ربنا ستر بنتى كانت هتقع من الصنى

[edodahab]

السلام عليكم
انا لسة جايب صنى الشكل الجديد الحمد لله و بصراحة العربية اكثر من رائعة
امبارح حصل معايا موقف بس الحمد لله ربنا ستر
كنت خارج انا و العيلة و بنتى ٣ سنوات راكبة ورا كالعادة و ماشى على سرعة ٨٠ تقريبا فجأة سمعت طقة بس مخدتش بالى من كتر الزلط اللى الكاوتش بيلمه و برده مخدتش بالى ان لمبة الباب منورة عشان مش متعود عليه الصراحة لكن سمعت صوت الطريق بيعلى شوية و صوت مراتى و هى بتصوت و لحقت تمسك البنت
الحمد لله ان مراتى كانت قاعدة ورا على غير العادة
طبعا انا مش متعود اقفل اللوك كل مرة و دة عشان عربيتى القديمة كان فيها انذار بيقفل اللوك اول ما العربية تمشى
لما رجعت البيت دخلت على المنتدى و بصيت فى الكتالوج اكتشفت ان العربية فيها اوبش اوتو لوك و دة مش شغال الا لما انت تفعله و دة عن طريق انك تجيب المفتاح على on و تكون قافل الابواب و تدوس على زرار قفل اللوك اللى على باب السائق لمدة خمس ثوانى لغاية اما تلاقى الفلاشر ولع مرتين كدة يبقى اتفعل و الاوبشن دة بيقفل الابواب كلها اول ما السرعة تبقى ١٠ و مبيفتحش الا لما تشيل المفتاح من الكونتاكت
انا عارف ان الموضوع دة اتقال قبل كدة بس قلت اكرره للأهمية و كمان عشان معظم ملاك الصنى عائلات
انصح كل من لم يفعل هذا الاوبشن انه يفعله بسرعه
ربنا يستر علينا و على عيالنا
عذرا على الإطالة

[amrelsaqqa]

يااااانهار ، الحمد لله ربنا سترها معاك جامد لازم تسجد شكر لله ، حمد لله على سلامة بنتك وربنا يخليهالك ويحفظها من كل سوء

[Eng_hatemfathy]

ربنا ستير وارجوك تركب كرسى اطفال فى العربية وتقعد عليه الكتكوته الصغيره وتربطها حنى لو والدتها بجوارها
وربنا يسترها عليك وعلينا والف مبروك على العربية ولو الافضل برده مع الكرسى انك تلغى فتح الباب اللى جنب الكرسى من الداخل عن طريق امان الاطفال اللى فى جنب الباب بجوار الكالون
وربنا كريم

[rotanamasoud]

الحمد لله ربنا ستر على البنت

[vergelmer]

الحمد لله ربنا ستر
و مشكور يا غالى على المعلومة القيمة دية ماكنتش عارفها

[koshary]

مشكور على النصيحه والف سلامه على بنتك

[mona_881]

الحمد لله علي ستره وياريت لو تقدر تدبح حاجة فداها وربنا يخليهالك

[kemoooo2020]

الحمد لله انها بخير

[lad]

مشكور على النصيحة

[J A G U A R]

حمد الله على سلامه بنتك وربنا يسترها علينا

[mahmoud_afifi]

حمدلله على سلامة بنت حضرتك.
وفي الchildren lock في الابواب الخلفيه ياريت تعمله احتياطي

[edodahab]

ربنا يخليكوا و يحفظنا احنا و عيالنا
شكرا يا جماعة على الاهتمام
انا فعلا عملت اللوك بتاع الاطفال اللى فى جنب الباب زيادة فى الاحتياط

[grumby78]

ربنا ستر الحمد لله
وزي مالعضو قبلي قال مهم جدا تفعيل قفل الاطفال . انا عامل كده عشان الاطفال . وده عن طريق زرار بتلاقيه لما بتفتح الباب في الباب نفسه بتغيره لوضع الاغلاق . وبكده محدش يقدر يفتح من الداخل ولازم لما تقف تخرج تفتحلهم من الخارج دايما .. وربنا يباركلك في عربيتك .

[Silent~Dream]

الحمد لله و ربنا سترها قبل ما يحصل حاجه لقدر الله

[د.هشام]

الحمد لله على سلامة بنتك، للأسف أغلبنا معندوش ثقافة ربط الأحزمة الخلفية للأطفال.