نيسان سنتيرا 2015

[yasserelshakwe]

عاوز اسأل عن النيسان سينترا
هل عربية كويسة
هل قطع غيارها متوفره
هل التوكيل جيد
اشتريها ولا اشتري تويوتا كرولا افضل
ولكم تحياتي وكل عام وانتم بألف خير

[swimmer25]

كورولا أفضل

[Sameh samy]

محدش جرب السنترا لسة وعرف عيوبها وانا دايما رايي ان اشتري عربية وانا عارف عيوبها وراضي بيها احسن من ماشتري الي معرفوش
انا معايا كرولا وهي عربية رائعة بس لو عاوز تقارن هنقارن مواصفات فنية لان مسوقتش السنتر يادوبك شفتها بس وبصراحة شكلها معجبنيش زي شكل الكرولا
الكورولا عربية حلوة وموتور اقوي كهورس باور تكييف رائع سحب ممتاز فرامل حكاية ريسيل فوق الممتاز فخامة وكماليات اعلي من اي نيسان وعموما نيسان موتور موش ناعم
ممكن النيسان تبقي عربية كويسة بس فية هنا سؤال عندك استعداد تتعلم بالفلوس ؟؟؟
سنة 2008 رحت ابو الفتوح اشتري انا وواحد صحبي نوبيرا لكن بتاع السيلز اقنعو بال الاسبيرانزا 516 لانها ارخص 10000 جنية وكماليات اعلي و abs انا قلتلو انا هاشتري نوبيرا علشان انا عارف عيوبها (جلب مقصات ب 250 جنية حتي لو هاغيرهم كل سنة) النتيجة يا باشا كالتالي
1- باعترفو قالي النوبيرا دي عربية محترمة
2- كنا بنروح التكويل سوا في صيانة 10000 دفعت انا 600 وهو 8000 جنية
3- في اول سنة كان دافع اكتر من اللي وفرو بمراحل لان قطع الغيار اغلي وغير معمرة
4- عربية عفشتها زبالة خاماتها سيئة كل لما يغير تيل يغير طنابير وموتور سئ وتكييف اي كلام
هسالك تاني عندك استعداد تتعلم بفلوسك؟؟؟؟ خليك في الكورولا

[m_love4me]

النيسان موتورها مش ناعم ؟؟؟؟؟؟؟؟؟؟؟
حضرتك ما ركبتش نيسان اكيد ابدا

او ما ركبتش تيدا بقي ولا سمعت عنها
ولا عن العزل بتاعها
ولا ولا ولا

تويوتا ايه بس

انا مش هتكلم كتير

بس اقسم بالله
انا معايا تيدا
ووالدي معاه كورولا 2013 خليجي
والله العظيم بيحلف بحلاوه وسحب التيدا واستجابتها للبنزين
بيقولي التيدا بتطلع المطب وتنزل تحس انك راكب موجه
التويوتا بتخبط ف المطب

يلا , اذواق بردو

الباشا صاحب الموضوع

استني شويه كمان شهر او اتنين
وابدأ اتصل بالتوكيل شوف مهتمين بيجبوا قطع غيارها وعندهم
ولا هيعملوا فيها زي النيو صني

لو لقيتها والدنيا تمام
توكل على الله
حتي لو عربيه فقيره , هتحس بمتعتها وبحلاوه النيسان جدا

[yasserelshakwe]

شكراً للجميع على الردود
انا افضل نيسان
اولاً : نيسان ياباني كامله عكس التويوتا شوية تايلاندي وشوية جنوب افريقي وشوية ماليزي
ثانياً: النيسان اسم كبير جداً في عالم السياارت
ثالثا: انا رأيت سنتيرا 2014 عربية اكثر من ممتازة وجربت قيادتها سهلة وسلسلة وقطع غيارها مثل التويوتا او اغلى بحاجات قليلة جداً
وألف شكر للجميع وكل عام وانتم بألف خير ومصر بخير

[grumby78]

نيسان سنترا عربية أثبتت وجودها في ظروف الخليج الصعبة وعربية واسعة وشكلها جذاب جدا خصوصا فئة 175 الف بوجود الجنوط والسبويلر واضاءة led خلفية وأمامية . انا افضل سنترا . بالتوفيق

[NaderNabil]

شكراً للجميع على الردود
انا افضل نيسان
اولاً : نيسان ياباني كامله عكس التويوتا شوية تايلاندي وشوية جنوب افريقي وشوية ماليزي
ثانياً: النيسان اسم كبير جداً في عالم السياارت
ثالثا: انا رأيت سنتيرا 2014 عربية اكثر من ممتازة وجربت قيادتها سهلة وسلسلة وقطع غيارها مثل التويوتا او اغلى بحاجات قليلة جداً
وألف شكر للجميع وكل عام وانتم بألف خير ومصر بخير

النيسان سنترا تايلاندي و ليست ياباني

و مافيش عربية نيسان ملاكي من الفئات المتوسطة بتتباع في مصر ياباني 100%...لكن هايكونوا مصري - إنجليزي - تايلاندي

[yasserelshakwe]

انا شخصياً مقتنع بنيسان سينترا اكتر من الكورلا

[waleed mohamme]

انا عندى زميلى فى الشغل بيشتكو من التيوتا كرولا 2014 بسبب انها واطية وساعات بتحك فى المطبات

[Sameh samy]

