من غرائب ومفارقات الطبيعة فى الصنى.........؟ مهم جدا الدخول

[hamo2007]

انا اولا حاجز 2008 ولم يتم تسليمى السيارة ومر اسبوعيين اهو ويا مسهل

اولا: مع المرور ببعض المواضيع شعرت بمفارقات غريبة جدا وهى كالاتى:

-- العربية زيرو مع بعض الافراد ويقول جميلة جدا بس......؟ بتسخن من عند الاقدام
-- العربية جامدة جدا بس.......؟ العفشة ناشفة وبتكسر الضهر
-- الصالون كويس بس .......؟ العرق بيأثر فيه وسهل اتساخه ونلبس ابيض قبل ما نركب العربية وهكذا......
-- الموتور قوى جدا بس........؟ صوته عالى حبتيين
-- الكاسيت والسماعات تمام بس.......؟ الى قدام من جولدى ومش قد كده
-- الكراسى متنجدة كويس بس......؟ واطية حبتين وتوجع الرجل
-- الشنطة واسعة طيب هو انا هقعد فى الشنطة


-- لما كل حاجة كويسة بس... عايزة تعديل ولا عليها تعليق امال زيرو ازاى بقى ده على هذا الوضع الصنى عربية مصنوعة لمعاناة راكبها وكانها قديمة هلى ده عاشان يرضوا المواطن المصرى الى اخد على المعاناة طول عمره فى حياته وعربياته حد يقول يا جماعة ده كمان ما خفى كان اعظم دى كده ما بقيتش عربية بقيت بوتجاز بعجل وموتور.....؟؟؟؟؟؟؟؟؟؟؟؟؟؟


ده كمان من اقترح ان نغير المساعدين بغيرهم ازاى ابقى دافع فلوس ومتعور فيها والعربية زيرو واروح اغير مساعديين شوف بكام.

ايه يا جماعة حد يقول رأى كويس العربية دى كويسة ولا .........؟ بالمنظر ده العربية بصراحة مش كويسة خالص كده عيوبها اكتر من مميزاتها. اروح اشتلرى عجلة احسن.

فيدونا افادكم الله وانطقوا شهادة حق لله من فضلكم قبل الفاس ما تقع فى الراس ونحتاس

شــكــــــــــــــــــــــــــــــــــــــــــــــ ــــرا لكم جدا.

المرعوب محمد من الاسكندرية

[Migo123]

بصراحه انا سمعت كمية من المشاكل الكتيره جدا في العربيه ........... يعني زي ما انت بتقول كل واحد بيطلعله مشكله شكل تاني ............
اسوء قصه سمعتها كانت عن واحد بيشتكي من الكراسي بتزيق .... وكل مره مع الصيانه يشتكي منها.... وهما مطنشين... لغايه ما في مره صمم انهم يصلحوها .....
تاني يوم على طريق سريع يبص يفاجئ انا الكرسي بتاعه بيفك من مكانه .... وده معناه ببساطه ان هو واللي ركابييين معاه في العربيه يتشاهدو خلاص لانه صعب قوي يسيطر على العربيه
عرفت ان الراجل ده بعت ميل بره وانهم اعتذروله وغيروله فرش العربيه بالكامل بعد كده ....

[goodwave]

العربية دي مع الاستاذ سبعاوي بس موديل 2007 وهي سيارة محترمة وانا ركبت فيها معاه في المقابلة الماضية ولم اسمع تزييق كراسي ولا حاجة وعلى الطريق ما شاء الله.

الاستاذ سبعاوي مهندس ميكانيكا وفاهم في كل قطعة في العربية فممكن تسأله في موضوع او على الخاص واعتقد راية مفيد جدا جدا لانة اولا راكب العربية وثانيا فاهم في ميكانيكا السيارات.

