عربيتى مركونة فى التوكيل من سنة و 9 شهور

[eng.octooo]

السلام عليكم

امممم مش عارف ابداء منين بس هابداء ب احلى ناس انا عارفتهم من هنا وخصوصا قسم نيسان وانا قصرت معاهم احمد تى فى و محمد فوزى ورماح ومحمد وكريم واحمد .... وناس كتييييييييييييير والله

ندخل بقى فى الموضوع انا عربيتى نيسان صنى ex موديل 2010 اوتوماتيك عاملة 54 الف كيلو
الموضوع بداء من سنة و9 شهور رحت اعمل الصيانة لل 40 الف كيلو واغير زيت رجعت والعربية فيها صوت غريب شوية زنة كدة زى ما يكون فية موتوسيكل ماشى معايا والصوت بداء يزيد المهم رجعت للتوكيل تانى ( مودرن موتورز اكتوبر ) دخلوها كشف وقالوا العربية عايزة بلية ومساعدين وشوية حاجات كلهم فى العفشة دخلنا فى الفين وشوية قالو على حسابك لان الحاجات دى مش بتدخل الضمان قلت كام يوم اظبط الميزانية واغيرهم
المهم مشيت وبعدها بيومين العربية جاى ارجع بيها لقيت الفتيس مش بيجيب ال r المهم طفيتها ودورتها ورجعت عادى وانا فى مشوارى عادى خالص لقيت العربية فيها رعشة فظيعة رحتلهم وقالو دى مشكلة فى الفتيس ومحتاج يتغير بس صوت الزنة كان اختفى

دخلت العربية واستلمتها بعدها ب 4 ايام عمل وقالو انهم غيروا الفتيس واخدت ورقة بالكلام دة واتكت فى كتيب الصيانة تغيير فتيس والعربية لا يوجد بها مشاكل
والمشكلة اتحلت كمان يومين رجعت نفس الزنة القديمة مع صوت قوى فى علبة الدركسيون والعفشة اكنها مش موجودة رجعتلهم وعملت مشكلة مع مدير الفرع ( اسمة حاجة حمزاوى )
قالى العربية محتاجة فتيس تانى واحنا مش هانقدر نغيرة على حساب التوكيل تانى بس انا ممكن اعملك خدمة وادلك على واحد فى الحرفيين وتجيب منة الفتيس استراد وانا اركبهولك واضمنهولك ( دة شغل ورشة على ناصية الطريق ) المهم رفضت وعملت مشكلة وقلتلة انا سجلت كلامك على الموبايل وهابعتلة للمصنع وهما يتصرفوا معاك ( وانا فعلا سجلتلة كلامة تانى بعد ما حسيت انة بيستعبط دخلت تانى وفتحت التسجيل فى التليفون وسالتة على التفاصيل وخليتة يحكى الكلام دة تانى وسجلتة )
المهم اترج واتلخبط فى كلامة ودخل العربية الكشف تانى وخرجها ب انها محتاجة قطع غيار تمنهم 28 الف يعنى زود حاجات من عندة
قلتلة طيب اكتبهملى فى ورقة وسيب العربية عندك
ودة حصل وطلعت على قسم الشرطة ( الشيخ زايد) وعملنا محضر معاة الورق الى معايا بدخول العربية وانهم غيروا الفتيس والعربية كانت محتاجة حاجات ب الفين وشوية وبعدها ب 420 كم فقط الميزانية وصلت ل 28 الف بعد ما هددناة
معناة ان فية تزوير وحطيت اسمة فى المحضر هو والمشرف علية من المصنع
ورحت حماية المستهلك وعملنا نفس الكلام
وطلعت لجنة من حماية المستهلك وجامعة عين شمس او القاهرة مش متذكر وذكروا فى تقريرهم
ان الفتيس لم يتغير ( وهو مدينى ورق ب ان الفتيس اتغير على الضمان) والعربية ما عملتش حادثة والصيانات كلها داخل التوكيل والعربية فى الضمان وفيها عيوب من المصنع ...

