تجربة يوم واحد مع الصنى

[amrnader]

انا انهاردة ركبت مع صديق لية عنده نيسان صنى 2007، انا كان كل همى و انا راكب انى اعمل مقارنة بينها و بين عربيتى لانسر 1600 ، هى العربية EX Saloon و اتوماتيك. انا هاحاول اتكلم بأمانة عن كل حاجة شوفتها،
مبدئيا مع تدويرة الكونتاكت العربية صوتها هادى جدا، العربية سحبها فى الاول كويس بس هو كان قارص على البنزين و العربية صوتها على جامد ( الطلعة الامريكانى دية كان قافل التكيف عشان يعملها ) ، العفشة كويسة لكن الطريق برضه كان كويس فده مش مقياس، والثبات ممتاز.
العزل الصوتى ممتاز (قفل الشباك عمل شغل :lol: )
الخامات بتاعة الصالون بشكل عام اسوء بكتير من الانسر، التابلوه كله بلاستيك خامته مش اد كدة، برضه الزراير كلها البلاستيك بتاعها سىء، يعنى الزرار بتاع الزجاج الكهربائى شكله ردىء جدا جدا و كذلك المسوجر بتاع اوكرة الباب ، و برضه زرار سرعات التكييف، منمنم كدة و شكله وحش اوى، كمان الجزء البلاستيك اللى فى مسند الباب صنعته وحشة و باين فيه خطوط كدة غريبة،
الباور ستيرينج فى العربية كويس و واضح انه كان مريحه و هو بيسوق :D ،
التكييف كفائته اقل من اللانسر، كان جايب على السرعة التالتة و كان الجو يدوبك مقبول، انا عندى لو جبت السرعة التالتة بتلج بعد شوية.
الطريق كان فاضى قدامنا فصاحبى حب يشد بالعربية كانت جايبة 3000 rpm عند ال 100 km/hr و كان فاتح التكييف اعد يعافر مجابتش حاجة، راح قافل التكيف و قرص على الاخر العربية كانت على 5000 rpm بس معرفش يزود عن 130 km/hr، هو بيقوللى فيه overdrive ممكن يشد معاه اكتر بس انا معنديش فكرة عنه و مجربناهوش.
فيه حاجة مش مهمة بس غاظتنى، انى مالقيتش حامل كوب، فضلت ماسك الكانز طول الطريق

الخلاصة ان العربية هادية و ثابتة و مريحة ( انا مجربتش الكنبة اللى ورا) لكن الصالون خامته وحشة، معرفش هل ديه مكونات مصرى و لا المستورده كانت كدة برضه، السحب بتاعها معقول، انا عربيتى مانيوال فمعرفش هل هو ده نظام الاوتوماتيك و لا ايه. و بعدين انا سواقتى هادية و اسرع حاجة وصلتلها 140 على الصحراواى و انا مش واخد بالى (لو كنت خدت بالى كنت هديت على طول:shock: )،و يارب تجيلى فرصه اجرب اللانسر 1600 اتوماتيك عشان اقارن موضوع السحب ده لأن العربيتان وصلوا لنفس السعر (بتكلم على الخليجى)

[وائل عطية]

ياريت نسمع تعليق أخونا سبعاوي على الكلام ده !!!
بناءً على تجربته الشخصية مع سيارته الصني، أعتقد إن كلامه هيكون مفيد خصوصاً لمن يهمه أمر الصني
على فكرة العربية دي أنا حاططها تحت الميكروسكوب بقالي فترة الله يعلم إيه اللي هايحصل !!!

[Salah_sr]

لا تعليق علي الصني المصري بعد سبعاوي و لكن بالنسبة لموضوع حامل الأكواب أنا متأكد من وجودة ولكن لازم تضغط عليه حتي يخرج إلي الخارج و كان ممكن تسأل صاحب العربية .أما التقفيل الداخلي المصري فأنا أنتظر الرد من سبعاوي لأن الصني من العربيات المرشحة لي عند نزولي مصر

[جندى مجند]

فصاحبى حب يشد بالعربية كانت جايبة 3000 rpm عند ال 100 km/hr و كان فاتح التكييف اعد يعافر مجابتش حاجة، راح قافل التكيف و قرص على الاخر العربية كانت على 5000 rpm بس معرفش يزود عن 130 km/hr

حضرتك متأكد من رقم 5000 rpm على سرعة 130؟؟ الرقم دة كبير جداً ... لو العربية كانت جايبة 100 عند 3000 لفة يبقى المفروض سرعة 130 تكون عند 3900 لفة.

