صوت غريب بعد الكيك داون

[arabmarket]

السلام عليكم اخوانى الهونداويه

معايا سيفيك 93 si والنهارده كنت فى شارع فاضى خالص وعملت كيك داون المهم العربيه طارت كالمعتاد لكن لما هديت سمعت صوت غريب اول مره اسمعه وهو صوت تكتكه بتزيد مع الضغط دواسه البنزين ولما بقلل الضغط بيقل ولما بقف نهائى بالعربيه وبعدين ادوس عادى مش كيك داون مبسمعش الصوت ده تانى وبزود عادى مش بسمعه

انا جربت مرتين كيك داون بعدها وبرضه بسمع نفس الصوت مش عارف ايه الصوت ده الى بيكون مع الكيك داون ده ياريت الى يعرف يساعدنى يا هونداويه

اخوكم الهونداوى الجديد
هيثم سلطان

[SAMEH_FOUAD]

طيب حاول تكشف على زيت الفتيس وشوف انت غيرتة اخر مرة امتى
وهل انت متاكد ان مصدر الصوت دة جاى من الفتيس

[arabmarket]

مش عارف يا سمسم الصوت جى منين بصراحه و زيت الفتيس انا مغيرتوش لانى لسه شارى العربيه ولما وديت العربيه للميكانيكى عشان اظبط تاكيهات واغير السرفيس قالى انت ماشاء الله مش محتاج تغير حاجه امشى بيها شويه كمان

انت عارف الصوت عامل ازاى : هقولك عامل زى مثلا الايقاع كل ما تزيد سرعته يزيد الصوت ولما تقلل يقل الصوت فواضح ان ده الصوت مصدره حاجه بتلف او بتدور مع مشى العربيه والله اعلم

عموما انا هكشف عليها قريب باذن الله

[sa7aby]

ده صوت التاكيهات والله أعلم
أنا كان عندى bmw و كانت بتعمل الصوت إللى بتقول عليه دة و إنخفض جدا لما زبط التاكيهات
الهوندا إللى معاية حاليا سيفيك 2008 إبتديت أسمع فيها الصوت ده على خفيف و خصوصا لما بكون قافل النوافذ

[SAMEH_FOUAD]

الصوت دة بيجى مع الجرى بالكيك داون بس ولا لما بتجرى عموما من غير الكيك داون ؟
عشان لو بيجى بس مع الكيك داون يبقى استبعد التاكيهات وطالما العربية مش بتسخن ولا بتاكل بنزين ولا مخنوقة يبقى ماتلعبش فيها احسن ودية نصيحة منى محدش هايعرف يرجعهالك زى الاول
ياريت تجاوبنى

[arabmarket]

الاخ sa7aby شكرا على محاولتك المساعده بس معتقدش انها تاكيهات

يا سمسم العربيه مبتكلش زيت الحمد لله ولا بتسخن اطلاقا والصوت ده بعد الكيك داون بس اما فى الجرى العادى مفيش الصوت ده نهائى

[SAMEH_FOUAD]

طيب بقولك اية يابشا غير الزيت وهاتة موبيل ,ونظف كابلات حساسات الفتيس
بس ماتلعبش فى الفتيس وماتخليش حد يقولك هاعملك والحوارات بتاعتهم دية انت بس امشى معانا خطوة بخطوة وان شاء الله خير

[arabmarket]

على فكره يا سمسم انا فاتركت حاجه مهمه لما وديت العربيه اغير السرفيس زى ما قلتلك والميكانيكى قالى مش محتاج تغير قالى ممكن بس اغير لك زيت الفتيس بس برضه ممكن تمشى بيه شويه عموما هغير زيت الفتيس بس سؤال بعد اذنك لو اناغيرت زيت الفتيس هنزل زيت الموتور ولا ملوش علاقه لانى لسه مغيره وممشتش بيه 2000 كيلو لسه عشان لو بيتغير معاه اصبر شويه واغير كل الزيوت مره واحده ومتقلقش مش هخلى حد يلعب ويفك الفتيس انا اصلا بقلق من الحوارات دى وعمر الميكانيكى المصرى ما هيعدل على الخواجه اليابانى وعن تجارب مش تجربه

بس فيه احتمال يكون حاجه تانيه غير زيت الفتيس ؟؟

[SAMEH_FOUAD]

لا علاقة بزيت الماتور وزيت الفتيس اية اللى دخل دة فى دة
زيت الفتيس عندك احمر وبيتغير كل 40000 الف كيلو حسب كتالوج السيارة بالنسبة للسيارة الاتوماتيك وعلى فكرة ماتستناش بعد كدة على زيت الفتيس ابدا ودائما تاعبة يعنى كل اسبوع كدة لانة روح الفتيس

[arabmarket]

سمسم باشا

الحمد لله المشكله اتحلت وبسبب توجيهاتك ..

المشكله كانت يا سيدى فى زيت الموتور انا كنت مغيره موبيل xp ومكنتش اعرف انه بيتعغير على 3000 كيلو وانا معدى 4000 بشويه

انت لفت نظرى لما قلتلى زيت الموتور بينقص قلت الصبح كده اشوف الزيت فعلا لقيته ناقص ولونه غااااااامق المهم رحت البنزينه الرجل اول ماشافه قالى يتغير فورا المهم غيرته وحطيت موبيل وان

والحمد لله العربيه رجعت طيااااااااااره تانى والوصت رااااح نهائى وعملت كذا كيك داون والحمد لله وغيرت كمان الفلتر بتاع الزيت وقلتلو نغير زيت الاتوماتيك قالى لا الزيت كويس ونضيف همشى بيه شويه وعلى تغيره الزيت الجايه هغيره باذن الله

تسلم يا سمسوم وكثر الف خيرك

[SAMEH_FOUAD]

الحمد لله ياباشا والف مبروك
وشكرا على اية احنا اخوات ومعملناش غير الواجب

[karimelzorba]

111111111111111++++++++++++++