تكييف الصنى

[roffa1]

أنا اشتريت امبارح صنى E X saloon 2010 ب ال ABS تكييفها عادى و مش عاجبنى مع العلم بأن الجو اليومين دول جميل مع العلم بأنه كان معايا فيرنا أتوماتك1600 كان تكييفها أكثر من رائع و فى عز الحر كمان
لو ممكن نعمل موضوع عن تكييف الصنى و كل واحد يقول رأيه عن تجربه و ياريت نثبت الموضوع ده

[bmya]

باشا العربيه لسه زيرو علي ما اعتقد حضرتك ممكن يون بس عايز يظبط ان شاء الله في الصيانه يبقي كويس وهو عموما جيد مش وحش

[mohamed10]

الف مبروك وربنا يديك خيرها ويكفيك شرها وياريت تدور مفتاح التكيف حتى اخر درجة فى العلامة الزرقاء

[princex1]

تكييف الصني من أهم مميزاتها
لو راكن في الشمس ممكن تحتاج ربع ساعه لما المواسير تبرد
شغل المروحه على 4 و افتح الزجاج كله 5 دقائق قبل التكييف أو
جربها بالليل لأن العزل الحراري و الصوتي كمان ضعيف في الصني

[javacoder]

تكييفها عادى و مش عاجبنى مع العلم بأن الجو اليومين دول جميل

لما يكون الجو حر أكثر من 36 و تعمل التكيف على حرارة 24 التكييف حيكون ثلاجة و لما درجة الحرارة تكون 25 و التكييف على 20 الفرق مش حيبقى كبير , يعنى استنى لغاية لما الصيف ييجى و درجة الحرارة 40 ساعتها تكييف التوكتوك حيبقى فريزر.

[littlepharoe]

ألف مبروك ياباشا وان شاء الله ميكونش فيه أى مشكله فى التكييف
و ياريت تعرفنا السعر ومكان الشراء و لو ممكن تتكرم علينا بتقييم
شامل للأداء و استهلاك البنزين و رأى سيادتك فى التقفيل المصرى

[Ahmed Hassan]

بلغ بالملاحظه دي في صيانة ال ١٠٠٠ كم لأني كنت قريت مواضيع مفادها ان شحن التكييف مش مضبوط. بيضبطوه و بيبقى تمام.

[roffa1]

مظبوط الكلام ده

لما يكون الجو حر أكثر من 36 و تعمل التكيف على حرارة 24 التكييف حيكون ثلاجة و لما درجة الحرارة تكون 25 و التكييف على 20 الفرق مش حيبقى كبير , يعنى استنى لغاية لما الصيف ييجى و درجة الحرارة 40 ساعتها تكييف التوكتوك حيبقى فريزر.

كلامك 100 -- 100 علشان انا شغلت التكييف النهارده وانا رايح الشغل و كانت الدنيا حر شويه و كان التكييف جميل على عكس لما شغلته قبل كده فى الليل لما كان الجو أصلا كويس و ش محتاج تكييف اصلا . كمان لما وصلت الشغل بصيت تحت العربيه لقبتها بتنقط ميه دليل على ان التكييف شغال بكفاءه كويسه

[javacoder]

الحمد لله أنه كل شئ تمام
نصيحة بقى عشان ما تهلكش التكييف و التكييف لما يهلك هيهلك العربية.
حاول قدر المستطاع ان تركن السيارة فى الظل و لو ركنتها فى الشمس افتح الزجاج و سيبها ثلاث دقائق تتهوى بحيث الهواء الأكثر سخونة يخرج من العربية , ليه بقى؟
الموضوع ده نفسى بحت , الواحد بييجى حران و العربية و الكراسى أسخن من الجو الخارجى لأن الزجاج يحبس الحرارة , فلما يركب بيزهق أكتر و يشعر بالحرارة أكثر و يرتفع ضغط دمه و يقوم مشغل العربية و التكييف فورا و على أعلى درجة و النرفزة دية تخليه يجرى بسرعة و يحرق على النقلات بتاعة الأوتوماتيك و العربية تهلك أسرع و جسمه مش حيهدى أو يرطب إلا بعد نصف ساعة على الأقل و تكون العربية سخنت جامد.
الحل نفسى برضه:
1- تقبل أن الدنيا حر.
2- سيب العربية تتهوى خمس دقائق و بعد كده اركبها
3- بمنتهى البرود ما تشغلش التكييف إلا بعد خمس دقائق من تشغيل السيارة.
4- و بقمة البرود شغل التكييف على الدرجة الأولى لمدة عشر دقائق.
5- و بمنتهى الإطمئنان ارفع التكييف على درجتين سرعة.
6- على ما الوقت دا كله يعدى حتكون العربية هديت و رطبت من غير ما تهلك التكييف و الموتور.

