اعادة تقييم قشقاي بعد 5200 كم

[Mo3taz mostafa]

السلام عليكم و رحمة الله تعالى وبركاته
الحمد لله حمدا كما ينبغي لجلال وجهه و عظيم سلطانه
اللهم صلي وسلم وبارك على سيدنا محمد وعلى آله وصحبه أجمعين وبعد،
كنت عملت تقرير بعد 3500. كم و كان تقرير مختصر،
و كنت اتكلمت فيه علي بعض السلبيات و بعض. المزايا
.... في التقرير ده هتكلم في اعادة تقييم بعض النقاط و برضه غالبا هركز علي السلبيات لان لازم نعترف ان الايجابيات قتلت بحثا.


(1)قوة الموتور
اعتقد ان دي من اكتر النقاط اللي فيها قيل و قال عشان كده هبدء بها،،،انا كنت قلت في التقرير اللي فات ان الموتور او السحب ضعيف في السرعات تحت خمسين
و انا لازلت عند نفس الرأي و لكن انا
اكتشفت ان سلاسة النقلات و الفتيس السي في تي بيزودوا الاحساس بتقل العربية للضعف طبعا ده ميمنعش ان العربية تقيلة حبتين علي الموتور
و لكن بالفعل مع التعود علي الفتيس هتعرف تتعامل كويس مع الموضوع ده.


(2)جودة الخامات

اعتقد ان الخامات المستخدمة ممتازه بالنسبة طبعا للفئة السعرية بتاعتها
و التقفيل ممتاز. و ان كنت قدرت اطلع بعض عيوب التقفيل بس أعتقد. انها حالات فردية و محتاجه مسطره بالمللي عشات تكتشف.


(3) السلبيات
يوم الاربع اللي فات كان حر و درجة الحرارة. 30 بس الشمس مكنتش جامده و كانت السماء. فيها غيوم في اسكندرية
فقلت فرصة اختبر التكييف و خصوصا اني مسافر
اولا بياثر علي السحب الي حد كبير
ثانيا مش هو ده اللي بسمع عنه بالنسبه للتكييف الياباني يعني اداءئه جيد مش ممتاز


حصلت مشكله واحده في العربية و هي ان الfuel economy الرقم بتاعه صفر و بعد كده هيس و طبعا دي حاجه تزعل من صناعة دوله مشهوره بالكمبيوتر.



(4) مقارنه مع سيارات اخري


انا مش متعود اسوق عربيات اصحابي بس كنت مسافر مع واحد صاحبي بفانتازيا 2010 فحبيت اجرب قيادة لمسافة اربعين كيلو
و بعدها بيومين كنت مسافر مع اخويا نفس المشوار بعربيته جولف5 و كان مش نايم كويس فقاللي سوق انت
طبعا العربيتين في غني عن ذكر مميزاتهم من حيث الثبات و احساس الالماني
عشان كده انا هذكر مزايا القشقاي و هي باختصار. فرق الراحة و نعومة العفشه فرقت في الاحساس حتي في مسافه صغيره مش سفر كبير
طبعا الفنتازيا و الجولف تحس انك لازق في الطريق و طبعا في اختلاف في الفئة بين سيدان و هاتش و كروس اوفر عشان كده انا اتكلمت في نقطه واحده و هي احساسك بعد مشوار متعب.



انا كده خلصت كل مزايا القشقاي في التقرير ده و اللي قبله و اي تقرير تاني هيبقي عيوب و بس هههههههههه.






