انطباعى بعد 5000كم مع النيو صنى 2014

[morino86]

السلام عليكم ورحمة الله وبركاته

بداية انا اسمى محمد أحمد طبيب بيطرى ...أنا عارف طبعا ان فيه ناس كتير كتبت تقارير كتير محترمة عن النيسان الصنى الجديدة بس انا رأييى الشخصى أن التقارير دى المفروض معظم الأعضاء يعملوها عشان اللى زينا وعايز يشترى ياخد صورة كاملة عن الموضوع مش مجرد يعرف المشاكل واللا لأ ..ثانيا المفروض اللى جاب موديل 2012 يعمل تقرير واللى جاب 2013 يعمل تقرير وهكذا لأن احنا طبعا عارفين أن ممكن العربية يكون فيها عيوب وتتعالج بعد كده فى الموديلات التالية فيبقى برضه وصلنا صورة امينة عن العربية للى عايز يشترى

بداية واسف انى هطول عليكم أنا لو هقول شعر فى المنتدى ده مش هيوفيه حقه لان انا واحد من الناس اللى معندهاش خبرة حقيقية بالسيارات ومشاكلها الى وقت قريب لحد ماصادفت والحمد لله المنتدى ده من كام سنة واتعلقت بيه وبقيت أستقى معظم معلوماتى عنه وعلى الاساس ده اشتريت عربيتى التانية اللى هيا النيسان صنى 2014

أنا كنت امتلك العربية(واسف انى هسميها عربية) المسماة شيفروليه افيو وعلى راى واحد صاحبى( شيفروليه فلافيو)..لمدة 5 سنين لحد مااخدت قرارى انى اغير وتوكلت على الله واستخرته وجبت النيسان

أنا اشتريت العربية ب114 الف بسبب عدم ثقتى فى موضوع الحجز ومواعيده واخدت مع العربية وحدة رفع وباركنج سنسور وغطا عربية هدية(وفيه زينون لو انت عايزمكان وحدة الرفع او السنسور)والعربية عاملة معايا دلوقت 5آلاف كم وبمشيئة الله هوافيكم برضه بالتفاصيل بعد كده

أولا الشكل:

الشكل فيه ناس كتير معترضة عليه وفيه ناس لأ ودى فى النهاية عشان منوجعش دماغنا آراء شخصية انا عن نفسى عاجبنى الشكل عن القديم ولو انى برضه بحب كلاسيكية القديم

الموتور:

صوته أهدى من الشكل القديم ولو ان بصراحة عن تجربة تسارع القديمة احلى بس الكلام ده مش هيفرق قوى مع اللى سواقته هادية زييى. تسخين الموتور بياخد من 5-7 دقايق بالظبط وفعلا تسخين العربية لمدة كافية بيخليها هادية وناعمة معاك طول الطريق....عدد لفات الموتور بتكون مظبوطة على 800 لفة.....المشكلة اللى موجودة عندى ان صوت الموتور بقى عالى شوية من فترة ومش عارف دى مشكلة واللا لأ بس مستنى صيانة ال10 آلاف..انا كنت حاطط زيت شل بس ياريت لو حد محترم عنده خبرة يقولى احسن زيت للصنى الجديدة ايه وبلاش تقولولى انواع غريبة عشان كل حاجة مابلاقيهاش عندنا

الكاوتش:

زى ماقال الكل فيه شعر انا كمان لازم أقول فيه شعر...كاوتش سىء خشن بيحسسك بالطريق بيلم ظلط وطوب كتير وعشان مانكبرش الموضوع مشكلة فى النهاية سهلة الحل غير الكاوتش وريح بالك ..ضغط الكواوتش المظبوط 33 قدام و30ورا

الصاج :

لو هاديله نسبة مئوية هديله 60% بصراحة انا مش عارف ازاى ينزلوا الصاج ضعيف كده بالذات فى منطقة السقف والابواب ولو انه عامة مش سىء للغاية بس ضعيف مقارنة بالشكل القديم وصاج الكبوت العضم تحته شكله غريب واعتقد انه صعب رد اى خبطة فيه

