عربيتي الـ Juke اتخبطت... محتاج استشارة

[حاتم]

السلام عليكم ورحمة الله وبركاته،

عربيتي الـ Juke اتخبطت، ونتيجة الحادث الباب الشمال اتبهدل، والمرايا الشمال طارت، والإكصدام الخلفي اتبهدل هو كمان.

رحت السبع في المعادي وطبعاً هيغيروا كل حاجة والمقايسة طلعت غالية جداً فوق ما كنت أتوقع بكتير.
رحت محمد جابر بتاع نيسان في شارع دمشق لقيت أسعار قطع غيار الـ Juke أغلى من التوكيل.

ناس نصحوني قالوا لي ما دام مفيش حاجة في الميكانيكا فبلاش توكيل وكله زي بعضه وأوديها سمكري نضيف أحسن، وهيكون أرخص بكتير.

المشكلة كمان إن قطع غيار الـ Juke لسة مش متوفرة أوي، حتى في الحرفيين.

العربية مكملتش سنة.

الحمد لله على كل حال.

إيه رأيكم؟ وتنصحوني بإيه؟

[grumby78]

اولا الف سلامه عليك ومتزعلش نفسك
ثانيا جيب قطع الغيار اللي مش موجوده برا زي المرايا واعمل سمكره ورش خارج التوكيل .
دمت بصحه

[medo-312]

ربنا معاك وماتقلقش ان شاء الله تلاقى حل .. وبص فى الشوارع على العربيات هاتلاقى نص عربيات مصر مخبوطة اشكال والوان .. النهاردة فى الجراج شفت عربية بى ام الفئة السابعة داخل فى جنبها الشمال عربية 4*4 والباب بتاعها ب 12.500 جنيه قلت فى نفسى اللى يشوف بلاوى الناس تهون عليه بلوته والحمد لله

[hamaka]

معلش ، الحمد لله و قدر الله و ما شاء فعل و فداك 100 عربية المهم سلامتك ، بالنسبة للعربية خدها و اطلع على الحرفيين هتلاقى هناك أشطر سمكرية و حاول تلم الدنيا على قد ما تقدر عشان التوكيل ده هيبيعك هدومك....

[hossam_elwani]

لاتحزن ابدا كله فداك

[saddam]

صديقي المواطن
متعاطفون معك قلبا وقالبا ونحمد الله على سلامتك ووجودك معنا بالدنيا وما فيها
إنت مبدئيا عايزك تنسى أساسا مكان التوكيل ده فين وصدقني لو وقفت تجيب قطع الغيار من السعودية أو اﻹمارات بنقلها ومصاريفها حتطلع أرخص من التوكيل ثاني هم تروح الحرفيين في يوم تحلف يمين مصحف إنك تاخدها مشي من أولها ﻵخرها ومتسيبش محل إلا وتسأله مهما قابلت من صعوبات ومهما قابلت من حثالات المجتمع وأشدد على كلمة المشي راجلا ولو ملقتش تطلع على بورسعيد رحلة تاكل سمك وتشتري حاجتك ولو بعد كل هذه الطرق تروح التوكيل وتجيب النواقص فقط وتدعي عليهم قبل صلاة الفجر وبعد صلاة العشاء ولما تروح الحج مش عايزك تنساهم من الدعاء ثم تطلع تعملها بره عند سمكري ببحترم نفسه بشرط يطلعها زيرو ولو قاللك أظبطها بنسبة 99% تسيبه وتروح لغيره
وبالتوفيق وإلى اﻷمام ومن نصر إلى نصر
ودمتم للنضال

[saint2011]

شوف حضرتك أستبعد الأصلاح فى التوكيل ألا لو حضرتك مأمن على العربية لو مش مأمن روح عند سمكرى محترم يظبطها وحضرتك وفرلة القطع المطلوب تغييرها سواء كانت من التوكيل او من بورسعيد وعلى فكرة أنا عندى سمكرى محترم جدا وعنده ضمير لو حضرتك من القاهرة وأنا تحت أمرك أبعتلك عنوانه وموبايلة وأنشاء الله العربية تبقى تمام

[mastr_n]

فداك
والحمد للة انها بتيجى فى الحديد
الرجالة عملوا الواجب بصراحة ونصيحة من مجرب ابعد عن التوكيلات

[حاتم]

خلاص سحبت العربية من التوكيل وخدها واحد أعرفه كويس بإذن الله.

تخيلوا بعد ما العربية قعدت عندهم يومين وعملوا المقايسة، طلعت قطع الغيار مش جاهزة عندهم؟

الله المستعان.

هبقى أطمنكم بإذن الله.

جزاكم الله خيراً.

[k50_]

لو ممكن توضح لينا التوكيل قالك ايه علي الاسعار ؟ وايه قطع الغيار الي انت محتاجها ؟ هتغير اكصدام ولا هتسمكره بس ؟
ولو لقيت اماكن بيع قطع غيار استيراد خاصة بالجوك ياريت تفيدنا بيها .

[mem]

صلحها بره واشترى قطع الغيار اللى مش تنفع تتصلح من التوكيل

[amgomaa]

حمد لله على سلامتك واهم حاجه بالفعل السمكرى يكون شاطر و بالتوفيق

[amigo77]

حمدا لله على سلامتك فداك الف عربية
التوكيل ده ما تلجألوش فى الجيوك غير لا قدر الله لو فيه عيب كهربا لأن كهربة الجوك معقدة حبتين
لكن اى حاجة تانية اعملها بره لأنهم بصراحة حرامية اوى
و يا ريت حضرتك تشاركنا بأسعار قطع الغيار اللى ادوهالك فى التوكيل و اللى فى شارع دمشق علشان كلنا نستفاد لأنها مش موجودة على المنتدى تماماً و طلبناها اكتر من مليون مرة و لا حد معبرنا
و قدر الله و ما شاء فعل و ما تزعلش نفسك انا الجوك عندى اتحكت و هى واقفة تانى يوم ما جبتها
هى دى مصر

[شادى عبدالمنعم]

قول الحمد لله وقدر الله وماشاء فعل