تجربتى بعد 111 ك نيو صنى

[ibrahimsaad]

انا اشتريت نيو صنى 2014 اى اكس

لسه مستنى الورق علشان ارخص

بس مشيت بيها 100 ك هى كانت جايه فيها 11 ك وانا عملت كده 100 ك

ودى ملاحظاتى الاوليه وان كان لسه الوقت مبكر على اول تقرير لى

العربيه ماشاء الله واسعه جدا والشنطه واسعه

الكراسى كويسسه ومريحه

التابلوه لحد ما معقول وان كان فقير شويه

الفرامل كويسه بس بلاحظ لو دست بالشمال بتكون قويه جدا لكن باليمين باحس انها اقل قوه

الكاسيت ممتاز وان كان لايوجد به ام بى ثرى

العربيه فى مجملها جيده جدا

العيوب

الابواب وخصوصا باب السائق لازم ارزعه جامد علشان يقفل

استهلاك البنزين انا فولتها اول مااستلمتها ومشيت 100 ك وفولت تانى اخدت 20 لتر يعنى صفيحه داخل البلد بدون تكييف

وده يعتبر استهلاك عالى جدا جدا

مش عارف هل ده لانى لسه بلين ولا هتستمر على كده يبقى حرام

[hatahet]

مبروك علي العربيه يا كبير
و نصيحه لو العربيه اتوماتيك ريح رجلك الشمال خالص متحاولش تجبها علي الفرامل لان احساسك برجلك و تحكمك مش زي بعض و العربيه فيها break assist فهتلاقي ابدواسه بتتشد تحت رجلك و العربيه تكلبش فرامل فجئه و دا مش كويس علشان لو حد وراك لاقدر الله
و الاستهلاك فا لعربيه بتلين و الاستهلاك بيقل تددريجى ان شاء الله

[J A G U A R]

انا كنت راكب واحده زيها امبارح بس سوبر صالون الفرامل مكانتش عجبانى والباب فعلا مقفلش معايا من اول مره

[edodahab]

يا باشا ريح رجلك الشمال خالص و اللى حصل دة طبيعى عشان شكلك كنت ناقل من مانوال و رجلك الشمال متعودة على ضغطة الدبرياش الجامدة متخافش اى حد بيغير لاوتوماتيك بيعمل كدة كام مرة و بعدين بيتعود
بالنسبة للأبواب مع الاستخدام هتتحسن و دى عيوب التقفيل المصرى
استهلاك البنزين مينفعش تحكم عليه قبل خمس الاف كم
مبروك

[medo-312]

ياجماعة كلمة ريح رجلك الشمال خالص ممكن يفهم منها انه يريحها وبعدين يستعملها.. يادكتور في الأوتوماتيك ماتستعملش رجلك الشمال أصلا.. وألف مبروك

[ibrahimsaad]

الله يبارك فيكم ياجماعه والف شكرليكم كلكم

[ibrahimsaad]

ياجماعة كلمة ريح رجلك الشمال خالص ممكن يفهم منها انه يريحها وبعدين يستعملها.. يادكتور في الأوتوماتيك ماتستعملش رجلك الشمال أصلا.. وألف مبروك

ههههههههههههههه

انا بس فى الاول دوست شمال حسب مارجلى متعوده وطبعا بعد كده خلاص هى اليمين وبس

لكن هى كانت ملحوظه فعلا ان الشمال تقيله شويه بعكس اليمين

عموما الف شكر ياباشا

[amr011111]

لو استعملت رجلك الشمال مع الفرامل سواء مانيوال او اتوماتيك فده غلط
ده حتى هتلاقى دواسة الفرامل سهله انك تدوس عليها باليمين انما بالشمال هتبقى صعبه

[amrelsaqqa]

الرجل الشمال غشيمة جدا لانها بتبقى متعودة تدوس دبرياج للاخر ، وطبعا اللى حصل معاك ده بيحصل لاي حد اول مرة يسوق اوتوماتيك وطبيعى وهتحس ان الفرامل قوية جدا جدا جدا لانك اصلا بتدوس على غفلة وبرجلك الشمال للاخر مرة واحدة ، طبعا سواقة الاوتوماتيك مفيهاش الرجل الشمال خالص
والف مبروك العربية :)

[S O P H O S]

ان شاء الله تكون احسن
وربنا يباركلك فيها وتاخد خيرها