مشكلة بسبب لمبة التشيك انجن

[CAPOOMAN]

معايا نيسان صني 2012 سوبر صالون بحالة جيدة لكن عندي مشكلة ان لمبة التشيك منورة كشفت عليها كمبيوتر في اكثر من مكان وقالوا ان العيب حساس الكرنك وبعد تغييره لم تغلق اللمبة ولا يستطيع الجهاز مسح العطل
رحت مودرن موتورز الدقي كشف وحدد العطل في نفس الحساس وتم تغييره ولم تحل المشكلة ولم يتم مسح العطل
ياتري ايه الحل مع العلم انهم قالولي انهم مضرين يفكوا الموتور بالكامل والتكلفة المبدئية 5 الاف جنيه مع العلم ان العربية مفيهاش اي مشكلة وماشية تمام بدون اي مشاكل

[volociximab]

موتور ايه الى يتفك عشان حساس كرنك
بالنسبة للصنة القديم هناك حساسين..حساس كرنك موجود يسار فلتر الزيت و حساس كامة موجود امام كوعة الماء و الاثنين واحد
و بعدين يمن لو فصلت البطارية ساعتين العلامة تروح
انما تفك المتور ليه

[tasaka]

اكتب كود العطل هنا اللى بيظهر عندك او الاكواد كلها ان كان فيه اكثر من كود عطل ..

و ان شاء الله تلاقى حد يساعدك

[bluemail]

يا راجل صلي علي النبي
والناس اللي قالتلك كده اوعي تروحلهم تاني لاي سبب
اعمل ريست للبطاريه وشوف النتيجه
وعموما لو لا قدر الله ماظبتش امش كده عادي
طالما انت عارف انه عيب حساس

سؤال جانبي انت مغير البوجيهات امتى؟

[tasaka]

والناس اللي قالتلك كده اوعي تروحلهم تاني لاي سبب

+1`

[tasaka]

معايا نيسان صني 2012 سوبر صالون بحالة جيدة لكن عندي مشكلة ان لمبة التشيك منورة كشفت عليها كمبيوتر في اكثر من مكان وقالوا ان العيب حساس الكرنك وبعد تغييره لم تغلق اللمبة ولا يستطيع الجهاز مسح العطل

بص .. ده مفهوم خطأ شائع جدا جدا .. موش فى مصر بس .. نفس الشيئ بيحصل فى دول اجنبيه

العربيه فيها مجموعه من النظم الفرعيه .. و على كل نظام فرعى فيه حساس او مجموعه من الحساسات

لما تحصل مشكله فى النظام الفرعى ده .. الحساس او مجموعه الحساسات حتقرأ القيم وترسلها للكمبيوتر .. الكمبيوتر يلاقيها موش فى الحدود المفروض تكون فيها .. يقوم يعطى كود عطل ان المجموعه الفرعيه كذا فيها عطل

طبعا الكمبيوتر موش بيكتب لك اسم المجموعه الفرعيه .. و لكن بيكتب لك كود عطل بيدل على اسم الحساس اللى راكب على المجموعه الفرعيه دى .. علشان انت تراجع على جميع مكونات المجموعه الفرعيه دى و تعرف الخلل قين بالظبط ( موش علشان تغير الحساس المكتوب فى تفسير كود العطل )

و كتير جدا بيكون الحساس سليم ( لانه اعطى القراءه الحقيقيه للكمبيوتر ) و العيب فى جزء ميكانيكى اخر فى النظام الفرعى .. أو كتير جدا بتكون التوصيلات الكهربائيه للحساس ( الفيشه ) هى سبب القراءات الغير سليمه للحساس او ان الارضى موش كويس

فطبعا لما تغير الحساس حتفضل اللمبه منوره لان السبب ما زال موجود

رحت مودرن موتورز الدقي كشف وحدد العطل في نفس الحساس وتم تغييره ولم تحل المشكلة ولم يتم مسح العطل
ياتري ايه الحل مع العلم انهم قالولي انهم مضرين يفكوا الموتور بالكامل والتكلفة المبدئية 5 الاف جنيه مع العلم ان العربية مفيهاش اي مشكلة وماشية تمام بدون اي مشاكل

اقل شيئ يقال عن من يفعل هذا .. اتهم مجرمين .. انهم نصابين

و لو فرع مودرن موتورز ده توكيل ؟؟ .. يبقى ما تروحش لهم تانى .. او على الاقل الفرع ده .. و يستحسن بعد كده اتعامل مع الفرع الرئيسى




و انسى موضوع فك موتور .. لغايه ما تضع اكواد الاعطال اللى طلعت لك هنا ..

