ما الفرق بين الصنى ال n16 و ال n17

[Maory]

السلام عليكم

أرجو أن يتفضل عضو كريم باخبارى بالفروق بين ال 16 و ال 17 فئة أولى من حيث الامكانيات والشكل والاسعار والجودة اذا وجد

مع جزيل الشكر

ملحوظة: السعر يكون للكاش تسليم فورى

[salam100100]

N16 الشكل القديم
n17 الشكل الجديد

الاثنين تجميع مصرى
فى على الفيس بوك صفحه ممكن تساعدك فالاسئله دى زى الاسعار عشان الاسعار اللى على كونتاكت كارز لا تمت بصله بارض الواقع

[volociximab]

الى16 بتاعتى

[volociximab]

و عليكم السلام و رحمة الله و بركاته

[mummy_47]

تقرير منقول من SonaSteel
عضو بلاتيني
اللينك http://www.nilemotors.net/Nile/341896-a.html
----------------------------
بسم الله الرحمن الرحيم
الحمد لله والصلاة والسلام علي النبي محمد وعلي اله وصحبه وسلم

نبدأ بالقديمة علشان هي اللي معايا ..... وهاختم بالجديدة بناءا علي التيست درايف اللي عملته ومن كلام ملاك الجديدة وهما يراجعوني ان شاء الله

مبدئيا الشكل اذواق ........ ممكن حد يقبل شكل مش عاجب الناس علشان مميزات هو شايفها انسب ليه والعكس.

1- الصني الشكل القديم بداية من 2010 الفيس ليفت وحتي الان



* حاليا الصني الشكل القديم EX saloon فقط.... مستمر انتاجها (مانيوال - اوتماتيك) بأير باج واحد للسائق وبدون منظومة الABS .

المميزات ... ماشاء الله

1- ماتور محترم جدا ...1600 CC ... هورس باور 118 علي 6200 rpm
اقصي عزم ليها تقريبا 148 ن.م علي 4400 rpm
ماشاء الله السحب فوق فوق فوق الممتاز والتجميع حلو وبعد rpm 4000 .... العربية بتتحول ماشاء الله
بس علي حساب البنزين :))

2- صاج محترم جدا وتقيل .... ماعدا الاكصدامات نقطة الاتصال مع البادي ضعيفة بس الميزة انها الاكصدام مش كبير زي الجديدة او العربيات الجديدة كلها تلاقيه واحد لغاية نص الرفرف.

3- العفشة ناشفة (انشف من الجديدة ) مش اوي ...... يعني علي سبيل المثال:
مقارنة بالتويوتا .......... انشف
مقارنة بالسيراتو ..........انعم

4- الثبات ممتاز ماشاء الله علي الطوالي وفي الملفات وفي الغرز..... وعلي حسب سواقتك
بس فيه ميزان المفروض بينزل في السوبر صالون امامي وخلفي ... ده ركبته و فرق في الملفات جدا وثبتها اكتر .

وعلي كلام م/ احمد امبارح علي الدايري وقت الهوا الشديد
الشكل القديم جاب لغاية 130 كم/ س
والشكل الجديد قالي معداش ال90 كم/س

5-الكاوتش بينزل فيها بريدجستون بس معرفش الياباني ولا بلده ايه.

6- الحوض ماشاء الله واسع جدا فسهل في الصيانة .... وده جاي علي حساب الصالون.

7- انا شايف الرؤية في القديمة احسن كتير ..... علشان العربية مش عالية ومرايات الاجناب اكبر و الرؤية الأمامية احسن.

8- الخامات انا شايف انها احسن من الجديدة وخاصة التابلوه واماكن التخزين اكتر.

9- البنزين انا مش متضايق منه لان زيه زي اي عربية 1600 واحسن من عربيات 1600 كمان ماشاء الله

انا بعمل 212 كم في الصفيحة ماشاء الله وبحرق مستمر.(عربيتي مانيوال)

10- بار الحماية امام الماتور .. بار صلب بكامل وش العربية لتجنب الصدمات الامامية والجانبية.



العيوب اللي انا واجهتها :

1- الكراسي ..... انشف ما يكون (سيرامييييييييك )هههههههههههههه وبعد فترة
مش عارف بقي علشان الوزن ولا علشان الفوم كثافته كبيرة ولا ايه مش عارف بس تعبتني جدا لغاية ما غيرته الحمد لله.

2- مشاكل الضفيرة ..... غيرتها في الضمان (هي مش بتأثر علي حاجة بس روشة الRPM كانت مضيقاني)

3-الكنبة ضيقة علشان مرجع الكرسي علي الاخر ........ لو حد مش طويل مش هاتبقي مشكلة خالص.

4- التابلوه شكله كلاسيك جدا ....... والجزء اللي فيه الكاسيت تحتيه التكييف تحيته الدرج
كان من راي يخلوا الكاسيت فوق الدرج علشان نعرف حتي نركب DVD ولا كاسيت دبل دن .


الصني الشكل الجديد بداية من 2013

هذه الصورة تم اعادة تحجيمها . الحجم الافتراضي لها هو 1024x691.


