مشكله في الموتور بعد تنظيف البوبه

[mony10]

الساده الاعضاء السلام عليكم
واحد صاحبي معاه لانسر وكان عنده رعشه في الموتور لما يغير من d لـ n او لما يشغل المكيف كان ممكن العربيه تبطل المهم جاب اسبراي لتنظيف بوابة المنافو وفك ماسورة العمه ورش السبراي والعربيه مبطله وبعدين وهي شغاله وعربيته اتظبطت جدا.
حب ينقل التجربه بتاعته معايا وفك ماسورة العمه من عند المانفو ورش السبراي ونظف البوابه كويس وكان فيها فعلا رواسب كتيره جدا وكانت النتيجه كالتالي:
- ارتفاع rpm الى 1.8 ولما ينزل يبقى 1.2 دي كدا اقل حاجه واحيانا يعد يطلع وينزل مابينهم كاني بزود بدواسة البنزين.
- لمبة الموتور منوره باستمرار ومش بتطفي حتى جربت اني افصل كابل البطاريه لمده وركبته تاني علشان لو تعمل رست مفيش فايده.
- تحسن ملحوظ جدا في سحب العربيه اجمالا فكرتني لما كنت لسه شريها زيرو.
العربيه نيسان صني موديل 2004.
بعد كدا كنوع من التجربه صاحبي عمل الموضوع في عربيه تالته وكنت موجود معاه وهو بيجرب اول مابدأيرش السبراي نفس اللمبه نورت في التابلوه وبعد ماخلصنا فضلت منوره راح فاصل كابل البطاريه وركبه تاني بعد شويه اللمبه مش بتنور تاني وبيقول ان العربيه سحبها اتحسن بشكل ملحوظ برده.
ارجو الاعضاء الكرام المساعده لو حد جرب الموضوع دا قبل كدا او حد عنده افكار او حل للموضوع وشكرا.

[wama00]

متابع باهمية

[hossamalsadik]

عاوز يمسح الأرور عند حد عنده جهاز كشف الأعطال للكمبيوتر يونت وهتطفى المبه أن شاء الله

[SAMEH_FOUAD]

هو حضرتك لما نظفت البوابة بالمنظف , الرواسب دية اتعلقت على حساسات ( maf- tps ) وواضح جدا من تعليقة ال rpm عندك , شوف ياباشا فك الmaf ونظفة وياريت معاة بلف الايدل وان شاء الله كلة هيتظبط

وطبعا ال tps مابيتنظفش

ملحوظة : بعد عمل التنظيف بالطريقة دية ( ان يتم التنظيف والمانيفولد فى المحرك ) لازم تغير البوجيهات لانها بتكون خدت كل الشوائب اللى نزلت من المحرك وبتتركز على شمعة الاحتراق وبتقل كفائة الاشعال الخاصية بيها

[mony10]

عاوز يمسح الأرور عند حد عنده جهاز كشف الأعطال للكمبيوتر يونت وهتطفى المبه أن شاء الله

متشكر على محاولتك للمساعده بس المشكله مش في اللمبه بس المشكله الاكبر ان الموتور عدد لفاته زادت باستمرار عن الطبيعي وكمان احيانا تزيد وتقل كانك عمال تدوس بنزين وتسيب ودي مشكله اكبر من اللمبه.

[mony10]

هو حضرتك لما نظفت البوابة بالمنظف , الرواسب دية اتعلقت على حساسات ( maf- tps ) وواضح جدا من تعليقة ال rpm عندك , شوف ياباشا فك الmaf ونظفة وياريت معاة بلف الايدل وان شاء الله كلة هيتظبط

وطبعا ال tps مابيتنظفش

ملحوظة : بعد عمل التنظيف بالطريقة دية ( ان يتم التنظيف والمانيفولد فى المحرك ) لازم تغير البوجيهات لانها بتكون خدت كل الشوائب اللى نزلت من المحرك وبتتركز على شمعة الاحتراق وبتقل كفائة الاشعال الخاصية بيها

متشكر ليك جدا على الرد الجميل والمنطقي دا بس اعتقد ان فك المانفو ممكن يكون صعب شويه ايه رأيك لو احاول اككر عملت التنظيف تاني بشكل ادق شويه وهو راكب وبعد كدا ابص على البوجيهات زي مانصحتني.
استفسار لو سمحت هو بلف الايدل موجود فين علشان لو اقدر اوصله علشان انظفه؟

[mony10]

هو حضرتك لما نظفت البوابة بالمنظف , الرواسب دية اتعلقت على حساسات ( maf- tps ) وواضح جدا من تعليقة ال rpm عندك , شوف ياباشا فك الmaf ونظفة وياريت معاة بلف الايدل وان شاء الله كلة هيتظبط

وطبعا ال tps مابيتنظفش

ملحوظة : بعد عمل التنظيف بالطريقة دية ( ان يتم التنظيف والمانيفولد فى المحرك ) لازم تغير البوجيهات لانها بتكون خدت كل الشوائب اللى نزلت من المحرك وبتتركز على شمعة الاحتراق وبتقل كفائة الاشعال الخاصية بيها

هل تنصح بموضوع التنظيف دا خصوصا ان فيه فرق ملحوظ في عزم وسحب الموتور كانها رجعت زي ما كانت لسه جديده

[monamize4]

متابع معاكوا يا جماعة

[mem]

متابع

[mony10]

دي كانت المراسلات بيني وبين المهندس سامح وكانت على الخاص علشان هو من قسم هوندا فحطيتها هنا علشان الناس كلها تعرفها
لمشاركة الأصلية كتبت بواسطة mony10


