استفسار عن مياه داخل صالون نيسان

[ya3mm]

السلام عليكم ورحمة الله وبركاته

صباح الخير ... اليوم صباحا لاحظت وجود مياه في أرضية السيارة من الداخل عند الكرسي الأيمن بجانب السائق ومياه ليست قليلة وأيضا ليست كبيرة جدا ... وبفحصي للسيارة من اسفل التابلوه لاحظت نزول مياه من تحت التابلوه في منتصف السيارة تماما (تحت مكان الكاسيت) حدث مرة من فترة ذلك في الشتاء ولكني اعتقدت ان المياه من خارج السيارة بسبب الغسيل ولكن اليوم لاحظت ان المياه مصدرها تحت التابلوه ... هل هذه المياه من التكييف مثلا؟ ام من الغسيل فعلا وما الحل؟؟؟ علما بأن السيارة نيسان صني الشكل الجديد والحمدلله لايوجد أي مشاكل أخرى
ارجو الرد ممن يعلم حيث ان المكان الذي تنزل منه المياه به اسلاك كثيرة وربنا يستر

محمد

[salam100100]

فى عضو كان شارك بنفس المشكله دى وكان السبب وجود كسر فالبلاستك الموجود تحت المساحات اللى هو مابين الزجاج الامامى والكبوت
كل مره بيغسل العربيه كان بيلاقى الميه دى فالدواسات

يمكن دا السبب

[salam100100]

هل فى اى اعراض اخرى مع ظهور المشكله؟
* هل دا بيظهر بعد غسيل العربيه؟
* هل بيظهر بعد تشغيل التكييف؟
* هل العربيه بتسخن؟

[ya3mm]

المشكلة دي حصلت مرة قبل كده من حوالي 6 شهور لكن للأسف المرتين كنت مشغل التكييف ، طبعا مش عارف اذا كانت بتسخن ولا لأ لانهم منهم لله مش مركبين امبير حرارة لكن الحمدلله لمبة الحرارة ما نورتش ، الميه جاية بالظبط من قطعة بلاستيك سوداء تحت التابلوه اللي تحت الكاسيت بالضبط يعن في نص العربية ، انا سبتها تبرد وحكشف على ميه الرادياتير اشوفها نقصت ولا لأ ، وعلى فكرة المرتين اللي المية نزلت فيهم كانت العربية مغسولة بالميه ... بس من بره يعني مش غسيل موتور :(

[ya3mm]

حشوف برضه البلاستيك اللي من بره العربية اللي تحت الزجاج الامامي اذا كان مكسور ولا لأ

[دعبدالرحيم]

اعتقد دي سربنتينة السخن لو المية بتنقص يبقي غالبا هي والحل الغائها لانها كدا اتخرمت..او ممكن مش ميه ممكن تسريب زيت

[jos]

دى مايه من الغسيل الخارجى بتتسرب لجوه بس بتاخد وقت يعنى بعد الغسله بيوم ولا حاجه الموضوع ده حصل معايا مرتين ورايح الصيانه وهقولهم عليها بس يا ريت كنا نبلغ عشان يعرفوا انها مشكله عامه

[ya3mm]

صباح الخير .... النهائي ان الميه دي من غسيل العربية لما بيتم الغسيل بكمية ميه كبيرة الحمد لله مش من التكييف ، بس برضه معرفتش الحل للموضوع ده ايه ، حاولت ابص على المكان اللي ممكن بيسرب ميه جوه الصالون لكن للأسف معرفتش ، ياريت لو حد يعرف يقولنا

[ya3mm]

السلام عليكم ورحمة الله وبركاته

رحت انهارده الصبح التوكيل عشان الصيانة وقلتلهم على المشكلة بتاعة تسريب مياه الغسيل داخل السيارة وبالصدفة كان في واحد قبلي عنده نفس المشكلة وكان بيتخانق عشان عربيته مازالت في الضمان وهما بيطالبوه بدفع تكاليف الإصلاح ... المهم .. قلت لمهندس الاستقبال على المشكلة دي وقالي ان المية من غسيل العربية بسبب ان فتحات تصريف المياه اللي موجودة تحت البلاستكة السوداء اللي تحت المسحات بتتسد من ورق الشجر والتراب وكتب كده في امر الشغل (تسليك فايز غسيل تحت التوربيد) وتكلفة التسليك ده 120 جنيه ... بصراحة ما قلتش أي حاجة لان الشخص اللي قبلي كان بيتخانق بسبب الموضوع ده وفي الآخر دفع برضه
بس الموضوع طلع سهل وممكن أي حد يعمله مش محتاج يعني التوكيل
ان شاء الله ما يظهرش حاجة تانية غير طبيعية في العربية الفترة الجاية
وشكرا :)

محمد

[salam100100]

شكرا ليك
وشكرا لمشاركتك واهتمامك انك توصلنا عملت ايه وصلحت العيب ازاى
بكدا المنتدى يكون ايجابى
شكرا مره تانيه