و الاكواد دى حتحدد المشكله بالظبط و مسبباتها المحتمله بالترتيب .. و خطوات الكشف و الاصلاح بالترتيب .. طبعا الاسهل فالاصعب

[CAPOOMAN]

انا شاكر جدا لمساعدتكم وهجيب الاكواد واكتبها هنا ان شاء الله

[tasaka]

انا شاكر جدا لمساعدتكم وهجيب الاكواد واكتبها هنا ان شاء الله

ده رابط موقع اعطال
و الصفحه هى كمثال علشان تعرف طريقه الموقع فى تحديد مسببات العطل و الحلول بالترتيب

اكرر ده رابط صفحه كمثال توضيحى فقط لك لكود عطل p0173

https://www.obd-codes.com/p0173

بالنسبه لك .. ضع كود العطل اللى ظهرلك فى الموقع ده و شوف الاسباب و خطوات الحل

[م/أحمد عبد الفتاح]

سينسور الكرنك بيعتمد فى عمله على قرص معدنى فيه فتحات شبه الترس شوية بس الفتحات بتبقى غير منتظمة - وده بيبقى متركب على عمود الكرنك فى الموتور - السينسور بيبقى دوره بيعمل مجال مغناطيسى ولما عمود الكرنك بيلف فالقرص بالطبع بيلف معاه والفتحات الموجوده فى القرص بتقطع المجال المغناطيسى اللى بيولده السينسور فينشأ تيار متغير يتناسب الفولت بتاعه مع سرعة دوران عمود الكرنك فالاشارة الكهربية اللى بتنشأ بتروح للكمبيوتر علشان يحسب التوقيتات بتاعة الحقن والتوقيت بتاع الشرارة - لو القرص ده حصل فيه اى عيوب فالإشارة بتاعة الفولت اللى بتروح للكمبيوتر بتبقى مش مظبوطة وبالتالى الكمبيوتر بيحس إن السينسور بيبعت اشارة غلط (مالهوش دعوة بالسبب) فينور لمبة التشيك انجن ويدى كود عطل خاص بالسينسور - فأعتقد إن كلام التوكيل مظبوط لأن علشان تغير القرص ده لازم تفك عمود الكرنك يعنى الموتور حايتفتح .
بس الأول لازم تتأكد من سلامة الفيشة ونضافتها وسلامة الضفيرة بتاعة السينسور - كمان تتأكد إن القرص هل هو عليه وساخة أو رايش ولا الاسنان بايظة ومتنيه او متاكله - علشان تتأكد إن القرص نضيف وإن الموضوع مش وساخة او رايش يبقى تفك السينسور وترش مكان الفتحة اللى بيركب عليها سبراى منظف زى WD40 مثلاً وتلفف الموتور بالمارش وتنضف علشان تتأكد إنك نضفت القرص فى الكامل - وطبعاً تغير الزيت علشان المنظف حايحل الزيت شوية - وتشيل الكابل السالب للبطارية نص ساعة أوتشيل الكابل السالب للبطارية وتنور النور العالى وتطفيه وتستنى ٥ دقايق بس - او تعمل كلير للعطل وتطفى لمبة التشيك انجن بالسكانر.
وتمشى بالعربية وتشوف هل حاينور تانى ؟
طبعاً مصنعية التوكيل دى غالية جداً بس محدش حايعرف يجيبلك القرص ده ولايركبه مظبوط غير التوكيل .
والقرص ده إسمه crankshaft reluctor

[م/أحمد عبد الفتاح]

فيه كمان حاجه لو عندك كود سينسور الكرنك المفروض العربية تبرجل منك وساعات تبطل لوحدها وساعات تغيب فى الدوارة واخر مرحلة العربية حاتبطل ومش حاتدور تانى أبداً - فكون انها مش عاملة مشاكل دى غريبة شوية !!!!

[tasaka]

ده رابط لكود خطأ حساس الكرنك يمكن ينفعك

https://www.obd-codes.com/p0335

بالرغم انه حط ال Reluctor Ring كثانى سبب .. الا ان جميع الحلول المحتمله فى الرابط لا تشمل تغيير Reluctor Ring ( بما معناه انه مستبعد حدوث تلف ليها نسبيا )

كل الحلول تتحدث عن مراجعه الفيش او الارضى او ماس كهربى او قياس اوم

مع العلم ان العربية مفيهاش اي مشكلة وماشية تمام بدون اي مشاكل

يمكن الجمله دى توضح ليه ماشيه كويس

Depending on the vehicle,
the PCM uses this crankshaft position information to time the spark properly
or on some systems it is only for misfire detection and does not control spark timing