الى كل ملاك و عشاق السيفيك..مساعدة قبل الخطوة النهائية و الحجز

[NaBeLeOn]

اولا احب اسجل اعجابي الشديد بمجهودكم فى المنتدى و انا متابع من فترة و بجد المنتدى كان من اكتر الاسباب اللى خلتنى اقتنع بالسيفيك

ندخل فى الموضوع .. والدى كان عايز عربية زيرو و طبعا فى سيناريو بيتكرر اكيد كتير اللى هوا الارتفاع بالقيمة السعرية للسيارة .. يعني نبدا باقل من 100 الف و بعدين كل شوية نعيد تفكير و نوصل ان العربية الفلانية احسن بس اغلى شوية مش مشكلة و هكذا لحد ما وصلنا ل range السيفيك و الكورولا و اللانسر .. يعني لحد 140 تقريبا

المشكلة ان والدى محتار جدا جدا .. انا الحمد لله مقتنع بالسيفيك و مصر عليها و هيا مع واحد صاحبي و ركبتها كتير و عربية بسم الله ما شاء الله عليها .. غير ان الهوندا عربيات محدش يقدر يقول عليها نص كلمة .. والدى بيقولى طب ليه منجيبش الكورولا 1600 مانيوال FO خصوصا ان كماليات الكورولا كتير فعلا .. انا ماسك فى نقطة الجنوب افريقي و كده بس مش قادر اقنعه اوى برضه .. يعني عايز اعرف اقنعه بالسيفيك تماما و فى نفس الوقت يقل انبهاره بالكورولا و بالطريقتين دول يحجز ان شاء الله بقلب جامد

و فى نقطة تانية محيرانى جدا هى اللون .. مع استبعاد الأسود ( لرفض والدى التام ليه ) و الأبيض .. يتبقى السيلفر و الجالاكسي و الشامبين و الأزرق و الكحلى ( لو فى ألوان تانية عرفونى برضه ) .. و بصراحة محتار بينهم كلهم عدا الكحلى فياريت المساعدة فى النقطة دى برضه

الف شكر مقدما على المساعده و دعواتكم

[fiatmomo]

الناس ازواق ..

بس انا رأى السيفك احسن بمراحل من الكورولا الجديدة ... ورأى احلى لون الفضى

بالرغم من انى مش من هواة السيارات اليابانية بس السيفك الجديدة بحس انها فى الاصل طيارة و هوندا قررو انهم يخلوها تمشى على الارض .

وعن تجربة انا دخلت التلات عربيات فى معارض سيارات مختلفة .. اللانسر الجديدة و السيفك و الكورولا الجديدة .

الانسر اقلهم من حيث الجودة ... هية ممكن تكون شكلا حلوه بس الخامات المستخدمة فى السيفك ارقى بكتير جداااااااا غير طبعا ان الانسر 1500 ... والموتور صغير جدا على حجم السيارة الكبيييييير .

الكورولا حلوة نوعا ما .. بس حسيت انها ضيقة ورا ... وتحس انها تقليدية جدا بس طبعا موتورها ممتاز .

اكتر حاجة مش عجبانى فى السيفك شكلها من ورا . بس ودية الحاجة الوحدية الى مش عجبانى فيها

رأى الشخصى من حيث السمعة سيفك , من حيث الشكل سيفك . من حيث الموتور سيفك , من حيث المساحة الداخلية سيفك .

و بردة انزل واتفرج على التلاتة بنفسك واحكم بنفسك ... لان كل واحد بيبقى لية انطباع عن العربية غير التانى .

[omar_megane]

السلام عليكم ورحمة الله وبركاته
اولا ربنا يوفق حضرتك لما هو فيه الخير
انا الحمد لله من ملاك السيفيك ولغاية دلوقتلى بيزيد اعجابى بيها
انا مش حازود عن اللى قاله الاستاذ fiatmomo
انا بقترح على حضرتك تشوف العربيات دى على الواقع وتقارن بينهم يعنى تجرب السيفيك وتطلع منها على طول على الكرولا علشان تحس بالفرق .انا عن نفسى ماركبتش الكرولا الجديدة بس مش مقتنع بيها خالص اولا موضوع جنوب افريقيا اكيد مش حيبقى بنفس جودة اليابان ثانيا الوسع الداخلى والتابلوه فرق السما والارض للسيفيك وده رأيى واهم حاجة هية ان الهوندا طول عمرها اغلى من التويوتا فلما يتساووا فى نفس السعر فدى لصالح السيفيك وكمان عالميا هوندا اعلى فى الجودة من تويوتا بس مش بفرق كبير.صحيح ان الكرولا فيها اوبشنز اكتر بس دى مش اهم حاجة فى العربية.وخلى بالك الكرولا عليها حجز اكتر من السيفيك فحتتأخر
على العموم العربيتين احسن من بعض واكيد حيبقى فى نبرة تحيز من ناحينى فحضرتك صلى استخارة وتوكل على الله انا كنت فى مكانك واخترت السيفيك عن اقتناع تام بدليل انى يوم ماشوفتها فى المعرض حجزتها اليوم اللى وراه ومبروك مقدما