المهم ومن يومها جلسات فى المحكمة ومحاضر وادينى معاهم والعربية مركونة فى التوكيل من سنة و9 شهور وصدت والكاوتشات باظت وبقت كهنة ولا ليها اى لازمة

النهاية : ان التوكيل والمصنع معاملتهم وضمانهم ( اسف على اللفظ )بس زبالة وياريت محدش يمسح الكلمة دى لان هما يستاهلو اكتر من كدة

والورق والمحاضر ودفتر وايصالات الصيانة وجلسات المحكمة موجودين معايا لو حد مشكك فى كلامى هارفعهملة سكانر
معلش بقى تعبتكم معايا فى الكلام الكتيير دة . بس ان شاء الله خير

[essamcne]

الله يعينك و يصبرك و يجبلك حقك

[Msanad]

ممكن معلومات اكتر عن القضية
هل كلمت نيسان مصر ونيسان اليابان
حماية المستهلك عملت ايه بعد كده - هل كان فيه مساومة من التوكيل او مركز الخدمة ؟
القضية وصلت لاية ؟

[eng.octooo]

رحت مصنع نيسان فى اكتوبر هنا وكلامهم كان فتى وانى عملت حادثة بالعربية ومصممين انى انا الى غلطان والعربية محدش بيسوقها غيرى انا ووالدى ومحصلش فيها اى حكة فى الرصيف حتى علشان نتكلم على حاجة

هما من 6 شهور اتصلوا بالمحامى وقالو اننا نتنازل عن المحاضر ونقسم تكلفة التصليح ما بينا بس انا رفضت رفض قاطططططع لما واحد مدير مركز صيانة عملاق يقولى ادلك على واحد فى الحرفيين تشترى منة الفتيس وانا اضمنهولك بيقى المصنع دة هو وارثة عن اهلة مش بيشتغل فى مركز للصيانة !!!!!! الشخص دة اسمة حاجة حمزاوى

المهم اخر حاجة وصلنالها اننا حطينا اسم المدير الاقليمى اليابانى لنيسان فى القضية وطلبنا تغيير العربية او دفع تمنها ولسة البلد مقلوبة والقضية كل شوية بتتاجل

[MUSTFA]

ربنا يعينك عليهم

[Ahmed_Ramadan]

لا حول و لا قوة إلا بالله .... يا ريت حضرتك ترفق تقرير حماية المستهلك وورقك و ننشر القضية على النت ... ده إحنا نعملهم فضيحة المركز و التوكيل و نيسان مصر كلها

[Dr/ P.K.Sh]

ربنا يعينك

[a_arazik]

لا حول ولا قوة الا بالله الناس معندهمش ضمير والله

[eng.m7md.ali]

هو ده توكيل نيسان اللي الكل بيشكر فيه؟؟؟!!!!!!!!!

عز العرب عمره مايعمل كدة وانا اللي كنت فاكره اوسخ توكيل في الدنيا

[eng.octooo]

بكرة ان شاء الله اكون فى المكتب وارفعلكم الصور

[mohammed dodda]

لا حول ولا قوة الا بالله...واتفق مع رأى العضو المحترم اللى نصحك بنشر القضية على النت وفضح المصنع والوكيل..لازم الحرامية دول يعرفوا ان فلوسنا مش حرام

[Ahmed_Ramadan]

هو ده توكيل نيسان اللي الكل بيشكر فيه؟؟؟!!!!!!!!!

عز العرب عمره مايعمل كدة وانا اللي كنت فاكره اوسخ توكيل في الدنيا

متفتحش صدرك أوى كده

عز العرب ده يهودى .... أنا فاكر إن كان فيه عضو معاه جين 2 خربوهاله

[2CODE]

هو ده توكيل نيسان اللي الكل بيشكر فيه؟؟؟!!!!!!!!!

عز العرب عمره مايعمل كدة وانا اللي كنت فاكره اوسخ توكيل في الدنيا

لا ابداً محدش دلوقتي بيشكر في توكيل نيسان خالص لعلمك

وجت كملت عليهم نيسان صني 2013 !!!!!!!!!!!!!

[M_Marwan]

طب الناس هنا فى المنتدى بتشكر اوى فى نيسان ؟ ايه ايلى حصل ؟؟

[2CODE]

طب الناس هنا فى المنتدى بتشكر اوى فى نيسان ؟ ايه ايلى حصل ؟؟

ادخل قسم نيسان وانت تعرف دلوقتي ايه رأيهم كفاية رابطة متضرري الصني الجديدة ومنهم واحد صاحبي