وللعلم بالشئ هو الاستاذ سبعاوي كان بيفاضل بين الصني والانسر قبل ما يشتري ولكن فق السعر جاء في صالح الانسر............. بالتوفيق

[yahyanaabil]

-- العربية زيرو مع بعض الافراد ويقول جميلة جدا بس......؟ بتسخن من عند الاقدام

اللى معانا مش بتسخن

العربية جامدة جدا بس.......؟ العفشة ناشفة وبتكسر الضهر

عندك حق فى ديه

-- الصالون كويس بس .......؟ العرق بيأثر فيه وسهل اتساخه ونلبس ابيض قبل ما نركب العربية وهكذا

الفرش الفاتح كله بيتوسخ بسرعه

الكاسيت والسماعات تمام بس.......؟ الى قدام من جولدى ومش قد كده

انا حاسس ان اللى قدام اجمد من اللى ورا

لكراسى متنجدة كويس بس......؟ واطية حبتين وتوجع الرجل

محستش بكده مع انى مش قصير
من الاخر عشان مطولش لو انته مش حيفرق معاك فرق الفلوس بينها وبين اللاتسر1600 (15000جنيه تقريبا)جيب لانسر
بس انا شايف ان الفرق مايستاهلش

[hamo2007]

جزاكم الله خيرا على المعلومات .......... بس هل تفتكروا انهم تحاشوا بعض العيوب فى موديل 2008 ما هو مش معقول مش عارفين انا الناس طالع عينها من الشكاوى وما سمعوش عنها اكيد تجنبوا بعض الاخطاء والا يبقى الناس دى مصرة على الخطاء ربنا يستر انا بطنى مكركبة وخايف جدا جدا اكون بحطى فلوسى فى حاجة ما تستهلش ربنا يستر معلش انا موسوس شوية بس لى عزرى برضه لان فيه فرصة لسه اختار وافاضل. معلش تعبتكم معايا شكرا لكم وللقائم على المنتدى الجميل الرائع مش عارف الواحد من غير منتدى زى ده كان هيعرف المعلومات دى منين شكرا مرة اخرى

[Ahmed Anwer]

بص يا باشا من الآخر ،،
أي عربية تجربة بتفرق من واحد للتاني
في حاجة مبتفرقش مع واحد خالص و واحد تاني بتبقي مصيبة بالنسبه له
الحل الوحيد إن حضرتك تحاول تعمل تيست درايف من أي واحد معاه العربية
لكن حكاية إن هيبقي في عيوب في العربية دي أرزاق :D :D :D :D
و في أي موديل
و متعتمدشي أوي علي السمع لأن تقريبا مفيش عربية في مصر إتقال عليها كويسة تماما لحد دلوقتي

[hamo2007]

الله ينور عليك يا باشا صح التجربة خير برهان وحتى ولا الارزاق على الله ربنا يسهل بس واستلمها
ونجرب فيها لعلها خيرا وشكرا جزيلا بجد انا شاكر لكم

[yahyanaabil]

متقلقش خالص لان العربيه مفهاش عيوب ومتخافش مش حتخسر فلوسك

[Abu Aly]

غريبه

على فكره انا دخلت موقع شركة نيسان نفسها على النت و لللاسف ما لقتش اى ذكر لا للعربية الصنى و لا حتى Tiida فى القسم اللى بيعرض موديلات شركة نيسان ؟! .. يظهر ان العربيات ده مبتنزلش فى اليابان من زمان و بتنزل بس فى الدول التعبانه .. و الله اعلم

[youssef_sallam]

معاكو حق

انا برضة حاجز صنى 2008 و بقالى اسبوعين وكل يومين اروح المعرض و اغلس عليهم يمكن يحسوا على دمهم
المهم فعلا الصنى واقف تصنيعها من 2002 فى اليابان و بلاش استعجال للشكل الجديد لانة من كلام صديق ليا فى نيسان الإمارات الموديل ده كورى و مكونات كوري و مليان مشاكل و بيقولى مش بنلاحق على التصليحات فيها يعنى الحمد للة على النيسان بتاعتنا
بس انا كنت محتار كتير بين اشترى اية و كل نوع فية عيوب
الياريس مش ستابل و خفيفة على الطريق ( كلام مهندس صيانة صديقى شغال فى تويوتا ايجيبت )
اللانسر واطية و استهلاك البنزين عالى قوى فى موديلات 2007 ل 1300سي سي بيوصل ل 200 كم فى الصفيحة
الصنى ناشفة قوى فى المطبات من كلام مهندس شغال فى اتصالات مصر علشان اسطول عربياتهم صنى بيقولى بيكون يوم اسود لو مسافرين بالصنى
الواضح يا جماعى ان متوسط السعر من 80 - 100 الف ده بتاع الغلابة اللى لازم يقرفونا ( على قد فلوسنا ) :lol: :lol: :lol:
المهم يسلمونى العربية قبل العيد