يعنى أهم حاجة ما أهنش العربية لأنى متنرفز و بفش غلى فى العربية و تكييفها.

لأن النصيحة الغالية أحترم العربية تحترمنى أو أهينها فتهنى.

و كمان يوم ما تبقى مزنوق و محتاج تشغل التكييف مثلا لأن لاقدر الله فى حد تعبان ساعتها حينفعك و يرد ليك الجميل و يشتغل حلاوة

[princex1]

1++++++++++++++

[sab3aawy]

تكييف الصنى متقدرش تحكم عليه فى الجو الجميل، لأنه ببساطة بيفصل عند درجة حرارة معينة للفريون ، غالبا هى بتقابل حوالى 20 درجة للصالون، وبالتالى لو الجو برة درجة حرارته 23 وانت شغلت التكييف هيشتغل لحظات ويفصل، وبالتالى فى الجو البارد شتاء مش هتلاحظ ان التكييف عمل اى حاجة، لكن فى الجور الحار جرب العربية واوعدك انك مش هتقدر تستحمل التكييف اصلا مهما كانت درجة حرارة الجو، لو انت مشغل التكييف على 4 بعد ربع ساعة بالكتير هتلاقى نفسك بتنزله على 3 ثم 2 ثم 1 ، لكن فكرة انك تستغل الجو البارد فى الشتاء لتحويل صالون السيارة الى ثلاجة لحوم باستخدام التكييف دى فكرة غير متاحة بالنسبة للصنى علشان التكييف بيفصل عند درجة محددة لتوفير الوقود

[محمد ابراهيم 1]

مبروك العربية وإن شاء الله تنال رضاك

لأنها ببساطة أفضل مما تتخيل

[El Prince]

تكييف الصنى متقدرش تحكم عليه فى الجو الجميل، لأنه ببساطة بيفصل عند درجة حرارة معينة للفريون ، غالبا هى بتقابل حوالى 20 درجة للصالون، وبالتالى لو الجو برة درجة حرارته 23 وانت شغلت التكييف هيشتغل لحظات ويفصل، وبالتالى فى الجو البارد شتاء مش هتلاحظ ان التكييف عمل اى حاجة، لكن فى الجور الحار جرب العربية واوعدك انك مش هتقدر تستحمل التكييف اصلا مهما كانت درجة حرارة الجو، لو انت مشغل التكييف على 4 بعد ربع ساعة بالكتير هتلاقى نفسك بتنزله على 3 ثم 2 ثم 1 ، لكن فكرة انك تستغل الجو البارد فى الشتاء لتحويل صالون السيارة الى ثلاجة لحوم باستخدام التكييف دى فكرة غير متاحة بالنسبة للصنى علشان التكييف بيفصل عند درجة محددة لتوفير الوقود

ده بالظبط اللى حصل معايا امبارح فى عربيتى - التكييف كان تأثيره طفيف جداً لدرجة انى قولت انه باظ .. !
بس أنا كنت بشغله على أساس نوع من الصيانه - أعتقد فيه ناس قالت لازم يشتغل عشر دقايق تقريباً كل شهر فى الشتاء علشان الفريون والسيلات بتاعت التكييف ..
لو فيه تصحيح للمعلومه دى يا ريت تقولولنا يا جماعه ..

[mohamedhamam]

ألف مبروك و ربنا يديك خيرها و يكفيك شرها و موضوع التكييف بسيط ان شاء الله وسيتم حل المشكلة أثناء صيانة الـ1000 كم

[fady_anis]

يا باشا العربية لسه فى فترة التليين ( أول 1000 كم ) مينفعش حضرتك تشغل التكييف لفترات طويلة ولو شغلته مش هيبقى بنفس كفاءته الاصلية.