[ayman]

بالنسبه لموضوع التكييف سيبك من الاحساسات وفيه شى اسمه ترومتر ممكن يقيس درجه حرارة الهواء الخارج من التكييف طبعا مش ترومتر طبى وده يقيس درجه الحرارة من -40 درجه الى 60 درجه مئويه وده ممكن تقيس بيه علشان تحكم على التكييف وعلى فكره انا قست درجه حراره الهواء الخارج من فتحه تكييف الصنى فكانت 7 درجه مئويه وقست فى الكامرى كانت نفس الشى تقريبا وقسته فى لانوس مصرى كان 5 درجات وكلها سيارات جديده يعنى الانوس مكيفها بيطلع هواء ابرد من الكامرى والصنى مع العلم ان درجه حراره التكييف المنزلى عند فتحه خروج الهواء فى حدود 16 درجه وعلى فكره جوده المكيف بدرجه الحراره سواء رقم 1او2او3او4 وليس بسرعه المروحه ونقطه تانيه ان السحب فى المانيول اسرع من الاتوماتيك بصفه عامه ام بالنسبه للتنجيد فانا معك ان خاماته ضعيفه وخصوصا تجليد الابواب والجزء السفلى من التابلوه ام غير ذلك فالسياره كويسه (اقصدالصنى) وفى الخليج لانسر ارخص من الصنى لنفس المواصفات بس اسعار قطع غيار اللنسر اغى كتير جدا من الصنى وعلى سبيل المثال كوبلن اللانسر ب7500 جنيه مقابل 3300 جنيه للكرولا والصنى و4000 جنيه للهوندا سيفك ( اسعر قطع الغيار الاصليه من الوكاله)

[baher]

أنا كنت في المصريه للسيارت وعملت مقارنه بين الصني السوبر صالون واللانسر ال1600 الكامله لقيت اللانسر أكبر منها وكمان بتوع المعرض اكدوا لي الكلام ده .

[amrnader]

حضرتك متأكد من رقم 5000 rpm على سرعة 130؟؟ الرقم دة كبير جداً ... لو العربية كانت جايبة 100 عند 3000 لفة يبقى المفروض سرعة 130 تكون عند 3900 لفة.

انا متأكد تماماً من الرقم ده، و شايفه بعينياه، هو كان قارص على البنزين بس العربية سرعتها مبتزيدش حتى انا قولتله حرام عليك 5000 قالى هى مبتجريش غير كدة مع العلم ان الطريق كان يعتبر منزل مش مطلع. تقدر تقول كدة ان التسارع فوق ال 100 ميت فعلاً.

بالنسبه لموضوع التكييف سيبك من الاحساسات وفيه شى اسمه ترومتر ممكن يقيس درجه حرارة الهواء الخارج من التكييف

يا استاذ ايمن ، مع احترامى لرأى حضرتك الموضوع ليه علاقة وطيدة بالاحساسات، انا قاعد حران، يبقى اكيد التكيف كفائته قليلة، من غير ترمومتر و لا حاجة

على فكره جوده المكيف بدرجه الحراره سواء رقم 1او2او3او4 وليس بسرعه المروحه

حضرتك قصدك ايه بدرجة الحرارة، لو قصدك على الثيرموثتات فده على طول معمول على اخره، اللى هو اخر الازرق.