متشكر ليك جدا على الرد الجميل والمنطقي دا بس اعتقد ان فك المانفو ممكن يكون صعب شويه ايه رأيك لو احاول اككر عملت التنظيف تاني بشكل ادق شويه وهو راكب وبعد كدا ابص على البوجيهات زي مانصحتني.
استفسار لو سمحت هو بلف الايدل موجود فين علشان لو اقدر اوصله علشان انظفه وهل تنصح بموضوع التنظيف دا ولا لأ خصوصا ان فيه فرق كبير وملحوظ في سحب العربيه؟

ودا كان رده عليا
هو المفروض ياباشا ان المانيفولد يتم تنظيفة كل فترة على حسب الاستخدام , لان دة بيساعد فى الحفاظ على الحساسات وعملها بكفاءة

لو كررت موضوع التنظيف تانى , يبقى لازم الاول تنظف بطريقة صحيحة الاول عشان تلاقى النتيجة كويسة

- وهية ان لازم المحرك يكون بارد نسبيا

- تجيب قطع قماش نظيفة وترشها اسبراى ( injection cleaner ) وتمسح بيها المانيفولد كويس

- يتم فك حساس ال maf وتنظيفة جيدا

- يتم فك بلف الايدل وتنظيفة

- تنظيف فلتر الهواء

- لو رشيت بداخل البوابة اسبراى يبقى لازم تغير البوجيهات

شوف دائما بيكون مكانهم على البوابة او بجانبها انا مش حافظ اوى مكان ماتور النيسان بس صاحبى معاة نيسان صنى هبصلك عليهم فين واقولك

ولما تشيل اى فيشة لازم الاول تكون شايل كابل البطارية عشان ال ecu مايسجلش اى اخطاء

[mony10]

المهم عملت اللي قاله تقريبا فعلا كان فيه لسه شوائب كتيره جدا تم تنظيفها وبعد التقفيل كانت النتيجه:
- تحسن اكتر في سحب العربيه.
- مازالت المشكله موجوده.
المهم الميكانيكي اقترح اني اروح لكهربائي يكون عنده كمبيوتر والسبب ان الموتور مظبوط في المشي وحتى وهي واقفه المشكله كلها ان rpm عدد لفاته عاليه.
عرضت الموضوع على المهندس سامح على الخاص ومستني رده

[mony10]

آخر الاخبار للناس اللي متابعه كشفت على العربيه عند مركز صيانه الكهربائي مع الميكانيكي مع بعض والعربيه على الكمبيوتر وكانت بتدي مشكله في idl valve يعني بوابة الاكسيراتير بالعاميه لانها كهرباء في النيسان لكن بعض العربيات التانيه او القديمه بتكون عن طريق واير المهم بيحاولو انهم يظبطو الـ rpm ويطفو لمبة الموتور في التابلو المهم عن طريق الكمبيوتر بيقدر انه يتحكم في الـ rpm يزوده ويقلله فكان اقل حاجه بيوصلها 1.1 لكن كان بيستجيب في الزياده والميكانيكي كشف على البوابه وهي راكبه مفيش فايده كان آخر حاجه عملوها انهم عملو ريست للـ ecu علشان لو هو اللي معلق وبعد كدا لمبة الموتور طفت وبعد شويه رجعت نورت تاني ومفيش اي استجابه.
التفسير للي حصل ان عملية نظافة البوابه الكهرباء تتم بالمسح بمنديل او فوطه نظيفه بدون اي اضافات وتكون بالراحه لعدم اتلاف الدائره الكهربائيه انما اللي انا عملته كنت بستعمل منظف وم المسح كان بيطلع معايا حاجه شبه الشحم الخفيف او الزيت لما يتركن ويلم تراب وكنت فاكر ان دي رواسب لازم تتشال وكانت الغلطه لأن الماده اللي كنت باشيل فيها دي كانت عباره عن كاربون مغطي الدائره الكهربائيه للبوابه وتقريبا ليه دور في التوصيل كمان في الدائره الكهربائيه للبوابه.
المهم قالولي دي لازم تتغير بس سيبها يوم او اتنين لما المنظف اللي انت استعملته يبنش ممكن يكون هو اللي عامل المشكله وكنت انا بقالي اكتر من يومين فكان الرد انها لازم تتغير وجاري السؤال عليها استعمال موجوده فين وتتكلف كام.
انشاء الله بعد التركيب هعرفكو النتيجه

[mony10]

في نقطه نسيت اقولها اني مقتنعتش بموضوع الكاربون دا لأن دي كانت حاجه جديده عليا فالراجل جابلي عوامة بنزيزن قديمه من عنده شبه بتاعتي اللي بتكون عوامه مع الطرمبه مع الفلتر في قطعه واحده قالي دي سبب عطلها ازالة نفس الماده من على البورده بتاعتها والدليل قالي شايف البورده نظيفها ازاي قولت تمام دعكها بصباعه طلعت ماده زي اللي كانت بتطلع من عندي بس على خفيف شويه قالي دا سبب عطلها

[mony10]

الجديد لو حد مهتم سالت في التوكيل قالي مش موجوده ومش بتطلب لأنها مش بتنزل في النيسان المصري بتكون واير مش كهرباء والحل في الاستعمال وبعد لف كتير واسئله اكتر وتجارب برده اشتريت واحده وركبتها ومازالت تحت التجربه والحمد لله ال rpm اتظبط وسحب العربيه جميل والحمد لله على كل شئ