حد يعرف الجوك كويسه ولا فاشلة؟ وهى ولا استرا 2015؟

[ggabal]

صباح الفل؟ عايز حد يفيدنى هل الجوك عربية كويسة؟ ولا ظهر فيها مشاكل؟ عايز اشتريها لأختى وبنفاضل مابينها ومابين اوبل استرا 2015 عشان فى نفس الثمن؟ ممكن حد يساعدنى ؟

[dreslam]

دي فئه ودي فئه...الجوك في فئتها متفوقه وتقفيل انجليزي واوبشنز عاليه جدا في مقابل تمنها..بس الكنبه الخلفيه ضيقه وشنطتها في الموديل 2015 اوسع من قبل كده لكن يادوب تفي بالغرض..لكن تظل الجوك ركوبه ناعمه وسلسه ومشاكل شبه معدومه فيتيس وموتور حلوين جدا واوبشنز رائعه وعفشه قويه وفوق كل ده خمس نجوم في الامان وعاليه عن الارض

[ashouhdy]

لو لبنت او ست فالجوك احلي ... عشان عالية

[hotmail]

طيب انا هقولك شئ شوف التيدا الجديده انا لسه شايفها امبارح عربيه مفيهاش غلطه ومناسبه جدا للبنات انا معرفش حاجه عن الجوك مجرد اقتراح ومش هتخسر حاجه لو شوفتها وبالتوفيق

[gundal]

والله dreslam قال اللي كنت عايز أقوله .. أنا معايا جوك 2014 مش المعدلة الجديدة وعربية ممتازة الحمدلله .. مريحاني جداً .. سحبها حلو وموتور وجير تمام قوي .. اوبشنز تمام عالية عن الأرض وثابتة جداً حتى مع السرعات العالية .. وأكتر حاجة عجباني فيها العزل الداخلي ممتاز .. عيبها فعلأ موضوع الشنطة ضيقة.. الكنبة الخلفية ضيقة .. لو عائلة صغيرة أو مبتركبش ناس كتير يبقى العربية هتنفعكم .. فيه عيب كمان يمكن متقالش وهو تانك البنزين اخره 40 أو حاجة و اربعين لتر .. مش كبير للأسف .. بس مش ممثلي أي مشكلة الموضوع ده .. ده غير إنها مش كبيرة في الحجم يعني سهل تعدي بيها بين العربيات أو الأماكن الضيقة .. عربية ملمومة بمعنى أصح .. لو حضرتك في الشيخ زايد ممكن افرجك على العربية على الطبيعة لو تحب .. وبالتوفيق إن شاء الله ..

[islam abaza]

طالما لبنت يبقى ارشحلك الجوك و ذلك لا ينقص من الاسترا فى شىء

[moh-crv-2000]

شباب سؤال لو سمحتم لنفس الموضوع لاني لما شوفت الجوك بقيت محتار جدا بينها وبين البيجو 3008
امكاناتها وسعرها افضل بكتير من البيجو 3008 لكن سؤالي في الكنبه الخلفيه هل تاخد اتنين مرتاحين ولا الكنبه الخلفيه للاطفال بس
تاني شي هل هيه بتاعة مشاوير طويله يعني ساعتين ثلاته باستمرار ولا جوه المدينه بس
انا محتار بينها وبين البيجو 3008 موديلات 2015
بالسعوديه سعرها كاش فل اوبشن 73 والبيجو الاستاندرد بس 82000 اما الفل اوبشن للبيجو 93000 ففيه فرق واضح بالسعر ده غير ان القوه الحصانيه للجوك اعلي لكن المساحه الداخليه هيه المشكله

[Omar_4ever]

معايا جوك 2015 عاملة 5000 كيلو مفيهاش مشاكل
الأوبشنز وعوامل الامان والثبات والشكل مقابل تمنها معقول جدا

[moh-crv-2000]

استاذ عمر .مش فاهم معقوله جدا دي تقصد ان الاوبشن الي فيها مش عالي ولا ايه
وبخصوص المساحه الداخليه .كام واحد بيقدرو يجلسو مرتاحين فيها اقصد الكنبه الخلفيه
لاني عاوز اجيبها بس هتكون لاسره مش لفرد يعني لازم تكون مريحه في الجلوس لمدة مثلا ساعه او اتنين للناس الي راكبه بالخلف
ايه رايك

[احمد فهمى]

عربيه تقفيل انجليزى ومتقدمه جدآ ثبات وتسارع ممتاز وعاليه عن الارض وخامات الصالون ممتازه ومثبت سرعه وesp من تجربتي لها افضل من الاوبل فى الاعتماديه اكيد وكماليات والشكل

[ggabal]

الف الف شكر يا جماعة شكرا عالمساعدة جدا.... وشكرا استاذ gundal ... انا كده كده رايح معرض اوتوماك وهتفرج على كلو بإذن الله ... متشكر جدا مره تانية