الأنوار :

مرييييييحة جدا فى الرؤية وممتازة فى كشف الطريق

الصالون:

هو أكثر مايميز الصنى وااااااااااااسع جدا ومريح وبيخليها عربية عائلية بامتياز بس اماكن التخزين فيه قليلة جداااااااااااااااااا يعنى ماتحطش حاجات معاك كتير لان حتى التابلوه تحس انهم حاطينه فى بير وضيق جدا

الكاسيت:

صوته جيد جدا ولو ان يعنى مش عارف ايه ام البخل ده اللى خلاهم مايحطوش وصلة usb كانت هتريح بدل جو الاسطوانات وهو تقريبا الكاسيت اللى كان موجود فى التيدا الشكل القديم

التكييف :

جيد جدا وفكرة الهواية اللى ورا ممتازة وبتخلى توزيع الهوا افضل...مشكلته موضوع الفلتر ده وساعات روائح غريبة بتخل العربية ببقى مش عارف اتصرف فيها ازاى.

العزل:

عزل السيارة سىء وصراحة مش عاجبنى سواء عزل عن البيئة الخارجية او العكس واللى مش مصدقنى يشغل الكاسيت ويطلع بره العربية وهو هيسمع الصوت وكمان مشغل مستوى الصوت على 20الموضوع ده محتاج تقريبا كفاءة فى التقفيل ده ولو بيقيموه بنسبة مئوية هاديله 60% ولو انه فى النهاية مش مؤثر على العربية فى حاجة

الكماليات:

طبعا فيه ناس بتقول انها بلا كماليات وناس بتقول العكس الحقيقة ان العربية دى نازلة بحاجات مش موجودة فى فئات زيها وفى حاجات خايبة مش موجودة فيها لاسباب غريبة...يعنى مثلا العربية نازلة باتنين ايرباج وايموبلايزر ده غير الABS وده مش موجود فى فئات مماثلة كتير بس مثلا متلاقيش الاوكر اللى فوق الابواب فى السقف ورا والقماش اللى فى الابواب والمراية اللى فى مراية اللى جنب السائق دى بالذات مش عارف هتكلفهم قد ايه وموضوع العدادات ده كمان حدث ولاحرج يعنى ايه ينزلوا موديلين بشكل عدادات مختلف وموضوع مؤشر الحرارة ده عاملى ارتكاريا من ساعة ماجبت العربية..المهم فى النهاية اساسيات العربية دى تعتبر كماليات فى عربيات تانية

التسارع :

بالنسبة لى معقول مابيبانش اللى لما اعدى الستين كم لكن فى مجمله معقول طبعا اللى ركب القديم التسارع عنده افضل والشد احسن

الارتفاع والمطبات:

العربية ممتازة فى تفادى المطبات ودى مشكلة كانت موجودة فى الشكل القديم

الاتزان:

دى من النقط اللى زعلتنى من العربية لانى كنت بعانى منها فى الافيو بس طبعا مش لدرجة الافيو ..الافيو دى اصلا توكتوك معدل ومنصور حاططله علامة الشيفروليه.......اتزان الصنى كويس لحد ال100كم بعد كده مش قوى لحد 120كم بعد كده بلاش تزود بالذات لو فيه هواء شديد وتيارات هوا

استهلاك البنزين:

استهلاك البنزين انا بصراحة كنت متخيله قليل جدا بس طلع الاستهلاك فى النهاية عادى جوه البلد 1لتر/10كم وعلى الطرق بره 1لتر/ 12كم وخزان البنزين المفروض يعنى يخلوه اكبر من كده شوية ايه جو 41 لتر ده دى الافيو كان التانك بتاعها 45 لتر

التقفيل:

التقفيل من بره كويس ومن جوه فى الصالون مش قد كده ..خامات التابلوه والطارة مش حاجة كواليتى عالى ولو انها مش فارقة معايا بس يعنى حاجة زى دى خايبة المفروض التوكيل يهتم بيها على ام الاسعار اللى بتزيد كل فمتوثانية فى مصر

التوكيل وقطع الغيار:

بصراحة من اكتر مراكز الصيانة المتوفرة لعربية على مستولى مصر بس موضوع توافر قطع الغيار بره ده نتمنى حله للهرب من اسعار التوكيل

الفرامل:

ودى النقطة الحساسة اللى الكل بيتكلم عنها ...انا بصراحة الفرامل معايا ممتازة ولو ان بيبان معايا صوت غريب مع الفرملة المفاجئة مش عارف ده ايه بس مش مأثر على نظام الفرامل عامة ...ثانيا موضوع الABS ده هو يارجالة النيسان المفروض ينور واللا لأ لانى حتى فى الفرامل المفاجئة عمره مانور هل ده عيب واللا طبيعى..وبالرغم من عيوب الفرامل اللى كفرت ناس كتير بس بصراحة مقارنة بمنصور شيفروليه توكيل النيسان ملاك جنبه ولو برضه فى النهاية توكيلات مصر كلها لاترقى للمستوى العالمى...

فى النهاية كنت بس عايز اوضح نقطة ...العربية دى مقابل سعرها ومقابل البدائل زى الريو والاكسنت تعتبر صفقة رابحة رغم عيوبها..حتى وان ظهرت فيها عيوب يمكن اصلاحها لكن ان كانت عيوب لايمكن اصلاحها ساعتها لاهيا ولاغيرها لكن فى حدود علمى ومتابعتى مع اصدقاء ظهرت معاهم مشكل الفرامل (وبالرغم من كده نصحونى بيها) قالولى ان التوكيل بيسعى فعلا لحل المشكلة ودى حاجة تحسب له

ودمتم فى حفظ الله وأتمنى انى اكون أفدتكم

[/justify]

[د.هشام]

موضوع فلتر التكييف حله سهل، انك تقفل دخول الهواء من الخارج
بالنسبة لل abs اللمبة بتنور لما بتفتح الكونتاكت وبتقفل تاني، والمفروض بتحس بالabs تحت رجلك مع الفرامل المفاجئة، والمفروض ميكونش فيه أي أصوات
انا مختلف معاك في موضوع الصاج، والإتزان، والعزل، والتسارع

[J A G U A R]

تقرير وافى .. ربنا يباركلك فيها

[amr011111]

الموتور:

صوته أهدى من الشكل القديم ولو ان بصراحة عن تجربة تسارع القديمة احلى بس الكلام ده مش هيفرق قوى مع اللى سواقته هادية زييى. تسخين الموتور بياخد من 5-7 دقايق بالظبط وفعلا تسخين العربية لمدة كافية بيخليها هادية وناعمة معاك طول الطريق....عدد لفات الموتور بتكون مظبوطة على 800 لفة.....المشكلة اللى موجودة عندى ان صوت الموتور بقى عالى شوية من فترة ومش عارف دى مشكلة واللا لأ بس مستنى صيانة ال10 آلاف..انا كنت حاطط زيت شل بس ياريت لو حد محترم عنده خبرة يقولى احسن زيت للصنى الجديدة ايه وبلاش تقولولى انواع غريبة عشان كل حاجة مابلاقيهاش عندنا
لو انت بتعمل الصيانه فى التوكيل فالتوكيل بيلزمك بنوع زيت معين وهوه شيل
يفضل انك تغير الزيت كل 10 الاف كم مش كل 5000 كم طالما العربيه زيرو

الصاج :

الكاسيت:

صوته جيد جدا ولو ان يعنى مش عارف ايه ام البخل ده اللى خلاهم مايحطوش وصلة usb كانت هتريح بدل جو الاسطوانات وهو تقريبا الكاسيت اللى كان موجود فى
التيدا الشكل القديم

فيه وصلة aux وممكن تجيب ام بى ثرى بلاير وكده يبقى كأن معاك فلاشه[/COLOR]
[/COLOR]

التكييف :

جيد جدا وفكرة الهواية اللى ورا ممتازة وبتخلى توزيع الهوا افضل...مشكلته موضوع الفلتر ده وساعات روائح غريبة بتخل العربية ببقى مش عارف اتصرف فيها ازاى.

