خبطه بسبب ظابط شرطه

[amir]

لسه حالا و تكمله للاسلوب الحقير اللي بنتعامل فيه في المحروسه و انا ماشي في الاوتوستوراد في امان الله
الاقي واحد بيجري من اليمين قدام العربيات طبعا بصيت علشان اخد بالي و مخبطوش
طلع ظابط شرطه و بيوقف العربيات
جيت ابص قدامي بقي ( مخدتش ثانيه او اتنين) لقيت المسافه بيني و بين العربيه اللي قدامي بتصغر (انا اساسا بسيب مسافه كافيه) و دوست فرامل بس برضو دخلت فيه علي سرعه حوالي 10 كيلو او اقل كمان(الشارع اساسا كان زحمه)

اول حاجه عملتها نزلت بقوله حد يوقف العربيات كده برضو لقيته بيقولي مانتا شايف اننا بنوقف العربيات موقفتش ليه!!!
يا جماعه قدام المنصه عدل و بيجري يوقف العربيات بجسده؟!!!!!
اتاري الموضوع ان في عربيه حد مهم و بيوقفو الشارع علشان يعدي

ادي اللي بناخده من المحروسه
العربيه اللي خبطتها كانت نص نقل و محصلوش حاجه و منزلش من عربيته اساسا و انا مهتمتش بيه لأنه مش غلطان الغلط من البيه الظابط و الاسلوب الهمجي في توقيف العربيات
الاضرار اللي عندي:
1-الفانوس الامامي اتكسر شمال
2- الجزء الخلفي الحديدي اللي وراه اتعوج
3-الرفرف الشمال انبعج شويه
انا كنت مأمن مع الجمعيه المصريه
ايه العمل
اروح و اخليهم يصلحوها؟!!
ولا اروح استرد قيمه التأمين و اعملها علي حسابي و أمن مع شركه محترمه؟
اخويا كان مأمن معاهم و اتخبط و صلح علي حسابه و من 4 شهور الي الان مخدش فلوسه فمش عايز اتورط مع الشركه دي في حاجه

ياريت اللي عندو فكره اتصرف ازاي يدلني و سعر الفانوس حاليا في التوكيل و بره التوكيل

[Karim_Monir]

معلش مش عارف افيدك في موضوع التامين
بس قدر الله وما شاء فعل
بس دي فعلا همجية انهم يوقفو طريق ماشي بسرعة
مافي زفت لاسلكي جايبنة على حسابنا
ما يتكلمو قبل ما البية يوصل بشوية
لا حول ولا قوة الا بالله

[amir]

معلش مش عارف افيدك في موضوع التامين
بس قدر الله وما شاء فعل
بس دي فعلا همجية انهم يوقفو طريق ماشي بسرعة
مافي زفت لاسلكي جايبنة على حسابنا
ما يتكلمو قبل ما البية يوصل بشوية
لا حول ولا قوة الا بالله

ربنا يكرمك فعلا انا متنرفز علشان الغلطه مش غلطتي و مكنتش بجري ولا حاجه و كان لازم ابص اشوف مين اللي بيجري بالاسلوب ده قدام العربيات لأني لمحته بطرف عيني بيجري بين العربيات
شكرا يا كريم و مستني اشوف ايه العمل مع الجمعيه

[amir]

شباب انا مستني المشوره

[amir]

ايه الاحباط ده؟
ليه محدش عايز يساعد
مش ده المنتظر ابدا

[aif]

الحمد لله انها جت على قد كده ....
آسف ماليش خبرة في التأمين
لكن انا صعبان عليا الظابط اللي علشان ينفذ الاوامر ويوقف الطريق في المنطقة دي .... بيحدف نفسة قدام العربيات ..... يا ترى اهله علموه وصرفو عليه عشان يبقى كده ؟؟؟؟

[Ahmed Samy]

الحمد لله انها جت على قد كده ....
آسف ماليش خبرة في التأمين
لكن انا صعبان عليا الظابط اللي علشان ينفذ الاوامر ويوقف الطريق في المنطقة دي .... بيحدف نفسة قدام العربيات ..... يا ترى اهله علموه وصرفو عليه عشان يبقى كده ؟؟؟؟

هو يعنى متجند ؟
ده جايب واسطة و دافع فلوس علشان يعمل كده

و غير كده برضه

[amir]

اكون شاكر لو الموضوع فضل في نطاق ما يمكنني عمله دلوقتي لأني لازم اتصرف بكره ان شاء الله

[amir]

يا جماعه عايز نصيحه بسرعه علشان رايح بكره الصبح

[eng.octooo]

الحمد لله على الى حصل وروح وخد فلوسك احسن


---------
إ م -6

[amir]

طيب ايه نظام استرداد الفلوس اللي كنت دافعها؟

[mohameduoser]

الجمعية دى اسوا شركة انا ليا شيك من شهر 11 2008 و لسة ماختوش روح هناك بدرى علشان الزحمة

[mahamedaraby]

لو تعرف تاخد فلوسك يبقى احسن مليون مره

علشان فعلا شفت ناس كتير حصلتهم حوادث واتبهدلوا وفى الاخر ما خدوش فلوسهم لسه مستنين

[amir]

رحت النهارده عملت اخطار بالحادث و هطلع بكره ان شاء الله علي مركز خدمه في جسر السويس اسمه
المركز الدولي للسيارات اوتوتك17 ش نصر عبد الوهاب- امام عمارات الفاروقيه

حد عنده خبر عن المكان ده؟

[amir]

يا شباب انا مش طالب اكتر من النصيحه و لغايه دلوقتي حاسس اني في مكان غريب
عمال اطلب النصيحه و محدش تقريبا بيسأل فيا

فين المنتدي و شباب المنتدي لما الواحد يعوزهم
انا رحت المركز الدولي للسيارات اوتوتك و سيبتلهم العربيه و قالو ان الخبير هيبقي يروح يعاين العربيه و هيتصلو بيا علشان يقولولي علي الوضع و التكاليف, علشان النظام كالتالي الاول بصلح علي حسابي و بعدين الجمعيه تبقي تصرفلي الفلوس

انا عايز حد يقولي نصيحه بخصوص التكاليف بعد ما يقرا التلفيات اللي عندي
ياريت بقي الناس تشارك علشان كلها ساعات و يتصلو بيا و لازم احدد هصلح ولا لأ
مش ده المنتظر ابدا من نايل موتورز بجد كده عيب لما الواحد يطلب نصيحه و الناس تبخل كده بيها