كانت تعوجت و لا لأ

[miceg]

قدر الله وماشاء فعل
والحمد لله إنك بخير
والمطبات بقت عاملة زي واحد بيدعي ومادد أيده فالسماء
دي مبقتش مطبات دي بقت ......................

[S O P H O S]

دي طرق سفر !!
لا حول ولا قوة الا بالله

[youssef_u]

معلش قدر الله ما شاء فعل واكشف عالعفشه بالذات

[john55]

للامانه الغلط علي الناس اللي بتعمل المطبات مش ممكن اي بلد في العالم تكون المطبات بانواعه موجوده زي مصر مطبات من كاوتش العربيات مطبات خرسانه مسلحه وطالع منها حديد العربيه تاخده كانها وقعت من جبل مطبات اسفلتيه هرميه كانه داخل علي موجه بحر وتسمع منها احلي مزيكا من تحت العريبه دا انا دخلت علي مطب قبل مدينه طنطا مكون من تلات مطبات ورا بعض زي رياضه الفروسيه الفرس ينط حاجز ورا حاجز لحد مايعديهم مين العبقري اللي عمل المطبات دي كفايه واحد لكن تلاته ورا بعض دي معجزه للعلم انا مهري زيك مطبات وبكره اليوم اللي بسافر فيه وقول يارتني كنت جبت عربيه عاليه زي اللوجان او التريوس بس 99% مش من العربيه لكن من الطرق اللي هتجيب تصلب شرايين للعفشه وربنا معانا

[windofchange]

اهم شيء وانت بتفرمل قبل المطب تسيب فرامل وانت طالع علي المطب علشان الضرر اللي يحصل ميبقاش ضرر اكبر لانك لو دوست فرامل وانت بسرعة علي المطب بتبهدل مقدمة العربية الصدر بالاكصدام والعفشة كلها