الجنط 19 في القشقاي ميزه ولا عيب

[Sherif Lotfy]

القشقاي الجديده توب لاين بجنط 19 يا ترى ده ميزه علشان الاتزان ولا عيب بسبب مطبات مصر ؟ مع مراعاة أنها suv مش سيدان و العربيات العاليه كلها بتنزل بجنوط كبيره بتوصل لعشرينات في الشيروكي و الرانجلر . رجاء الافاده يا جماعه و شكراً جزيلاً

[a7med ezz 20]

مش دي المشكلة ، المشكلة للاسف انها تربو يعني عايزة بنزين فوق 95 .

[zangry]

اعتقد هيبقي عيب عشان هتبقي ناشفة جدا والكاوتش هيعمل بلالين عشان رفيع

[Hosam_Optrawy]

عيب بسبب مطبات مصر

الجنوط ال 19 مقاس الكاوتش بتاعها 225/45

سمك الكاوتش = 10 سم تقريبا

اما الجنوط ال 17 مقاس الكاوتش بتاعها 215/60

سمك الكاوتش = 13 سم تقريبا

فرق كبير فى الراحه وامتصاص الصدمات والمطبات والنقر ، غير ان فرق العرض من 215 ل 225 مش هايعمل الفرق الكبير في الثبات ، وممكن فى المستقبل تغيير الكاوتش بمقاس 225 على نفس الجنط ال 17

[Sherif Lotfy]

مش دي المشكلة ، المشكلة للاسف انها تربو يعني عايزة بنزين فوق 95 .

معظم العربيات الجديده تربو و ماشيه بنبزين 92 عادي . و هي استهلاكها هيكون قليل جدا لان الموتور صغير و تربو فالواحد ممكن يحط 95 و مع الوقت فرق السعر بين ال 95 و 92 هيقل لأن الدعم هيقل تدريجياً لحد ما ينتهي في 5 سنين تقريبا . شكرا على اهتمامك بالبوست

[Sherif Lotfy]

عيب بسبب مطبات مصر

الجنوط ال 19 مقاس الكاوتش بتاعها 225/45

سمك الكاوتش = 10 سم تقريبا

اما الجنوط ال 17 مقاس الكاوتش بتاعها 215/60

سمك الكاوتش = 13 سم تقريبا

فرق كبير فى الراحه وامتصاص الصدمات والمطبات والنقر ، غير ان فرق العرض من 215 ل 225 مش هايعمل الفرق الكبير في الثبات ، وممكن فى المستقبل تغيير الكاوتش بمقاس 225 على نفس الجنط ال 17

شكرا يا باشا على النصيحة و على تعبك في الإجابه المفصلة دي . ممكن اعرف رأيك عموما في القشقاي الجديده؟

[wal]

الميزة انك تحس ان العربية نازلة كاملة زي برة او شبه كاملة لأن اكيد متنفض منها حاجات كتير

[Sherif Lotfy]

اعتقد هيبقي عيب عشان هتبقي ناشفة جدا والكاوتش هيعمل بلالين عشان رفيع

شكرا على التعليق .

[marwanragab]

عربية محترمة و كماليات رائعة و فعلا السؤال في الجنط دة مهم عشاان الطرق في مصر بس ازاي الرانجلر والجيب والحاجات دي بتنزل جنط 19 ومفيهاش مشكلة ولا هيا بتفرق في حاجة احنا مش عارفينها ?

[ENG.MaRk]

الفرق في قطر الجنط و عرض الكاوتش كلها عوامل أساسية للثبات و ليونة العفشة ... الثبات بيزيد بزيادة القطر و العرض بس النشوفية بتزيد و ده بيتحكم فيه سمك الكاوتش و نوعه و أعتقد العضو الكريم Hosam_optrawy قال كل المفيد

[mohaismail]

بصراحة المشكلة الأكبر في البنزين

[a7med ezz 20]

معظم العربيات الجديده تربو و ماشيه بنبزين 92 عادي . و هي استهلاكها هيكون قليل جدا لان الموتور صغير و تربو فالواحد ممكن يحط 95 و مع الوقت فرق السعر بين ال 95 و 92 هيقل لأن الدعم هيقل تدريجياً لحد ما ينتهي في 5 سنين تقريبا . شكرا على اهتمامك بالبوست

للاسف مكتوب عليها ينصح باستخدام بنزين 95 ، طبعا فرق السعر من 92 ل 95 تقريبا 3 اضعاف ، يعني استحالة فرق السعر بين الاتنين يتعوض بفرق الاستهلاك

[Sherif Lotfy]

للاسف مكتوب عليها ينصح باستخدام بنزين 95 ، طبعا فرق السعر من 92 ل 95 تقريبا 3 اضعاف ، يعني استحالة فرق السعر بين الاتنين يتعوض بفرق الاستهلاك

هو الفرق فعلا كبير بين 2.60 جنيه و 6 جنيه وربع . و فعلا الاستهلاك مش هيعوض الفرق . ممكن احط 92 و معاه محفز اوكتان أو مره 92 و مره 95 . انا عارف ان الكلام ده مش عملى بس كل اللي راكبين جيتا و باسات و بيجو 508 و 3008 و اوبل انسجنيا. بيعملوا كده . لاحظ يا باشا أن الكماليات اللي في الفئة التانيه ب 215000 مش موجوده في الاوكتافيا و البيجو 508 غير في الهاي لاين. انا بتكلم عن تكييف تاتش و جنوط أسبور و البصمة و زرار ستارت انجين و سقف بانوراما و نور أمامي زينون و ليدات . دي برضه فلوس .

[Hosam_Optrawy]

شكرا يا باشا على النصيحة و على تعبك في الإجابه المفصلة دي . ممكن اعرف رأيك عموما في القشقاي الجديده؟

اللى عاجبنى في القاشقاى الجديده طبعا الشكل ، وكماليات الفئه التانيه لو فعلا ب 215 الف زى ماقريت المواصفات والسعر على المنتدى تبقى أكتر من ممتازه

اللى مش عاجبنى

الموتور حتى لو إشتغل مع بنزين 92 بدون مشاكل ، وحتى لو طلع كل قدرة الموتور ودى أشك فيها ، أداء العربيه مازال يعتبر ضعيف شويه ، زى أداء القديمه بالموتور ال 1600 ، في ناس كانت قابله بيه وشايفاه عادى وناس كانت بتشوفه ضعيف وتتجه للسبورتاج وال ix35 لانهم أفضل في النقطه دى

غير الموتور في حاجه كمان مهمه جدا وهى العفشه ، تغيير التعليق الخلفى من Multi-Link ل Twist-Beam اكيد نقطه مش في صالحها ، كدا كأنها جوك بس أكبر شويه

[hossam4t]

الفرق في نوع الجنط
لو high profile مفيش مشكله