الكورولا كانت واطية في اول 2014 وتمت تعليتها والموجود حاليا كلو عالي 15.5 عفشة رياضية
ردا علي مقارنة التيدا ب 2013 انا معيا 2015 والكورولا لو كانت فضلت بنفس شكل 2013 وامكانياتها مكنتش هاشتريها فياريت نقارن جديد بجديد عشان صاحب الموضوع عاوز يشتري زيرو
بالنسبة لموضوع الخشونة انا بتكلم عن الصني شكل قديم
بالنسبة لموضوع التقفيل كلو موش ياباني الكورولا والسيفيك تركي الصني هندي والسنترا تايلاندي هي واليارس حتي الرينو بقي تركي علي ما اعتقد المهم انها موش فرنساوي وشيفرلية صيني
يعني موش مهم العربية متقفلة فين من الاخر ولو عاوز ياباني مافيش غير الشارك تقريبا
انا قلت رايي سابقا ودي ازواق مع احترامي لجميع التعليقات لولا اختلاف الازواق لبارت السلع

[ahmedadawy]

السنترا
اوسع من الداخل - صندوق الامتعة اكبر من الكورولا. - فيها تكييف في الخلف والكورولا مفيش والتكييف الخلفي ده بقى شئ اساسي في معظم السيارت مش كماليات - السنترا اارتفاعها عن الارض اكبر من الكورولا - خامتها من الداخل تقريبا نفس خامات الكورولا - ده غير انها ارخص من الكورولا

[adelahmed5]

الحقيقه الصنى كرهتنى فى علامه نيسان
نيسان سنترا تايلاندى تقفيله جيد موتورها عادى متواضع عزلها جيد لكن اسعار قطع غيار تبقى مشكله لو كانت زى القشقاى اعتقد التويوتا كورولا صفقه اربح من السنترا
التوكيل كل توكيلات نيسان اقل من المستوى علامه نيسان اكبر من توكيلات الصيانه صحيح اتوايجيبت بدأت جيده ولكن واضح انهم غيروا اداره الصيانه عندهم مهندسين ومهندسات استقبال كوارث
مهندسين المسؤلين عن الاصلاح فى الورشه مصايب الأيدى العامله الفنيين داخل الورشه ناس حافظه مش فاهمه
عايزين يغير زيت ويربط عفشه ولو فيه مشكله بيستسهل ويقولك غير بجديد حتى لو حاجه بسيطه يغير حاجه كبيره علشان يريح دماغه يعنى هيطلع عين حضرتك فى صيانه الغربيه فى كل التوكيلات
ماعرفش التويوتا توكيلاتها ايه لكن النيسان توكيلاتها ناس حافظه مش فاهمه

[yasserelshakwe]

انا اعتقد ان السينترا اوسع من الداخل وسعرها معقول وتقفيلها كمان كويس جداً
بالنسبة للكرولا فتم معالجة موضوع انها واطية شوية
بالنسبة لأنه ما فيش حاجه اسمها ياباني ده حقيقي تقريباً ولكن المازدا 3 ياباني تماماً
ولكني اعتقد كله زي بعضه في التقفيل وترجع فقط لسمعه الوكيل وقطع الغيار متوفرة وسعرها مناسب للسوق المصري
الكرولا سعرها مبالغ فيه شوية لو قارنها مثلاً بالنيسان السنيترا او بالرينو الفلوينس او حتى بالمازدا 3 وكمان لو نظرنا للفورد فوكاس هنجد انها ارخص من التويوتا كرولا ولكن الفورد فوكس قطع غيارها مثل المرسيدس ولكنها عربية روووووووووووعة
ولو اتفقت الاراء لبارت السلع

[Mohamed.Hany]

كامل احترامي للسنترا و لكن
الكورولا اوسع منها بشوية حلوين ده بتجربة الاتنين علي ارض الواقع و كمان بقياسات ابعاد العربيتين الكورولا اطول و اعرض .
اما بالنسبة للاوبشنز ففي فرق كبير جدا لصالح الكورولا مش هقول بتفرق في ايه لانها حاجات كتير جدا و يكفي ان السنترا هاي لاين تكيفها بكر القديم اللي بينزل في الفيرنا اللي بتحول فيه الهوا من الداخل و الخارج بدراع شداد يمين و شمال .
اما بالنسبة لعوامل الامان فدي بصراحة فرق رهيب لصالح الكورولا من esp و trc و ebl و hac و follow me home
و بالمناسبة تقفيلها تايلاندي في اول دفعتين و الدفعات القادمة هتكون تقفيل مصري ، ليس تقليلا من العربية و لكن فعلا في فروق جوهرية مبين الكورولا و السنترا

[saint2011]

شوف حضرتك السنترا عربية كويسة وعاملة شغل كبير جدااا فى الخليج وأثبتت كفاءه وعلى فكرة السنترا أللى موجودة دلوقتى خليجى سعودى وبعد سنة هيتم تصنيعها فى مصر طبعا هى مش نفس أوبشنز الكورولا او الفلوانس لكنها عربية محترمة وأحسن من الكورولا التى لا تستحق ثمنها من وجهه نظرى وسعرها مبالغ فيه والناس بتشتريها عشان ثقة فى أسم تويوتا يعنى شيل علامة تويوتا من عليها وقيمها كعربية سعرها ميعديش 150 الف جنية مش عربية سعرها يعدى220 الف جنية يبقى كده أركب أسكودا a7 الفئه الثانية عربية أوروبى ومحترمة و النهاية توكل على الله السنترا هتعجبك ومتأخدش كلام حد كنتيجة مسلم بها روح أعمل تست دريف عند السبع وتأكد بنفسك من العربية ومبروك مقدما