الهجوم علي الصني

[خالد عادل]

بقالي فترة متابع المواضيع اللي بتنزل علي المنتدي وشايف ان في كمية هجوم شديدة جداً علي النيسان صني الايام دي وموضوعات كتير بتتكلم عن ردئتها وسوء تصنعيها وانها مايتجريش وان التوكيل من اسوء التوكيلات الموجودة في مصر ... ودة عكس الكلام اللي كان موجود في المنتدي من قبل كدة واللي خلي ناس كتير تقتنع بالعربية دي وتشتريها وانا واحد منهم .... واللي بسبب الكلام اللي منتشر الايام دي في المنتدي عن مدي سوء العربية خلي الواحد بردوا يتلكك للعربية علي اي حاجة ونفسيتة تشيل منها وعاوز يبعها ويجيب حاجة تانية .... انا شايف ان الموضوع نفسي من الدرجة الاولي يعني ممكن الواحد يحس انة راكب احسن عربية في الدنيا لانها معملتش معاة مشكلة وممكن نفس العربية عملت مع واحد تاني مشاكل بقت اسوء عربية في الدنيا يعني من سابع سما الي تامن ارض مع انها نفس العربية. خلاصة الموضوع عاوزين نتفق علي قواعد عامة نقيم بيها العربيات ويراعي فيها كل حاجة الكماليات ووسائل الامان والتوكيل والاسعار وهو دة اللي الناس تمشي علية واي حاجة خلاف كدة يبقي حالة شاذة وقسمة ونصيب ودة فعلا حصلي ان بعد اسبوع من شراء العربية الكونتات قفل والدركسيون مبيتحركش والعربية مبدورش وكلمت التوكيل وحلوا الموضوع والحكاية انتهت لحد كدة مش شرط ان كل العربيات التانية فيها نفس المشكلة الا اذا اتكررت مع ناس تانية ومعتقدش انة حصل في حالتي ...... في ناس بتبقي في حيرة من امرها في اختيار عربية مناسبة تشتريها وهي رايحة تدفع مئات الالوف من الجنيهات وعاوزة حد يسمعها كلمة عشان تتشجع وتاخد القرارفبتدخل علي المنتدي بتاعنا ويتشوف الموضوعات الموجودة ومنها واحد مطلع عربية ما السما وممكن تكون هي مش احسن اختيار وواحد تاني عامل موضوع عن عربية مطلع فيها القطط الفطسة عشان مشكلة واجهتة مع ان ممكن تكون العربية دي احسن اختيار .

[hamaka]

النصيحة اللى بقيت بقدمها لأى حد ، حاول على قد ما تقدر تتفادى أى عربية لعبت فيها اليد المصرية....

[dr.hazem]

بغض النظر عن مواضيع الهجوم لكن للاسف اصبح واقع ملموس مفيش اسبوع بيعدي من غير منلاقي موضوع حد بيشكي منالعربيه بغض النظر عن المشاكل المشتركه او الفرديه...
فيب الواقع يتحمل مالكي السياره جزء من المشكله لانه قاعدينلها في الساقطه واللاقطه

في مشاكل في كل العربيات لكن مش كل الناس بتتشكى وتتكلم عالعربيه والتوكيل ... الخ


ياما عربيات بتغير طنابير وفتيس ومشاكل لا حصر لها ففين المشكله ؟؟

تحياتي

Sent from my tab using Forum Runner

[toty_305]

-يا جماعه دي نيسان و لا أعتقد أنهم هيضحوا بسمعه نيسان و الياباني

[wama00]

انا من كتر ما شوفت المشاكل اللى هنا كرهت العربية وانا لسه شاريها ههههههههههههههه

[Ahmed Amin]

عكس الكلام اللي كان موجود في المنتدي من قبل كدة واللي خلي ناس كتير تقتنع بالعربية دي وتشتريها وانا واحد منهم .... واللي بسبب الكلام اللي منتشر الايام دي في المنتدي عن مدي سوء العربية خلي الواحد بردوا يتلكك للعربية علي اي حاجة ونفسيتة تشيل منها وعاوز يبعها ويجيب حاجة تانية .... انا شايف ان الموضوع نفسي من الدرجة الاولي .