بالنسبة لموضوع حامل الأكواب أنا متأكد من وجودة ولكن لازم تضغط عليه حتي يخرج إلي الخارج و كان ممكن تسأل صاحب العربية

شكرا على المعلومة، فيه فعلا عربيات بيبقى حامل الاكواب مستخبى و محتاج تدوس حاجة عشان يطلعلك، بس انا اصلى متعود فى اللانسر فى اتنين جمبى واضحين زى الشمس

[gemtawila]

بالنسبة لموضوع إن العربية جايبة 130 على 5000 لفة فده عشان صاحبك مش ضاغط على الزرار بتاع الأوفر درايف اللى فى الفتيس وده عشان العربية جايبة 130 على الثالث والأوفر درايف بيخليها تنقل رابع

[gemtawila]

وبرده الزراير بتاعة الشبابيك هى هى اللى فى التويوتا كورولا ودى مستوردة مش متصنعة فى مصر

[ayman]

بالنسبه لعدد لفات الماتور فيه شى غلط لانه فى سرعه 130 بتكون فى حدود 3800 مع التكييف وبدون اوفر درايف اما التكييف لاذم تقيس الحراره بواسطه ترمومتر واذا كانت درجه الحراره اكثر من 9 عند خروج الهواء عند فتحه التكيبف معناة ان الفريون قليل والتبريد غير جيد وعلى فكره اوفر دريف يزيد عدد لفات الماتور وليس العكس لانه يزيد عزم العربيه وعلشان كده ينصح بعدم استخدامه لفترات طويله وهو ينقل للجير الاقل وليس الاكثر (راحع كتلوج اى سياره اتوماتيك) عكس الخامس فى السيارات المانيول

[amrnader]

انا رحت انهاردة ركبت العربية تانى، اهم حاجة طبعا انى لقيت حامل الاكواب مستخبى تحت خالص :D بصيت مرة تانية على الصالون و كان معايا واحد صاحبنا تالت لقيته بيقولى من نفسه من اول لحظة ان الصالون خامته وحشة قوى غير ان فى ريحة غريبة فى العربية مش عارف دية حاجة فى الفرش و لا غراء و لا ايه بالظبط. بالنسبة للأخ gemtawila انا كنت متضايق قوى من منظر زراير الزجاج الكهرباء فرحت بصيت تانى منظرهم ردىء جدا، معتقدش ان دول شبه الكورولا لأن المفروض خامات الكورولا انضف من اللانسر، برضه قلت عشان مظلمش العربية تفحصت البلاستيك فى كل حتة فعلا سىء و كمان الحتت القماش اللى فى الابواب نوع القماش غريب جدا و خشن. برضه جربنا العربية من غير التكييف خالص، اقدر اقولك انك لو قارص بنزين على الاخر العربية تسارعها بيبقى كويس من الصفر لل 80 و ممكن طبعا تزود بعد كدة بس تسيبها تاخد وقتها، الخلاصة العربية ادائها كويس و خامتها الداخلية رديئة والتقفيل الداخلى فيه فراغات لكن التقفيل الخارجى كويس و العربية شكلها شيك وعاجبنى لكن من واقع تجربتى للعربية انا شايف ان سعرها اغلى شوية من قيمتها.

[gemtawila]

للمعلومات عن الأوفر درايف برجاء مراجعة المقال التالى

http://en.wikipedia.org/wiki/Overdrive_%28mechanics%29

[gemtawila]

دى صور زراير التويوتا كورولا واللى فيها الأبنوس هى صور زراير النيسان

[gemtawila]

كمان صورة لزراير النيسان

[sab3aawy]

عايزين الحق؟

انا مش عايز ارد

كل اللى هقوله انى شبعت ركوب فى الصنى وشبعت ركوب فى اللانسر

والخلاصة: العربيتين واحد، الفروق لاااااااااااااااااااااااا تذكر ، اهم الفروقات بينهم تنحصر فى ان اللانسر شكلها مربع والصانى شكلها مدور ، والصانى ارخص ب10 ألاف جنيه علشان تجميع محلى، والصانى بييجى معاها كاسيت وانذار واللانسر لأ

لكن الكلام عن الاداء والإتساع والجودة والصاج ...الخ هاختصره بكلمة واحدة، الأتنين واحد

انا شبعت قراية رسايل غالبيتها مطلعة اللانسر السماء وخاسفة بالصانى الأرض باعتينها ملاك لانسر عايزين يبرروا ال10 آلاف جنيه الفرق والقليل منها رسايل مطلعة الصانى السماء وخاسفة باللانسر الأرض باعتينها ناس راكبة صانى وصعب عيهم نفسهم من رسايل ملاك اللنسر المتجنيه

لكن انا بالنسبالى القصة كلها تتلخص فى خمس كلمات:

العربيتين واحد، الفروق لا تذكر