سؤال هام للباشمهندس سبعاوى

[nada12]

السلام عليكم سؤالى هو عند تغير العجلات للسيارة النيسان صنى الاتوماتيك العجلات الاما مية هل وضع الجير غلى ال p او الوضع n مشكلتى انى تركت السيارة فى الوضع pوبعد تركيب العجلات الامامية احس برجرجة فى السيارة على الوضع p و dهل حدث شيء للجير وما هو اوضع الامثل عند تغيير العجلات وجزاك الله كل الخير

[Bishoy.Girgis]

هو رأيي الشخصي انك لما يتم تغيير العجل الامامي ... كان لازم تعمل ترصيص للعجل و بعدين يتم التركيب .. عشان كده بيكون في رجرجة لكن ده بيكون في D انما علي P دا يعني معناه ان العربية Parking يعني العربية واقفة تماماً يبقي ازاي بيكون في رجرجة
لو علي P و في رجرجة يبقي ده مش من العجل خالص يبقي من حاجه تانية خالص
و بعدين ارجوك ارجوك تتأكد من تربيط العجل كويس من الاربعة مسامير أحسن يكون حاجة منهم مفكوكة لأن في ناس متخلفين ساعات مش بيقرطوا علي العجل و بيحصل مصايب بعد كده
ربنا يحافظ عليك

[nada12]

شكرا جزيلا اقصد على الd وال r ورحت التوكيل اليوم مودرن موتورز الدقى طلع عندى علبة الدركسيون وانا سيارتى صنى 2002 اتوماتيك بس السعر ب 4000 جنيه غير التركيب وقررت انتظر شوية طالما ليس هناك حطورة شديدة الان كما قال الباشمهندس وقلت لهم على الرجلاش حيث عرفت من الباشمهندس سبعاوى ممكن نربط ربع دايرة وخصوصا ان الدركسيون عندى سهل اوى يعنى بالفه بصباعى المهندس قال لا لازم يتغير وياريت راى السبعاوى باشا وكتر خيركم

[nada12]

طلع العيب غلبة الدركسيون بس سعرها 4000 جنيه غير التركيب قلت للمهندس يربط البوش مثل ماقال المهندس سبعاوى وخصوصا الدركسيون عندى مش تقيل خالص قال لى لازم التغيير برضه ياريت لو فى حل فى الحرفييين بواحدة مستعملة حد يقولى اعمل ايه ياجماعة ولكم جزيل الشكر السيارة صنى اتوماتيك 2002

[Ahmed Selim]

لحد لما ييجى سبعاوى بك الكبير

اللى فهمته من حضرتك أن غيرتى الكاوتش ( العجل ) و العربية كانت على وضه ال p........و بعد كده لما جيتى تمشى بالعربية لقيتى العربية بتترج......صح كده ؟؟؟؟

لو صح يبقى ده ترصيص أو عجل مش مربوط كويس.....تروحى لحد بتاع كاوتش أو زوايا و تخليه يرصص العجل ( و يفضل ال 4 عجلات ) و يربطه كويس و إن شاء الله هتتظبط معاكى.

بالنسبة لعلبة الدركسيون هى ممكن تكون أصلاً خفيفة و لما أنتى رحتى التوكيل قالولك أنها بايظة..........عموماً انتى ممكن تعرفيها لو عملتى الأتى
أمشى فى حتة مكسرة جامد أو على شريط مترو بس بالراحة جداً و شوفى هتحسى بخبط فى الدركسيون مع التكسير اللى فى الشارع ولا لأ؟

لو حسيتى بيه يبقى أحتمال تكون علبة دركسيون أو بارات دركسيون.

عموماً أعتقد أنك ممكن تلاقى فى الحرفيين منها مستعمل بس مشكلة المستعمل أنه بيكون على التجربة أسبوع أو حتى شهر و ممكن بعد 6 شهور مثلاً العلبة تبتدى تبوظ تانى.....رأيي أنك تشوفيها جديدة برة التوكيل بكام و تجبيها جديدة.

[nada12]

شكرا كثيرا على الافادة الخبط موجود مع الاماكن المكسرة فعلا وهحاول اشوف طقم تصليح للبارات الاول على حسب راى بتاع العفشة وشكرا وجزاكم الله خير

[Ahmed Selim]

يا فندم العفو

بس بلاش طقم التصليح ده عشان الحاجات دى مجرد مسكنات.....و فى كثير من الأحوال بتبقى غير مجدية.

البارات معتقدش أنك هتلاقيهم غاليين.

و أنصحك تاخدى رأى واحد تانى بتاع عفشة بس يكون كويس أو ثقة.
أنا أعرف ورشة بتعامل معاها فى النزهة الجديدة و صاحبها مهندس مش صنايعى.....لو قريبة منك ممكن أوصفهملك.

[sab3aawy]

بالنسبة لموضوع الرجرجة انا متفق تماما مع اصدقائنا هنا اللى اشارو بموضوع الغربلة والترصيص، علبة الديريكسيون لا تسبب غربلة، ولكن تظهرها بوضوح لو كانت فيها مشكلة، كما ان الحدث الذى ادى لظهور الغربلة هو تغيير الكاوتش، يبقى احنا 100% بنتكلم فى مشكلة اتزان فى الفردة اللى ركبت وهو ما يعالج بالترصيص

بالنسبة موضوع مشكلة علبة الديريكسون انا عايز بس اعرف هى العربية عاملة كام الف كيلومتر قبل ما اقدر اقول هل الكلام بشان مشكلة فى العبة مقبول ام غير منطقى

[nada12]

شكرا ياباشمهندس هى صنى 2002 اتوماتيك عاملة 170000 الف كيلو

[sab3aawy]

شكرا ياباشمهندس هى صنى 2002 اتوماتيك عاملة 170000 الف كيلو

عند 170 الف كيلومتر يبقى الكلام على علبة الديريكسيون كلام منطقى ومقبول، مع ذلك انت مش خسران حاجة، جرب اقفل الريجلاش شوية لو لسة فيه مجال للقفل، ظبطت معاك فبها ونعمت، مظبطتش غير العلبة