مشكلة في نيسان صني 95

[zoromeme]

السلام عليكم,

أنا عندي مشكله في نيسان صني موديل 95 العربية كويسة جدا في كل حاجة و مريحاني جدا بس اللي محيرني اني بسمع كل الناس اللي تعرف العربية دي أنها موفرة في البنزين جدا و في المنتدى هنا بعض الأعضاء بيقولوا أنها في الصفيحة بتمشي 300 كم و 700 كم في التفويلة
طيب أنا عندي لما بفول 145 كم كحد أقصى بيبقى فاضل أخر شرطة فقط هل ده طبيعي ولا أنا عندي مشكلة و بتستهلك بنزين زيادة .... و خصوصا في أزمة البنزين اليومين دول أكيد عرفين الحال عامل إزاي :)

[mony10]

اكيد طبعا في مشكله عندك انت لما بتفول بتحط تقريبا 40 لتر لو هي فاضيه ازاي يعملو معاك 145 كيلو بس اكيد كمان الموتور عندك مش مظبوط خالص والعربيه ماشيه او واقفه وانت اكيد هتحس بالموضوع دا.
الاستهلاك اللي عندك حتى في المواتير الكبيره مش بتستهلك كدا عربيتي القديمه كانت 2306 cc كانت بتعمل في 40 لتر حوالي 450 كيلو مع العلم اني كنت بشغل المكيف كتير وكنت بقرص على الغيارات وبجري ودا يزود الاستهلاك بشكل كبير

[mony10]

لو ممكن تعرفنا معلومات اكتر عن الموتور كام cc وكاربراتير ولا انجيكشن

[zoromeme]

العربية كاربراتير 1300 cc , ما هو أكيد كدة في مشكلة بس العربية ماشية كويس و صوتها هادي جدا و مفيش مشكله محيراني غير موضوع أستهلاكها في البنزين ده .....

[mony10]

كدا المشكله عندك في الكاربيراتير ودا حله تشوف ميكانيكي كاربيراتير او يكون متخصص فيه يزبطهولك وكنت سمعت ان فيه حاجه اسمها طقم اصلاح بتتباع للكاربيراتير بس مش متاكد فيه للنيسان ولا لأ والحل التاني تشتري كاربيراتير نيسان استعامل بحاله جيده وتركبه عندك والحل الاخير ودا هيكون اكيد مكلف انك تروح التوكيل وهما اكيد هيعرفو المشكله فين وحلول الاصلاح اللي ممكن تتم وياريت تعرفنا وصلت لايه كنوع من مشاركة تجربتك علشان نستفاد منها لو حد حصله او عنده نفس المشكله