أرجو المساعدة فى تكييف الهوندا

[khaled_rafea]

سلام عليكم, غيرت الكباس بتاع العربية بكباس استيراد بتاع ال97, المفروض ان الكباس القديم كان فريون 12 بتاع سيفيك 93 و الجديد 134 بتاع سيفيك 97,الكباس عندى بيفصل بعد 5 ثوانى و بالتتالى مش بيلحق يسقع, هل المفروض ان فلتر الفريون و الاكسبانشن يتغيروا هما كمان علشان نوع الفريون؟و منين اجيبهم؟

[SAMEH_FOUAD]

هو حضرتك كان لازم تغير معاة السربنتينة
بس يفصل بعد خمس ثوانى ممكن كدة يكون فية عيب فى الكباس دة
ومش عايزك تغير الاكسبانشين وتغرم ,ممن تجرب الكباس الاول

[khaled_rafea]

سمسم باشا متشكر على الرد, بس ليه اغير السربنتينة, ايه العلاقة, واللى كنت عاوز افهمه, هل نوع الفريون بيفرق فى الاكسبانشن و الفلتر ولا لأ, شكرا جزيلا

[SAMEH_FOUAD]

السربنتينة نوعين واحد لفريون r12 وواحدة تانية لr134 ودة هاتعرفة من حساس ضغط الفريون اللى متركب عليها
وبتبقى الفيشة واحدة بس بيبقى اكبر من الr 12
طبعا المفروض ان حضرتك جيبت كباس 134 يبقى لازم تحط فريون 134 والا كدة هيبوظلك الكباس ولازم بردة تبقى السربنتينة زية

وبعدين عشان تبقى حضرتك عارف وظيفة بلف الاكسبانشين :
انة مع زيادة وارتفاع الضغط بيعمل حرارة عالية جدا داخل تكيف السيارة فهنا بيتدخل بلف التمدد او (expansion valve) وبيقوم بتزويد كمية فريون اكتر

[khaled_rafea]

والله بجد مش عارف اشكرك ازاى, ربنا يخليك يا باشا ,بس بما ان الفريون ضغطه مختلف يبقى الاكسبانشن حيتأثر و مش حيشتغل مظبوط, صح و لا لأ ؟ وهل الفلتر حيفرق ولا لأ, يعنى كده انا محتاج اغير كل اجزاء التكييف اللى فاضله ؟؟؟

[SAMEH_FOUAD]

ياباشا انت بتشكرنى على اية احنا اخوات قبل اى حاجة .
ان شاء الله الموضوع يتحل
طيب دلوقتى احنا هانعمل خطوات مع بعض بحيث اننا نتاكد من كدة كفاءة دورة التبريد
1:شغل التكيف على سرعة واحد لمدة ثلاث دقائق وبعد كدة هاتة على السرعة الرابعة لمدة خمس دقائق والتكيف شغال
شوف فى العين الزجاجية هتلاقيها جنب علبة زيت الباور لو لقيت فقاعات هواء فى العين دية يبقى كدة حضرتك عندك هواء فى دايرة الشحن ولازم يتفرغ
2:لو مالقيتش حاجة حط ايدك على الماسورة اللى قدام فرن الشكمان بس خلى بالك عشان فية واحدة لازم تبقى سخنة جدا والماسورة التانية بتبقى باردة جدا وغالبا بيبقى عليها تعريق مية من جودة البرودة الموجودة
3:بالنسبة للفلتر اللى حضرتك بتتكلم علية هو مابيتقالش علية فلتر بالمعنى المظبوط هو كل اللى بيقوم بية انة بيجفف الفريون اللى بيخزنة وبينقية من الشوائب يعنى دة نستبعدة دلوقتى
انا بقى من رائى انك بدل ماتغير السربنتينة الاول هات بلف اكسبانشين استيراد الوضع اتغير والمشكلة اتحلت اشترية ماتغيرش اديك ماخسرتش حاجة وقللنا الاحتمالات
بس الفلتر مش لازم تغيرة لانة مالوش تأثير فى الموضوع
وياريت لو انت بردة كنت تخرج الكويل وتنظفة كويس وهتلاقية تحت درج التابلوة وومساميرة بتتفك من ورا البطارية فى حوض الماتور

[khaled_rafea]

ربنا يكرمك و يجازيك خير, حجرب و اقول لحضرتك النتيجة, شكرا على اهتمام حضرتك

[SAMEH_FOUAD]

استاذ خالد مشكلتك دية 90% من الكباس زى ماقولتلك ياريت تجربة

[khaled_rafea]

للأسف التكييف مبقاش شغال خالص دلوقتى, مستنى العربيه تخلص و حوديها لمتخصص يكشفلى على كل حاجة ان شاء الله, ميرسى كتير لمساعدتك

[SAMEH_FOUAD]

يبقى هو الكباس ياباشا وكان بيجيب اخرة لحد مافصل خالص
طالما عندك دلوقتى المروحة بس هية اللى شغالة ومافيش اى برودة ومتاكد ان الفريون مشحون

[khaled_rafea]

المروحة الداخلية شغاله بس مروحة السربنتينه مش شغاله, اصل العربية عند البوهيجى, يمكن حصل قفله ولا حاجة!

[SAMEH_FOUAD]

تخلص بس على خير ان شاء الله ونشوف المشكلة منين
بس انت لو جايب الكباس دة استيراد يبقى تغيرة وتجرب واحد تانى