السلام عليكم ورحمة الله وبركاته

[ibrahimsaad]

الف مبروك وربنا يباركلك فيها

[Silent~Dream]

ربنا يباركلك فيها و يكفيك شرها و تقرير جيد

[Mo3taz mostafa]

الله يبارك فيكم

[Samir Elshahawy]

تقرير ممتاز و حيادي جدا

و أسمح لي أعلق علي تقريرك بأن القاشجاي من السيارات التي ظلمها نظام الجمارك و الضرائب و المستنقعات في مصر حيث أن الوكيل كغيره من الوكلاء لم يجد بدا من عرضها في السوق الا بمحرك 1600 سي سي لايتناسب أبدا و حجم تلك الفئة من السيارات و هو ماتكرر للاسف مع مثيلاتها بالسوق الامر الذي بدا واضحا من عيب في السحب و التسارع و لكن ...
كسيارة اسرة و سفر لا أعتقد أن من يقبل علي شرائها يفكر في السرعات العالية أو التسارع و الا عليه أن يذهب لشراء بورشه أو فيراري

النقطة الثانية التي لفتت نظري في تقريرك و هي أنخفاض كفائة التكييف عما عهدناه في السيارات اليابانية و هو نفس ما لاحظته ببعض السيارات اليابانية الحديثة و أيضا الكورية و هو ماقد يكون راجعا للسبب التالي :

بعض الوكلاء في مصر يقومون بتركيب تكييفات مصنعة محليا هنا بمصر بدلا من التكييف الاصلي و ذلك لتخفيض الجمارك و بالتالي خفض قيمة السيارة

[Mo3taz mostafa]

استاذ سمير
شكرا علي اهتمامك بالتقرير
من ناحية قوة الموتور بالنسبالي مفيهوش
مشكلة بس انا حبيت انقل التجربة بكل ما فيها و حتي بره مصر لاحظت ان الناس بتشتكي من ضعف الموتور الالفين سي سي و ده يدل ان اللي اشتراها كتب التقرير قبل ما يعرف يتعامل مع الفتيس الجديد السي في تي

بالنسبة للتكييف اعتقد و الله أعلم انه مش مصري لان المفروض ان العربية بتيجي متقفلة من انجلترا و برضه. ياريت حد من الملاك المحترمين يفيدونا في الموضوع ده
مش

[شادى عبدالمنعم]

يابانى تقفيل انجليزى

[hplv]

التكيف ممتاز وعن تجربه سفر كتير بالعربية بياثر تماما على السحب لكن الكفاءة التبريديه ممتازه جدا
يا ريت تتكلم معاهم فى التوكيل على النقطه دى او وانتا هناك قابل اى حد من الملاك وخليه يركب عربيتك ويقول رايه

[adel_edrees]

تقرير ممتاز و حيادي جدا

و أسمح لي أعلق علي تقريرك بأن القاشجاي من السيارات التي ظلمها نظام الجمارك و الضرائب و المستنقعات في مصر حيث أن الوكيل كغيره من الوكلاء لم يجد بدا من عرضها في السوق الا بمحرك 1600 سي سي لايتناسب أبدا و حجم تلك الفئة من السيارات و هو ماتكرر للاسف مع مثيلاتها بالسوق الامر الذي بدا واضحا من عيب في السحب و التسارع و لكن ...
كسيارة اسرة و سفر لا أعتقد أن من يقبل علي شرائها يفكر في السرعات العالية أو التسارع و الا عليه أن يذهب لشراء بورشه أو فيراري

النقطة الثانية التي لفتت نظري في تقريرك و هي أنخفاض كفائة التكييف عما عهدناه في السيارات اليابانية و هو نفس ما لاحظته ببعض السيارات اليابانية الحديثة و أيضا الكورية و هو ماقد يكون راجعا للسبب التالي :

بعض الوكلاء في مصر يقومون بتركيب تكييفات مصنعة محليا هنا بمصر بدلا من التكييف الاصلي و ذلك لتخفيض الجمارك و بالتالي خفض قيمة السيارة

مع الأسف الشديد كلام حضرتك صح ده حتى الكيا سيراتو البلد الوحيدة اللى بتنزل فيها في العالم كله بموتور 1600 سي سي هي مصر أنا ما زلت مصر على تعديل نظام الضريبة على السيارات لأنه فيه اجحاف على كل مالكى السيارات الكبيرة و الصغيرة