ياباشا أنت بتتكلم في أيه ؟؟
جانب نفسي أيه اللي أنت شايف الموضوع منه.!

الناس بتقول أحنا بنيجي ندوس فرامل العربية مش بتقف إلا بعد فترة,,
ولازم بنقي عاملين حسابنا من بدري قبل ما ندوس فرامل,
هوا انت راكب عربية موديل 1980 عشان تعمل الحاجات دي في عربية 2013 ؟

وباقي الناس بتتكلم عن الصوت المتكرر والمزعج اللي بيطلع من الطنابير وتيل الفرامل,

ونيسات نفسها, أعترفت إن العربية فيها عيب صناعة وأستدعت عدد كبير من العربيات اللي فيها مشاكل في الفرامل واللي وصل ل 22 ألف عربية.! وحضرتك بتقول العيب نفسي !!

نيسان تٌعلن عن إستدعاء صني 2013 بسبب عيب بالمكابح
http://www.nilemotors.net/Nile/359665-2013.html (نيسان تٌعلن عن إستدعاء صني 2013 بسبب عيب بالمكابح)


وأحنا مش أقل من الهند ولا حتي أوروبا, وباقي الدول اللي في أفريقيا اللي أتعمل فيها Recall ل 22 ألف عربية.



ياريت متخليش حبك للعربية يخليك تدافع عنها دفاع أعمي وانا كلامي مفهوش تجريح لحد,
كل واحد بيحب عربيته علي عينينا وعلي رأسينا ولو مش بيحب يتقال عليها كلام وحش برضه علي عينا وراسنا.
لكن الكلام اللي ناس بتتكلمه والحاجات اللي بتشتكي منه هيا حاجات حاصلة في عربياتها وملموسة ومحسوسة كل يوم.


أخر حاجة,,
مش عشان أنا بحب نيسان, ونيسان أسم كبير وتوكيل له سمعه والكلام دا,
أسكت بقي وأتعايش مع العربية وهيا فيه عيب بدل ما أروح وألزمهم بتصليح عيب الصناعة, لأن العربية دي انا دافع فيها فلوس والمفروض أخد منها أداء وأحساس العربية الجديد,,
وعشان تبقي درس ليهم أنهم يقفلو العربية زي الناس وبضمير ويعالجو دا في الموديلات الجديد من نفس العربية ومتتكررش تاني, يا إما ميقفلوهاش في مصر....

لو حد يفتكر النيسان اللي قبل الصوبر صالون والشكل الجديد دا اللي كانت تقفيل ياباني مكنش حد بيسمع صوت منها ولا تسمع عنها نص مشكلة مش مشكلة واحدة.
من ساعة لما الشكل القديم بدأ يتجمع في مصر, بدأت مشاكل الضفيرة تظهر لأنها "تصنيع مصري", ودلوقتي مع الشكل الجديد, مشاكل الفرامل حدث ولا حرج..


طبعاً تاني الموضوع ملهوش علاقة بالعامل النفسي اللي بتتكلم عنه,

اللي بيشتكي بيشتكي من مشكلة عنده, وأنت لو مش عندك مشكلة أحمد ربنا إن عربيتك فلتت وسليمة,,
وإعرف إن الكلام اللي في القسم مش لتشويه سمعة عربيتك لسمح الله,!!!
دا عشان في ناس زيك دفعة دم قلبها في عربية زيرو عشان ترتاح وبتدور علي حل لحل مشاكلها,, ومش عارفين يعملو أيه من المشاكل اللي بيقابلوها.. فراعي شعورهم..!!

ولو عايز تحس بجو المشكلة أقرء الموضوع دا, وأنت تحس باللي بيعاني من المشكلة دي بيبقي أحساسه عامل إزاي,,
http://www.nilemotors.net/Nile/364916-a.html

[tarekMANDOUH]

انا معايا الشكل القديم 2012 وماشاء الله العربية ممتازة باستثناء العفشة النشفة وحتى لما حصلت مشكلة في العربية ولقيتها مش مظبوطة وبتطفي مني ومبتسحبش روحت توكيل السبع وغيرولي ضفيرة الكهرباء ومن غير ولا مليم عشان في الضمان طبعا .
في توكيلات تانية كتير ممكن يبقا عارف ان في عيب صناعة في عربيتو وميقلش علية غير لما الضمان يخلص
شهادة حق توكيل نيسان من افضل التوكيلات المحترمة الموجودة في مصر

