عملت حادثه كبيره ومحتاج مساعده ومشوره

[حماده المصري]

الحمد لله على كل حال


الخساره الاماميه

تهشم وش السياره بالكااااااامل فوانيس ردياتير صدر كامل فرد شاسيه ملوحه ومسكور فيها حتت من القدام الي بتمسك شاسيه الاكصدام وطبعا كبوت واكصدام ورفرف شمال مهروس والجزء الي بيركب عليه الرفرف وهو يعتبر من شاسيه العربيه مفعووص لحد قبل فوق البطيخه كده وكمان المتور فيه كسر في وش التاكيهات وكمان برابريز امامي وتقريبا كده التبلوه رحل سنه او خلع من مكانه الايرباج مضربش طبعا قربه الميا مفيش مقاس زيت المتور مكسور الدينامو مرحل من مكانه وحاجات كتير مرحله منها البطاريه باختصار كل حاجه لحد المتور من المحتمل انها تكون بايزه

ده كده ولسه العربيه مدارتش عشان نعرف المتور حصله حاجه او الفتيس حصله حاجه



الخساره الخلفيه

باب شنطه بايز ممكن يتصلح طبعا الشنطه لو فتحت مش هتقفل لان صدرها برضو ملووح الفوانيس مكسوره رفرف محتاج سمكره وكمان الاكصدام مفيش وغير كده من زمان كان عندي حادثه وراشش مكان الاستبن في الشنطه وكمان الصدر بتاعها


المهم انا في مخيلتي تصليح 15 الف جنيه 5 الف جنيه نص امامي من غير متور و5 سمكره و1000 جنيه قطع غيار الشنطه والباقي رش وفي دماغي مش هترجع زي الاول

هي موديل 2006 اوتو ماتك


المهم انا جالي فيها 35 الف على حالتها ابيع ولا ايييييييييييييييه

وياريت حد يديني موقع تحميل صور ارفع الصور

[kimo66]

ربنا يعوض عليك والحمد للة انك بخير

[eng.m7md.ali]

لا حول ولا قوة الا بالله

الف حمد الله على سلامتك وكويس انك بخير

[حماده المصري]

الله يسلمك شكرا


الله يبارك لكم حد يقولي سعر البيع ده حلو ولا لا ولا عمل ايييييييييه

[eng.m7md.ali]

هيا العربية سعرها في السوق دلوقتي كام؟

[حماده المصري]

لو سليمه واوتوماتك ونضيفه جدا كبيرها 65

[eng.m7md.ali]

يعني لو اتباعت ب 35 الف وحضرتك كنت هتصرف ال 20 الف عليها بس هتبقى مغيرة نص

من رأيي ال 55 الف دول يجيبولك حاجة نضيفة وعلى الاقل سليمة مش مغيرة حاجة

حاول تهزها شوية عن 35 الف وان شاء الله خير

وربنا يعوضك خير والف حمد الله عالسلامة

[حماده المصري]

يعني لو اتباعت ب 35 الف وحضرتك كنت هتصرف ال 20 الف عليها بس هتبقى مغيرة نص

من رأيي ال 55 الف دول يجيبولك حاجة نضيفة وعلى الاقل سليمة مش مغيرة حاجة

حاول تهزها شوية عن 35 الف وان شاء الله خير

وربنا يعوضك خير والف حمد الله عالسلامة

الله يسلمك ويعفيك من اي ضرر ان شاء الله

الحقيقه انا شايف انه سعر ممتاز خصوصا عربيتي رشه شنطه كمان ورشه بره الا السقف قبل الحادثه

بس انا ف ناس بتلعب في دماغي بتقولي تبيع ب 40 طب ازاي يعني يتصرف عليها 15 تقف على لي شاري ب 55 طب يعمل بيها ايه

[eng.m7md.ali]

هيعرف يتصرف بيها ياباشا هيصلحها وينزلها لاي شركة سياحة او يأجرها وتجيبله فلوس وفي الاخر هتفضل عربيته بردو

اطلب 40 الف احسن من انك تصلح وتركب عربية راشة جوة ومغيرة نص كمان

[medo-312]

حمد الله ع السلامة .. وانا لو منك 35 الف كويسين وأقولها مع الف سلامة

[aldesha989]

باشا يعنى ايه هيعمل بيها ايه
هو احنا عندنا فى مصر عربيات بتترمى ؟
ورب الكعبه شايف عربيه مكروباص مازدا تقريبآ القديم اوى ده
البودى بتاعه مش راكب على الشاسيه وبيتهزر ومصدى وفيه ناس راكبه عادى جدآ :d
وكان ماشى على البحر كمان :d

بص ربنا يخلف عليك ويعوض عليك توكل على الله وبيعها وبدل ما تطلع مش عجباك او تبقى مغير نص ده غير اجرائات المرور ده غير انك علشان مغير نص مش هتعرف برضه تبيعها بالسعر اللى انتا عايزه بعد كده لان اى حد يخاف من حاه زى كده فتوكل على الله وبيعها على كده واهى خساره قريبه احسن من مكسب بعيد وتجيب حاجه تانيه علشان ما تفضلش كمان فاكر الحادثه كل شويه

[al_manara]

هيا العربية سعرها في السوق دلوقتي كام؟

70 الف . وتكون برة وجوة واوتوماتيك .

لو جالك 35 يبقي كويس .

التصليح هايكن مكلف غير قرفة واللف علي الصنايعية . والعربية مش هاتتقفل زي ماكانت .
ولو وديتها لصنايعية تمام عشان ترجع سليمة هاتكون التكلفة كبيرة اوي .

ولو شفنا سعر العربية بعد التصليح ممكن نقول سعرها هايكون اقل 10 الاف عن السليمة .
يعني حوالي 60 الف . دة غير ان بيعها هايكون رخم جدا .
لان الي معاة 60 هايفضل عربية سليمة .

يعني انت هاتخسرلك حوالي 5 الاف دة في الوقت القريب .
لاكن علي المدي البعيد انت كسبان لانك هاتبعد عن مشاكلها .

البيع حاليا افضل

ربنا يستر طريق الجميع وحمدا لله علي السلامه

[Omar Mahmoud]

35 الف جنيه يبقي بيع العربية لاسباب كتير اولا هتغير نص و دي عمرها ما هتتأفل زي المصنع
ثانبا المرور و اجرائاتة دا غير انها لو اتكشفت ممكن تتسجن فيها
ثالثا لما تبيعها سعرها هيبقي واقع جدا
و ربنا يعوض عليك

[elpasha1]

بيع واخلص
دا انت هتكون صيدة للصنايعية

[ibrahimsaad]

ربنا يعوض عليك
وانا شايف ان 35 الف كويس بيع وتوكل على الله افضل مليون مره من ارف الصنايعيه وعمرها ماهترجع زى الاول