أصلاح خدوش الصنى .. هام جدا

[medo-312]

النهاردة الجنب اليمين اتحك من اوله لأخره وانا راكن بسبب تاكسى ابيض الله يسامحه ومسحت الخدوش بس فى أثر خطين داخلين لجوه بطول الجنب اليمين .. هل اوديها لسمكرى واللا ارش البابين .. ياريت حد يقوللى اعمل ايه لأن الموضوع ده مضايقنى جدا .. بس الحمد لله وقدر الله وماشاء فعل

[saddam]

صديقي المواطن
قولا واحدا تروح لمحلات الكماليات بتاعت تصميم اللواصق بالكمبيوتر وتعمل خطين على طول العربية شيك في الجنبين وتملأ فراغ التجويف بسليكون بتاع الزجاج بتاع العربيات وبحتت بلاستك بتاع تركيب الفاميه أو حتت كرتونة تشيل زوايد السليكون بالظبط كأنك بتمعجن الخبطة كل القصة دي مش حتكلفك 100 جنيه ثم حتديك تميز وجمالية وتستنى أول حادث يستاهل ويسوى فتروح تصلح الجديد والقديم ونحن ندعولك بالستر ولكن في المحروسة إنسى لو معملتش حادثة كل سنتين أو ثلاثة يبقه إنت أكيد مش في مصر
وبالتوفيق وإلى اﻷمام ومن نصر إلى نصر
ودمتم للنضال

[john55]

سيبها يا باشا عربيتك لسه فابريكه لو رشتها هتفقد الميزه دي وممكن زي الاستاذ في الرد السابق ممكن تجيب الرسومات اللي بتتحط بطول البابين تداري الخدوش وتعطي شكل اسبور للعربيه وشكرا

[أحمد جودة]

ممكن تجيب بولش وكامباوند بس نضيف وتجيب حتة قطنة طبي كبيرة وتاخد من الكامباوند وتحط على الخطوط وتستيبها دقيقة تنشف وتدعك جامد بالقطنة ............ وبعدين تحط البولش بنفس الطريقة علشان التلميع ............. اعتقد الموضوع هيفرق معاك بنسبة كبيرة .......... دة طبعا قبل ماتفكر فى بوية وسمكرة أولصق حاجة على جسم العربية ممكن تاخد مخالفة بسببة واللع اعلي واعلم

[mhmd_farouq]

سيبها أحسن عشان موضوع الفابريكه ... وكمان عشان الحسد ... ربنا يكفيك شر الحوادث بس لو حصل حاجه بعد كده تستدعي انك ترش صلحها معاها .

[Msanad]

فى رأيى لا ترش ولا تعمل حاجة - سيبها كده - انا عارف شعورك لان ده حصل زيه تقريبا مع عربيتى بس كانت ابسط من كده شويه وكنت متضايق زيك لانها كانت لسه جديدة - بعد شويه اتعودت عليها وده طبيعى فى مصر وشوارعها.

[medo-312]

الف شكر للجميع .. هاجرب الأول البولش والكمباوند وربنا يكفينا جميعا شرالحوادث .. بس سؤال بسيط .. لو البابين اترشوا فرن هايبانوا برضوا ؟

[john55]

انت ممكن ترشهم في التوكيل وهيطلعوا زي الاول بس علشان خطين هترش البابين الاحسن ممكن تسيبها شهرين تلاته ممكن لاقدر الله تتحك في حاجه تانيه فلالفضل امشي بيها فتره وصدقني دا اساسي في شوارعنا انا كنت عامل زيك اي خربوش عايز اجري واعمله لكن مع الوقت هتاخد الامر بهدوء وربنا يحافظ علي العربيه وتكون اخر المشاكل وشكرا

[omar shaker]

ممكن صورة لمكان الحكه انا ممكن افيدك شويه
وبالنسبه لموضوع الكمباوند والبولش فانا ماسك العربيه الايام دي كمباوند وبلوش على الخدوش والحجات الخفيه بيشيلها بس لازم باستمرار

[gold_777]

ياباشا كل العربيات دلوقتى كده او معظمها علشان هى دى مصر زحمه يا دنيا زحمه وكله تهريج فى تهريج مرور مشاه عربيات متزعلش دى بلدنا ونستحمل والحمد لله
المهم الاول : هقولك على طريقه ممكن تنفع معاك
فوطه ذفره وامسكها بفوطها تانيه نطيفه او البس حاجه فى ايدك وتعالى على مكان الخط واعمل عليه مسح طولى ودائرى كتير اربع مجموعات كل مجموعه 100 تكرار ايدك هتسخن ماشى متوقفش لان السر فى السخونه نفس فكرة الصاروخ بس دى يدويه مجربه بنفسى بس الخدش كان بسيط واحد كان فى الاكصدام واحد فى الباب
الحاجه التانيه : صاروخ التلميع موجود فى الحرفيين لمع الخط باستخدام الصاروخ هيروح

[grumby78]

لو الخبطه مدايقاك رشها طبعا وسيبك من كلام فبريكه ده .. اركب عربيه شكلها نضيف وتريحك

[medo-312]

ممكن صورة لمكان الحكه انا ممكن افيدك شويه
وبالنسبه لموضوع الكمباوند والبولش فانا ماسك العربيه الايام دي كمباوند وبلوش على الخدوش والحجات الخفيه بيشيلها بس لازم باستمرار

[omar shaker]

انا عندي اخت المشكله دي بالضبط بس من اول الباب الخلفي فقط يمين

رحت لافضل سمكري عندنا فقكيتله الفرش بتاع الابواب وهوه عددل الخبطه اللي في السوكه بتاعت الرفرف اللي ورا وملاها حاجه اسمها سيلكون عظم تقريبا وطبعا خرم لها عشان يعدلها

اما بالنسبه للخط اللي في الباب فعددل نصه والنص التاني معرفش عشان في زي ماتقول مواسير كبيرة لحمايه الباب فمعرفش يطولها

اما انصحك انك تروح لسمكري الاول يعدل اللي يقدر عليه وبعدين تروح لبوهيجي يشوفها و ممكن يرمهالك على قد الخطين فقط

وانصحك لو العربيه لسه جديده سمكرها وسيبها شويه تاخد العين

وكمان الجو اللي احنا فيه مينفعش رش بويه على كلام الخبرا رش البويه محتاج جو حرو شمس

[mem]

حضرتك هى عايزه سمكرى شاطر وبهيجى كمان شاطر هيرجهالك فبريكه
وكمان مش هتبان انها اتخبطت لانها بسيطه
انا لى صديق معاه نفس موديل عربيتك لسى عملها من اسبوع كده
كان عنده خبطه مشابهه لبتاعت حضرتك بالضبط بس زياده عليها الرفرف وحته فى العتب
وراح سمكرها ورشها ولمعها بقت العربيه ما شاء الله ولا فيها الهوا ولا بان عليها انها اتخبطت نهائيا

[medo-312]

حضرتك هى عايزه سمكرى شاطر وبهيجى كمان شاطر هيرجهالك فبريكه
وكمان مش هتبان انها اتخبطت لانها بسيطه
انا لى صديق معاه نفس موديل عربيتك لسى عملها من اسبوع كده
كان عنده خبطه مشابهه لبتاعت حضرتك بالضبط بس زياده عليها الرفرف وحته فى العتب
وراح سمكرها ورشها ولمعها بقت العربيه ما شاء الله ولا فيها الهوا ولا بان عليها انها اتخبطت نهائيا

السمكرى عنوانه فين !!