[ggabal]

والله dreslam قال اللي كنت عايز أقوله .. أنا معايا جوك 2014 مش المعدلة الجديدة وعربية ممتازة الحمدلله .. مريحاني جداً .. سحبها حلو وموتور وجير تمام قوي .. اوبشنز تمام عالية عن الأرض وثابتة جداً حتى مع السرعات العالية .. وأكتر حاجة عجباني فيها العزل الداخلي ممتاز .. عيبها فعلأ موضوع الشنطة ضيقة.. الكنبة الخلفية ضيقة .. لو عائلة صغيرة أو مبتركبش ناس كتير يبقى العربية هتنفعكم .. فيه عيب كمان يمكن متقالش وهو تانك البنزين اخره 40 أو حاجة و اربعين لتر .. مش كبير للأسف .. بس مش ممثلي أي مشكلة الموضوع ده .. ده غير إنها مش كبيرة في الحجم يعني سهل تعدي بيها بين العربيات أو الأماكن الضيقة .. عربية ملمومة بمعنى أصح .. لو حضرتك في الشيخ زايد ممكن افرجك على العربية على الطبيعة لو تحب .. وبالتوفيق إن شاء الله ..

سؤال جديد معلش ..... اخبار اسعار صيانتها ايه واسعار قطع غيارها ايه لو تعرف؟ وايه افضل توكيل ليها؟

[Omar_4ever]

استاذ عمر .مش فاهم معقوله جدا دي تقصد ان الاوبشن الي فيها مش عالي ولا ايه
وبخصوص المساحه الداخليه .كام واحد بيقدرو يجلسو مرتاحين فيها اقصد الكنبه الخلفيه
لاني عاوز اجيبها بس هتكون لاسره مش لفرد يعني لازم تكون مريحه في الجلوس لمدة مثلا ساعه او اتنين للناس الي راكبه بالخلف
ايه رايك

معقولة اقصد بيها صفقة رابحة

بص انا هقولك كل الأوبشنز

الفرامل والأمان : ABS, EBD , BA , BRAKE LSD + 4 air bags
الثبات : VSC الي هو ESP في العربيات الكوري الي هو ELECTRONIC STABILITY CONTROL
اهم ميزة مش موجودة غير في الجوك انك بتحكم في الكمبيوتر ما بين NORMAL / SPORT / ECO
الفرق بيهنهم بيكون في تقل الطارة وتسارع العربية وتوفير البنزين

العفشة : راضية بس طبعا مش مريحة بنسبة 100% عشان الجنوط ال 17

الدلع : داي لايت ليد امامي وزينون وليدات خلفية ، مثبت سرعة ، محدد سرعة ، كمبيوتر رحلات ، فوجات امامية / خلفية ، مساحات مطر اوتوماتيكية، مرايات كهرباء / ضم كهرباء ، جنوط 17 مقاس 215/55 ، كمبيوتر للسائق ، زجاج فاميه جانبي وخلفي ، تكيف اوتوماتيك ، طارة مالتي فانكشن ، بلوتوث ، USB /AUX / IPOD/CD

الحاجة الوحيدة الي مش موجودة فتحة السقف

فاعتقد كل الأوبشنز ديه في عربية يايابني تقفيل انجليزي وبالسعر ده تبقى صفقة كويسة


المساحة الداخلية : الراكبين الأمامين مرتاحين جدا وسافرت بيها مسافات طويلة بدون اي تعب
الخلفية : متنفعش لناس كبار لأنها ضيقة حدا بصراحة
الشطنة مساحتها بقت معقولة عن الشكل القديم 356 لتر


افضل وكيل : السبع ، اوتو ايجيبت

انا شريها من السبع واول صيانتين محانا مدفعتش مليم وغيرت الزيت مرتين

اسعار الصيانات : زي اي عربية بالنسبة للمصنعيات ، فلتر الزيت ب 70 جنيه ، فلتر الهواء كل 20 الف ب 260 جنيه ، بوجيهات كل 100 الف ب 650 جنيه ، تيل فرامل 650 جنيه


من الآخر ميعبهاش غير ضيق الكنبة الخلفية

[ggabal]

يا باشا انا متشكر جدااااا وربنا يباركلكوا فيها وفى عربياتكو

[akodous]

عربيه هايله كانت معايا 2014 ...ضيقه جدا من ورا ....قطع غيار غاليه...التيل بعد الضريبه ب 900 جنيه وبيتغير بسرعه قبل ال 20000 كيلو يعني ...ده غير اني كنت سامع اسعار عجيبه يعني الكوبلن مثلا ب 18000 جنيه زي القاشقاي(ده مش اكيد )بس الاسعار دي حد حاططها في المنتدى هنا ....هي هايله بس الوكيل مش مهتم بيها الصراحه