[hamo2007]

انا اتصلت بالتوكيل وقالولى ان انها ابتداءت تندع عربيات مانيوال وربنا يسهل فى الاسبوع الاخير من رمضان بس هما بيسلما باولوية الحجز يعنى بالدور الى حجز الاول هو الى بيستلم الاول يا عالم انا داخل فى ثالث اسبوع حاجة ملل.

من حيث العبر : مفيش عربية اتقال عليها سليمة وكاملة 100% حتى لو مرسيدس مفيش حاجة كاملة الكمال لله وحده
فتقـدر تقول العربيات كلها وحشة وبعد كده تفاضل بين الوحشيين ....... فنجد ان الصنى افضل الوحشين
بالاوبشن الكامل الى هما وضعينه فى العربية يعنى مش هتحتاج تروشها هى كده روشة وحلوة فمش مشكلة العفشة
ناشفة بتطرى بعد فترة ده لان العربية وزنها تقيل ما ينفعش يحط مساعديين طرية هتبوظ بعد فترة بسيطة. وهكذا


صبرنا يا رب ويسلمونا بقى اخوك حمو من الاسكندرية.

[Dr Ahmed]

اللانسر واطية و استهلاك البنزين عالى قوى فى موديلات 2007 ل 1300سي سي بيوصل ل 200 كم فى الصفيحة

مع إحترامى: خلوص اللانسر 165 مم ، ودا يعتبر من أعلى أرقام الخلوص الحالية ، وتفادى السمعة القديمة لإنخفاض الموديلات قبل 2000.
كما أن استهلاك بنزين المانيوال 1300 معى 19 كم لكل لتر 92 على الطرق السريعة ، وأكتر من 12 كم لنفس لتر البنزين إجمالا .. يعنى من 380 كم للصفيحة على السريع ل 240 إجمالا..

[yahyanaabil]

انتو مالك مستعجلين على الموديل الجديد مع انى شايف الشكل الحالى شكله احلى بكتير وانا شفتها فعلا مره

[hamo2007]

على فكرة بنزين 92 بيتحرق بسرعة جدا لو حطيت 90 هيعمل معاك اكتر من كده بكتير يعنى لو بنزين 92 بيعمل 10 كيلو ال 90 هيعمل 15 ده كلام اكيد ال92 بيور ونقى اكتر مما يؤدى الى نسبة حرق اكتر خفيف يعنى اما ال90 تقيل شوية فى الحرق وهما فى الكتالوج كاتبيين البنزين المفترض 90 فهما ادرى مش فرق العشرة قروش يخلنا نحط 92 بالمرة نقول مفرقيتشى العشرة قروش ........انا بتكلم عن تجربة اكيدة وليس عن علم او منهج دى ملحوظة......... كمان بسمع ان الى بيحط ال 92 ده الى عربيته ما بتسحبش موتوره تعبان شوية وعايز يحسن الاداء كده يعنى بس الافضل البنزين ال 90 هيفرق كتيير جربوا وقولولى.

[Sharky]

الياريس مش ستابل و خفيفة على الطريق ( كلام مهندس صيانة صديقى شغال فى تويوتا ايجيبت )

أنا شايف إن شكلها ستايل و جديد و قريب جدا من الكرولا الجديدة و الكامرى و فى نفس الوقت أنا جبت بيها فى طريق وادى النطرون 185 كم/ساعة و كانت ثابتها حلو جدا لحد 160 كم/ساعة