سيفيك 2010 سعرها هيذيد

[abo samra]

سعر السيفيك 2010 هيذيد عن 2009 وده طبقا لكلام مسئول مبيعات فى هوندا
وطبعا السعر هيذيد حوالى من 6 الى 8 الف جنيه
يعنى سعرها هيتراوح بين 158 الف الى 196 الف تقريبا
السعر النهائى هيتحدد فى شهر 1 ان شاء الله
والعربيه هتكون متوافره فى شهر 2 ان شاء الله
وطبعا اعتقد السبب علشان الناس تشترى الستوك 2009 اللى لسه موجود فى السوق لحد دلوقتى
وده طبعا اللى حصل مع التويوتا ياريس بالظبط السنه اللى فاتت
وبصراحه الحركه دى مش عجبانى خصوصا ان التخفيض على الموديلات الاوربيه هيبدا فى شهر 1
وكان ممكن يعملوا تخفيض على موديلات 2009 وينزلوا 2010 بنفس السعر
انما كدا اتوقع المبيعات هتقل والله اعلم خصوصا اول موديل اللى هو يمثل اغلب مبيعات السيفيك واللى هيبقى فى حدود 158 الف يعنى نفس سعر الكورولا 2010 هاى لاين !!!!!!!!!
وبالنسبه vti هتعمل ايه مع الجيتا والاوكتافيا فانتزيا!!!!!!!!!!
تحياتى

[aly_hosny]

السيفيك مش اوروبي
هي نفس الشكل ولا هيتغير
لو هيتغير يبقى ماشي انما لو نفسها يبقى بيخرفو

[kemo0o]

الشكل هو نفسه مش هيتغير
التغيير هيكون السنة اللي جاية

وموضوع زيادة السعر ده تهريج أصلا
بس هما عملوا كده في الموديلات اللي فاتت

يعني
2007 كانت ب 139 الف
2008 كانت ب 143 الف
2009 كانت ب 150 الف
2010 هتكون بكام ؟؟؟؟؟

وبصراحة ده اسمه تهريـــــــــــــــــج والوكيل استهبل في الاسعار وشكله هيشربها ... وحسبي الله ونعم الوكيل في الناس دي كلها وفي الاستغلال والمستغلين

[dr.amr]

فعلا ده شيء مستفز جدا

[spider_sayad]

انا روحت معرض السبع الي عند اول عباس و لاقيت السيفيك 2010 سالته بكام قالي ب 158 واحتمال تزيد كمان عشان الين هيزيد والعربية متكلفة جامد ده الي قالهولي حرفيابس بجد ده استهبااااااااااااااااااال

[ahmed_mabrook]

فى فرق ما بين 2009 و 2008 :
1- الفرامل الخلفية ديسكات
2- والكاسيت اتغير
3- حصل تغير على الفانوس الخلفى

[kemo0o]

فى فرق ما بين 2009 و 2008 :
1- الفرامل الخلفية ديسكات
2- والكاسيت اتغير
3- حصل تغير على الفانوس الخلفى

طب وايه اللي فيها

الكاسيت جديد من امريكا كنت هجيبه ب 110 دولار وجديد يعني 600 جنية بالكتير
الفانوس نفس التكلفة يعني مايزودش في السعر
الطنابير والتيل ب 2000 جنيه مثلا !!

يعني كل الزيادة مش مكمله 3000 جنيه
ليه بقى يزودوا 7 الاف جنيه بين 2008 واللي بعدها !!!

[KSA2011]

امبارح انا كنت مع تاجر عربيات وقالى المفاجأه فى موضوع جمارك الاوروبى
السكودا تشيكى و التشيك بره الاتفاقيه دى
الجيتا مكسيكى و بالتالى مش هيطبق عليها القرار ده
المرسيدس سعرها زاد 15 الف جنيه من اسبوع عشان لما ييجى موضوع الجمارك يطبق تنزل 5 او 6 االاف جنيه يبقى عمل مكسب برضه
وكل عام وانتم بخير

[kemo0o]

امبارح انا كنت مع تاجر عربيات وقالى المفاجأه فى موضوع جمارك الاوروبى
السكودا تشيكى و التشيك بره الاتفاقيه دى
الجيتا مكسيكى و بالتالى مش هيطبق عليها القرار ده
المرسيدس سعرها زاد 15 الف جنيه من اسبوع عشان لما ييجى موضوع الجمارك يطبق تنزل 5 او 6 االاف جنيه يبقى عمل مكسب برضه
وكل عام وانتم بخير

لو الكلام ده صحيح ..... يبقى هي دي بلدنا الحلوة

[tamermagdy]

بجد اللي بيحصل في بلدنا دة تهريج - زيادة غير مبررة في اسعار السيارات و يليها قطع الغيار دة اكيد - يعني هي ناقصة

[Hosam_Optrawy]

يعنى الكلام طلع صح

عموما مش فارقه

[sa7aby]

يا جماعة الحل الوحيد إن إحنا نقاطع العربيات الجديدة
يعنى إللى معاه عربية و مقضياه يصبر كام شهر لحد لما نضرب السوق
التجار و التوكيلات ما يقدروش يصبروا على العربيات من غير بيع
عليهم قروض و دفعات فلوس و مرتبات بالهبل
و طالما هما بيستهبلوا فيها يبقى يشربوها
مين معايا فى الموضوع ده؟
نطلق حملة على المنتدى و الفيس بوك إن إحنا نقاطع شراء السيارات الجديدة لحين التعديل الجذرى فى الأسعار
إشمعنا الناس فى الدول المتقدمة بتقدر تدى التاجر على قفاه و إحنا عندنا العكس هو إللى بيحصل؟

[human]

بالاثبات و البراهين و كله كله التوكيل مش بيشرب
هوه بياكل
و احنا اللى بنشرب
لو خلوها ب 200 الف برضه الناس بتشترى
مبروك ليهم الكام مليون اللى جايين من الهوا

[human]

إشمعنا الناس فى الدول المتقدمة بتقدر تدى التاجر على قفاه و إحنا عندنا العكس هو إللى بيحصل؟

عشان هنا المواطن هو اللى بياخد على قفاه
و من المعلوم و المعروف ان اللى بياخد على قفاه ماينفعش يدى حد على قفاه

لغايه دلوقتى فى مصر اللى بيبيع حاجه و ياخد فلوسك بيحسسك انه عمل فيك جميل

[abo samra]

المشكله كمان ان فيه ستوك من السيفيك 2009 كتير جدا فى السوق ولو حد راح فرع التجمع اللى على الدائرى هيلاقى كميه هائله من السيفيك وكل الالوان موجوده عندهم يعنى لو بيفهموا (أ- ب) فى البيزنس كانوا المفروض يرخصوا سعر 2009 علشان يخلصوا منه وبعدين يجيبوا 2010 لا والمضحك كمان عاملين حسابهم وبيقولوا للعملاء انهم هيغلوا 2010 اللى لسه قدامه شهرين ونصف على ما يوصل علشان طبعا الزبون الطيب يقول الحق اشترى 2009 قبل ما 2010 ينز وتغلى
واتمنى ان يكون ده مجرد كلام علشان يخوفوا الناس ويشتروا 2009 لان لو غلوا 2010 زى ما بيقولوا يبقى تهريج

رايحه على فين يا بـــــــــــــــــــــــــــــــــــــــــــــــــ ــــــــلد !!!!!!!!!!