[eidrabie]

اكيد الناس اللي معاهم صني الجديو زيي وبيشتكوا من مشاكل في عربية المفروض انها زيرو دا بعيد كل البعد عن النفساويات او التشويه لاسم العربية
العربية مشاكلها كتير حضرتك ممكن تلاحظ ده في المنتدي لكن المشكلة الاكبر ان نيسان مش عايزه تعترف ان في مشاكل عامة زي موضوع صفارة التيل الامامي عشان دي ممكن تكلفهم استدعاء العربية وطبعا التكلفة كبيرة عليهم
لكن ان شاء الله احنا هنحاول نجمع كل مشاكل العربية ونكلم الشركة بخصوص المشاكل دي ولو مفيش استجابة يبقي هنتشكي لحماية المستهلك
اكيد اللي جايب عربية زيرو جايبها عشان بيعد عن صداع مشاكل المستعمل بس لما تلاقي المشاكل دي في عربية جديدة بجد تبقي تحرق الدم

[حنفى حسن حنفى]

أولا لا يوجد هجوم علي السيارة لان غير منطقي ان إنسان يشتري عربية بقيمة 100000 جم أكثر ويهاجم نفسه
ثانيا كل الموضوعات نتيجة تجربة وشكاوي من مالكي السيارات نفسهم وليس لمجرد رأي عابر لأي شخص

[limo81]

سبحان الله...
كل حاجه هنا فى مصر بتبقى إنت وحظك من أول ما تتولد لغايه ما تتخرج وتشتغل الى الممات

الحمد لله انا مستلم عربيتى من شهر 12 اللى فات يعنى ماشى فى التامن دلوقتى
الحمد لله العربيه ممتازه فى كل شئ بالنسبه لى وسافرت بيها أكثر من مره لوحدى أو كامل العدد واشتريت حاجات تقيله وحملتها فى العربيه لدرجه الشنطه والكنبه والكرسى الامامى

الحمدلله مفيش أى أصوات والفرامل ممتازه

وفعلاً الفرامل حسب قوه ضغط القدم عليها
وهذا للأمانه والله .... مش عشان العربيه عندى
وللأسف فعلاً فيه ناس عندها مشاكل ربنا يعينهم وتتحل ان شاء الله التوكيل محترم وبيساعدك

فيه ناس كتير بتعيب ع العربيه وهى لا تملكها فى الأساس

[ramymoharram]

بصراحة أنا معايا العربية بقالها شهرين وشايف ان الناس بتتلكك زيادة عن اللزوم......العربية أحسن من حاجات كتير تانية في السوق وعربية ناعمة بس أان شايف ان الناس عاوزة عربية ملهاش عيب ودا مش موجود يا سادة.....حتي ال bmw فيها عيوب ومحدش بيتلكك......بلاش نسوء سمعة العربية بتاعتنا لأنها فعلا عربية نظيفة ولازم نقارن دايما الحاجة بسعرها.....

[shady_hamdy]

العربية معايا بقلها 7 شهور و مفيهاش غير عيب التيل و انا شايف ان دة حاجة متخلنيش اشوف العربية وحشة

[hamaka]

إلى كل السادة الملاك اللى معندهمش مشاكل فى العربية أو عندهم مشاكل بسيطة متأثرش على رأيهم فى العربية ، احمدوا ربنا انه نجاكم من المشاكل التانية عشان فى ناس فعلاً بتعانى من مشاكل كتير اللى كل أسبابها تقريباً متمثلة فى التقفيل المصرى اللى حسب المزاج و كل واحد و حظه ، و دى حاجة معروفة عن التقفيل المصرى و أعتقد معظم الناس متفقين عليها ، اللى عنده مشاكل ربنا يعينه على حلها قبل انتهاء الضمان و اللى معندوش الحمد لله ان كان ده نصيبه و يحاول يساعد أخوه اللى عنده مشاكل بدل ما يقوله أنا معنديش حاجة و العربية زى الفل (أنا مش بهاجم حد خالص على فكرة عشان محدش يفهم كلامى غلط...رمضان كريم)