وتتوافر ب3 فئات ....... اساسي فيهم (2 ايرباج للسائق والراكب الامامي + منظومة الABS كاملة)

-اول فئة .. مانيوالن
- ثاني فئة ... اوتوماتيك
- ثالث فية ... سوبر صالون اوتماتيك

وللفروق يرجي قراءة اللينك المرفق لأخي وحبيبي أحمد تي في

حصريا : نيسان نايل توضح بالصور الفرق بين الصنى 2013 :: Super Saloon .. VS .. EX :: (حصريا : نيسان نايل توضح بالصور الفرق بين الصنى 2013 :: Super Saloon .. VS .. EX ::)

المميزات ... ماشاء الله

1- الوسع ..... ماشاء الله اوسع عربية في فئتها بلا مبالغه و تصميم داخلي جميل.

2- استهلاك البنزين احسن لانها 1500 وبتعمل ارقام ممتازة في الصفيحة من كلام الاعضاء.

3- خامات الكراسي والتنجيد ممتاز ماشاء الله .

4- مروحة خلفية لتوزيع الهواء للمقصورة الخلفية.

5- الثبات كويس علشان فيه ميزان امامي وخلفي في كل الفئات ... بس يعيب العربية انها عاليه فبتتأثر بالهوا .

6- التقفيل المصري فيها ممتاااااااز ولو محدش يعرف انها تقفيل مصري مش هايعرف يفرق اصلا.

7- السوبر صالون كماليتها ممتازة جدا جدا جدا وفرق الفلوس يستاهل
-التابلوه تصميمه انيق جدا
- العدادات الديجتال جميلة
- كمبيوتر رحلات
-مالتي فانكشن ( مفتقده جدااااا ههههههههههههه )
- النواكل في الابواب والطارة والفتيس
-السبويلر.
- االايموبلايزر.
-باور ستيرنج كهرباء.

العيوب :

1- الماتور 1500 CC....... هورس باور 108 حصان (هذا الرقم المذكور في التوكيل لكن الحقيقي هو 99 حصان)
137 عزم نيوتن لكل متر تقريبا عند 4400 RPM برده
وده كان مشكلتي معاه .... لو كان 1600 زي القديمة كان ممكن افكر فيها ... بس اكيد حطوه علشان استهلاك البنزين.
يعني اللي معاه القديمة وناوي علي الجديدة يشوف موضوع الماتور ده الاول ان شاء الله ... لو متقبله يتوكل علي الله .

2- الصاج .... ضعيف جدا مش عارف قصدهم يخففوا العربية ولا ايه في النقطة ديه
بس انا مشوفتش عربية جديدة الا والخبطات اللي فيها خفيفة بس مأثرة فيها.

3-العفشة ناعمة مش اوي بس متضايقش من كتر الدبدبة (تقريبا نفس منظوكة العقشة في الشكل القديم) .

4- الثبات : هايبقي اقل من القديمة لكذا سبب
ارتفاع سقف العربية ..... الباور الكهربا بس الباور بتاع نيسان محترم حتي الكهربا.... الكاوتش ال185 علي العرض العربية حاسه مش مظبوط وبيبان من ورا العربية جدا
محتاجة تعرض الكاوتش.

5- الكاوتش : ماكسيس صيني و ملاك السيا معجبهمش غالبا للخشونه والصوت العالي.

6- الحوض ضيق جدا طبعا .. هايبقي صعب في الصيانة بس جاي علي حساب الصالون الواسع.

7- الرؤية محدودة بسبب ارتفاع العربية والمرايات الاجناب الصغيرة.

8- خامات الابواب والتابلوه ....... السوبر صالون فيهاجزء قماش وده ظبط الموضوع شويه.

9- اماكن التخزين اقل من الشكل القديم .

*بالنسبة للتكييف والشنطة ........ اعتقد مفيش فرق في النقطة ديه للعربيتين

ده تقريبا اللي فاكرة دلوقتي ..... ولو فيه اي اضافة او تعديل من ملاك الصني الجديدة برجاء التوضيح.
وفيه مواضيع كتييييرة في مكتبة نيسان الشاملة في المواضيع المثبتة
برجاء قراءتها للافااااااادة التامة ان شاء الله

المـكـــــتـبـة الشــامـلـة لجـــميـع مـوضـــــوعـات ســـيارات نيـســـان

اتمني اكون قدرت اوضح الفرق .... واسف للاطالة

أقعدوووا بألف عافية :)

سبحانك اللهم وبحمدك... أشهد ان لا اله الا انت ... استغفرك واتوب اليك

[Maory]

شكرا على المعلومات
والحمدلله قمت بشراء ال 17 اليوم ومفترض انها فئة أولى ومفيش باركنج سنسورز ولا سبويلر حسب ماكنت عارف قبل الاستلام لكن بعد الاستلام وجدنا فيها الاتنين!!!

[volociximab]

تقرير جميل
اضيف الصنى الخليجى حتى قبل 2010 n16
العفشة ناشفة بغباء بس بتتعود

[mahmoudelazab]

بص لصني الجديدة مش ياباني القديمة كانت ياباني دي الخلاصة الجديدة زي أى عربية صيني و لا كوري أوبشن بس كوالتي نازلة القديمة متينة بس أوبشن قليل