شوية اسئلة عن النيسان صني؟

[TeRoOo]

السلام عليكم ورحمة الله وبركاته

عربيتي نيسان صني 2009 ex العربية بعد ال 120 مبتعرفش تتحكم فيها وبتلاقيها مش ثابتة وعلي الطريق السريع عموما بعد ال 90 بتحس انها بتغير من حارة لحارة لوحدها بحس ان الدركسيون خفيف يعني بفضل ضاغط عليه علشان ميتحركش فهل ده حاجة طبيعية ولما تيجي تفرمل علي طريق اسفلت فيه صوت بيطلع من عند العجل اللي قدام زي صوت الزقزقة كده وروحنا للتوكيل وقال التيل سليم ياريت لو حد عنده اجابة للاسئلة دي يقول...!

[lamada]

لا طبعا مش طبيعى لازم تشوف ايه السبب و تعالجه

[eng.mohabdo]

غالبا ممكن تحتاج تظبيط زوايا

[AhmedNaeem]

غالبا محتاجة ظبط زوايا
او في حاجة في العفشة

[ramymechanics]

أنا معايا نفس العربية وثباتها ما شاء الله كويس لدرجة انى مرة سبت الدكسيون وانا ماشى على 140 والعربية متهزتش نهااااائى الحمد لله .. بس المشكلة انى مش لاقى التيل الأصلى بتاع الفرامل خالص برة وللأسف معنديش وقت الصبح حجز واروح التوكيل

[Ramy Rateb]

هو حضرتك روحت توكيل إيه ؟ لأن اللى بتحكى عنه غير طبيعى تماماً و المفروض أن التوكيل يحس بكده و يحدد المشكلة .

[Ahmed_Rahem]

ممكن علبة الدركسيون، هى الى ممكن تعمل كدة

[TeRoOo]

هو حضرتك روحت توكيل إيه ؟ لأن اللى بتحكى عنه غير طبيعى تماماً و المفروض أن التوكيل يحس بكده و يحدد المشكلة .

مودرن موتورز وهما عملو تشيك علي العربية كلها بس انا مقلتلهمش لاني فاكر ان ده حاجة طبيعية وخصوصا ان العربية بالجنط الاستوك اللي هو الطاسات

[TeRoOo]

أنا معايا نفس العربية وثباتها ما شاء الله كويس لدرجة انى مرة سبت الدكسيون وانا ماشى على 140 والعربية متهزتش نهااااائى الحمد لله .. بس المشكلة انى مش لاقى التيل الأصلى بتاع الفرامل خالص برة وللأسف معنديش وقت الصبح حجز واروح التوكيل

انا علي 120 بكون مكلبش في الدركسيون خايف للعربية تحود غصب عني

[Ramy Rateb]

مودرن موتورز وهما عملو تشيك علي العربية كلها بس انا مقلتلهمش لاني فاكر ان ده حاجة طبيعية وخصوصا ان العربية بالجنط الاستوك اللي هو الطاسات

لو تقدر تروح و تكشف على العربية فى السبع أو أوتوايجيبت يبقى أحسن على الأقل تعرف فيها إيه بدل ما تدوخ مع الصنايعية .. هو حضرتك بتعمل للعربية الصيانات الدورية بأستمرار و لا ؟

[ahmed salah90]

لا العربية ثبات اكتر من رائع
اكشف على العربية كالاتي من وجه نظري و عن تجربة
1- اكشف على ضغط الاطارات ( علشان لو في فرده زايده عن فرده العربية هتميل ناحية الرده اللي ناقصه ) و جرب ماكنش يبقى
2- اضبط زوايا العجل و بعدين قارن
3- اضغط على اجناب السياره من فوق المساعدين و را و قدام ولو لاقيت مثلا ادام مساعد خفيف و مساعد تقيل يبقى الخفيف لازم يتغير و ورا نفس الحوار علشان كده العربية ممكن تعوم معاك على الطريق
في اسبا تانيه زي جلب المقصات تعويمه برضوه و بيض الديريكسيون و حاجات تانيه بس دول اللي انا اعرفهم و ربنا يكفيك شر طريقك

[sunny2010]

اول حاجة يا باشا اتأكد من ان ضغط الكاوتش مظبوط لان لو فرده من اللي قدام ناقصة جامد العربية هتحدف ، في حالة ان الكاوتش تمام فالاحتمال الثاني تكون عايزة ضبط زوايا و ان شاء الله مش هتزيد عن كده و هتبقي تمام