استهلاك البنزين نيسان صنى 2007

[wama00]

رجالة نيسان
ديه اول مشاركة ليا فى قسم النيسان واتمنى تقبلونى عضو جديد معاكوا
انا لسه جايب نيسان صنى 2007 اوتو ex وقولت اشوف معدل استهلاك البنزين اد ايه لاقيت الرقم غريب شوية
انا عملت 140 كم ب 20 لتر بنزين يعنى الصفيحة عملت 140 كم بس (كدة اللتر عمل فى حوالى 7 كم)
مع العلم ان 95% من المسافة ديه كانت جوا البلد ومشغل التكييف

ارجو الافادة ولو فيه مشكلة تبقى فى ايه؟؟

[tarekmomo]

بتمشى فى اماكن زحمة يبقى معقول

[Ramy Rateb]

ده احد المشاكل اللى ملهاش حل فى الشكل القديم .. غول بنزين داخل البلد .. لو جربت تحسب على طريق سفر هتلاقى المعدل اتحسن ل ١٢ : ١٥ كم/لتر حسب السرعة و التكييف

[mikology]

انا لسه شاريها بردو بس مانيوال و ربنا يستر :)

[ahmedteam]

لازم تحسب الاستهلاك صح الاول علشان تقرر اذا كانت بتاكل بنزين ولا لأ هقولك ازاى يا باشا :

علشان تحسب استهلاكك مظبوط يبقى تفول العربيه عند علامه معينه(اول تكه من مسدس البنزين مثلا) و تطلع مشوار طوالى مفتوح 50 كم مثلا و سرعتك 90 - 95 كم / ساعه بدون تكييف و بدون حرق على الغيارات rpm 2.5 /3 وترجع لنفس البنزينه تفول تانى عند نفس العلامه (اول تكه) و شوف كام لتر و المسافه و انت هتعرف الاستهلاك الصحيح

[D.Tarek]

فعلا استهلاك البنزين عالى جدا انا لسه عامل 1125 كم وحطيت يمكن 200 لتر

[mikology]

فعلا الاستهلاك عالى حبتين
انا مشيت 60 كيلو ب 10 لتر
هو التانك مش 40 لتر ؟؟

[wama00]

فعلا التانك 40 لتر بس للاسف!

[mikology]

الحمدلله الاستهلاك مظبوط - العوامه هى اللى بتهيس
مشيت 80 كيلو ب 7.5 لتر - طريق مفتوح على وقفتين فى النص

[hossam eldeen]

تانك النيسان 40 لتر ؟؟ اعتقد انه 50 مش 40 .. افيدونا يا صقور احسن انا متفاجئ..

[wama00]

40 لترررررررررر

[khaledshaheen]

لو قرصت شوية على مسدس البنزين وطلعتو لفوق عشان مايفصلش واستنيت على البنزين شوية شوية لغاية لما يرقد من الفوران بتاعه التانك حيملى معاك حوالى 43 الى 44 لتر يعنى بالعافية

[khaledshaheen]

اما بالنسبة لإستهلاك البنزين لو سألت على العربيات التانية سواء كورى أو يابانى أو حتى صينى وفى نفس ظروف التشغيل يعنى سواقة فى وسط البلد والزحمة والحر بتاع الصيف والتكييف شغال حتلاقى المعدلات قريبة شوية ويعدين الأوتوماتيك استهلاكه أعلى من المانيوال شوية

[khaledshaheen]

انا ظروف شغلى فى الزحمة والتكييف وبعمل حوالى من 160 الى 170 بالعافية ومن غير التكييف وبسوق فى الليل والجو كويس ومن غير حرق بعمل فى الصفيحة حوالى من 170 الى 190 تقريبا أما فى السفر و الطريق الطوالى بالتكييف حوالى 220 الى 240 ومن غير التكييف 250 الى 270

[khaledshaheen]

على فكرة سيارة حضرتك 2007 هات منظف الإنجيكشن وحطه مع التفويلة الكاملة هيحسن من أداء العربية شوية يمكن الرشاشات مسدودة من البنزين لأن طوال مدة السيارة قبل حضرتك يمكن صاحبها مكانش مهتم بالموضوع ده