الغى دخول الهواء من خارج السياره

الفرامل:

ودى النقطة الحساسة اللى الكل بيتكلم عنها ...انا بصراحة الفرامل معايا ممتازة ولو ان بيبان معايا صوت غريب مع الفرملة المفاجئة مش عارف ده ايه بس مش مأثر على نظام الفرامل عامة ...ثانيا موضوع الABS ده هو يارجالة النيسان المفروض ينور واللا لأ لانى حتى فى الفرامل المفاجئة عمره مانور هل ده عيب واللا طبيعى..وبالرغم من عيوب الفرامل اللى كفرت ناس كتير بس بصراحة مقارنة بمنصور شيفروليه توكيل النيسان ملاك جنبه ولو برضه فى النهاية توكيلات مصر كلها لاترقى للمستوى العالمى...

الصوت ده هتلاقيه عباره عن تكته ورا بعض فده صوت ال abs
[/COLOR] [/justify][/CENTER]

الرد فى الاقتباس

[morino86]

متشكر جدا لحضرتك يااستاذ عمرو

[edodahab]

تقرير محترم و محايد و وافى
اعتقد ان الصوت ده بتاع الabs

[MELKASHEF]

ربنا يباركلك فيها يا باشا
بالنسبة للزيت فأفضل لزوجة تشتريها هيا 5w-30 .
شوف أي نوع يكون فيه اللزوجة ديه واشتريه وان كنت بانصح بوولف.

[شادى عبدالمنعم]

بارك الله فيك تقرير ممتاز ووافى

[S O P H O S]

تقرير فيه مجهود طيب

[بودي]

الله ينور عليك تقريرمحترم انا معايا العربيه بقالها شهرين والحمد لله زي الفل

[shifo]

تقر ير محايد وموضوعى خالص تحياتى لاسلوب العرض المميز وبارك الله لك

[ibrahimsaad]

تقرير هايل ومحايد وانا بضم صوتى ليك فى كل كلمه ماعدا حكايه العزل دى انا شايفها كويسه معايا

والف مبروك العربيه وياريت اعرف انت بتعمل صيانه فين فى طنطا لانى من كفرالشيخ جنبك وعايز ابقى اعملها فى طنطا

[magdy mady]

اولا الف مبروك يا دكتور وربنا يباركلك فيها
ثانيا اغلب الناس بتكتب تقارير بتبرز فيها السلبيات زيادة حبتين
ثالثا لازم نقول ان المبلغ دا له شريحه فيها مجموعة سيارات لازم نقارن بينهم وفى النهاية هنلاقى الصنى تتفوق
رابعا موضوع الزيوت ودا مهم جدا جدا لان اى شئ فى العربيه يتعوض الا الموتور والجيربوكس ( انصحك تستخدم الزيوت التخليقية المستوردة وليست المصرية وأرشح لك ثلاث انواع * كاسترول ايدج ودا تخليقى 100 فى ال 100 * فالفولين * ليكوى مولى ) ونصيحه لوجه الله تعالى ابعد عن الزيوت المعدنية لانها بتسبب تأكل فى اجزاء الموتور والجيربوكس ولا علاج لهذا التأكل نهائيا
خامسا هو ان الانسان لما يفكر يشترى عربيه ايه مواصفاته ( عربيه مرتفعه عن الارض علشان المطبات - او سريعة الاستجابه - شبابية - تقليدية - وسائل أمان كتير - عائلية - شنطة او من غير) وهنا بيقدر يحدد او بيحصر اختيارة فى مجموعه محدده .
تقبل تحياتى