مشكلة جيربوكس أوتوماتيك للتيدا 2010

[Horsepower]

السلام عليكم جميعا,
صديق لي حصلت له مشكلة مع عربيته التيدا موديل 2010 إن الجيربوكس الأوتوماتيك إتكسر ... يا ريت لو حد يعرف منين ممكن نجيب جير بوكس إستيراد ولو يعرف أسعار وصنايعي شاطر للتركيب.
شكرا جزيلا

[fouady]

خير إيه اللي حصل .. علشان يتكسر .. وانا هاحول اسال لو وصلت لحاجة حاول لحضرتك

[mshmshm3]

ياساتر يارب
استيراد هتلاقي في الحرفيين
التركيب رأيي التوكيل لان ده فتيس مش فانوس ولا فلتر هوا اي حد يركبه

[Omar_4ever]

موجود في الحرفيين - العالمية للإستيراد
سعره هيبقي في حدود 3000 - 3500 جنيه
التركيب مقدرش افيدك

[broadband]

روح الحرفيين و اسأل عن ورشة الاسطى بلية اتوماتيك هو متخصص اتوماتيك

لو ماعرفتش ممكن نتواصل و ادلك عليه

[Horsepower]

متشكر جدا يا رجالة,
الحمد لله على كل شيء, العربية كانت مركونة في شارع البطل أحمد عبد العزيز وقت ضرب النار إللي فات وأخدت تقريبا 8 رصاصات في أماكن متفرقة (إكصدام أمامي - إزاز قدام وورا - مخدع رأس كرسي السائق - حزام أمان السائق - تابلوه - جنطين بكاوتشاتهم وطاساتهم طاروا طبعا الجنب الشمال - باب خلفي شمال - وأخيرا لقينا زيت الفتيس على الأرض وبعد الكشف ومحاولات صاحبي بيقولي الجيربوكس بيجيب d بس ومابيشتغلش أي حاجة تانية)
هاقوله على العالمية للإستيراد وربنا يكرم ويعوضه خير إن شاء الله ويسترها على الجميع
متشكر مرة ثانية