[CosmicOne]

NaBeLeOn

بص يا باشا

بصراحة رأى الشخصى ان تتحدث مع والدك بعقلانية فى المميزات و العيوب فى كل واحدة وبالأخص الكورولا

وضح لوالدك تميز السيفيك فى الوسع (فرق شاسع)

الخامات المستخدمة (ورية باب السيفيك عامل ازاى جنب باب الكورولا و ورية فرق التبلوة ديزاين و خامات)

اسم هوندا اعلى من اسم تويوتا فى العالم مع ان مبيعات تويتا اكبر بسبب تنوع الموديلات

الكرولا اليابانى موتورها المتور القديم 106 حصان و الجير بوكس القديم 4 نقلات يعنى تقنية مستخدمة من يمكن 2002 مش متزكر بصراحة و كمان فقيرة شوية فى الكماليات

الكرولا الجنوب افريقى اعلى بكتير فى الكماليات و تستخدم الجير بوكس الجديد و الموتور الجديد بس بصراحة اول تجربة لعربية متجمعة فى جنوب افريقيا يعنى فقدت اهم حاجا و هى الجودة اليبانى

السيفيك موتورها اكثر تقدما من موتور الكرولا بسبب الV-TEC و ايضا الجير بوكس 5 نقلات

موتور السيفيك الجديد يستخدم كامة واحدة و تصنيع قمة فى الأتقان و خامات خفيفة الوزن و تكنولوجى الVtec للوصول ل125 حصان و لكن تويوتا لجأت ل موتور كامتين حجمة اكبر و وزنة اتقل بكتير للوصول ل 122 حصان (الجنوب افريقى) (المعلومة دية من منتديات اجنبية للسيارات)

عفشة السيفيك متطورة جدأ عن عفشة الكرولا(السيفيك عفشة Double wishbone fully independant while Corolla use old semi independant suspension)واعلى بكتير فى الثبات لكن بصراحة عفشة الكرولا غالبا هتكون اريح شوية فى المطبات لان السبفيك تستخدم مساعدين و يايات رياضية

هوندا عملت ديزاين جديد خالص اسمو one motion desin او حاجا زى كدة لكن تويوتا قلدت الكامرى و صغرتها شوية و خلاص على كدة و دة يوضح مجهود شركة بتبتدع علشان المستهلك و شركة بتستسهل

معلومة اخيرة ان بشهادة اغلب مواقع التقييم الأمريكية و الأسيوية ان هوندا افضل صانع محركات اربعة سلندر فى العالم اجمع يكفى محرك الS2000 الاسطورة الى فضل سنين كتير اوى من احسن 10 مواتير فى العالم.

السيقيك بتلوح نظر الشباب و الناس فى الشارع ليها اكتر بمراحل من الكرولا (و أسال اى من ملاك السيفيك الجديدة)

معلش لو دايئت حد بيحب الكرولا الجديدة بس دية بجد وجهة نظرى الشخصية و لست اعممها على كل الناس :)

[NaBeLeOn]

بصراحة يا جماعة مش عارف اشكركم ازاى على المساعدة دى و بالاخص CosmicOne بجد الف شكر على الرد المفصل و الاكتر من رائع ده .. تعبت حضرتك معايا

فى نقطة كمان نسيت اوضحها .. ان والدى قلقان برضه من موضوع الصيانة و قطع الغيار و هو مقتنع تماما ان النقطة دى فى صالح الكورولا و مش عارف ايه الحل فيها بصراحة خصوصا اننا فى المنصورة مش القاهرة او بورسعيد .. فياريت لو حد عنده فكرة يوضحها برضه و ربنا يكرم

[mostafa.sharkawy]

انا احب اقول بس ان ناس كتير مقتنعة بال تويوتا عشان اسمها قديم اوى فى مصر و لية سمعة بالذات عند الناس الكبيرة على العكس بالنسبة للهوندا ان سعر اعادة بيعها مش فى صالح المالك . مع ان دة غلط كبير . فعلا الهوندا احسن عربية يابانى فى العالم حتى فى السوق الأمريكية بيحبو يركبو الهوندا عن باقى اليابانى مع ان كلو تقريبا بيوفر فى البنزين و دة اهم حاجة لكن الهوندا موتور قوى جدا كمان واسعة و مريحة فى المسافات الطويلة. و عموما بالنسة للصيانة مش هتروح كل يوم عند التوكيل. و ربنا يوفقك لاختيار الأفضل بالنسبة ليك .

[CosmicOne]

عفوا يا باشا :)

[CosmicOne]

انا احب اقول بس ان ناس كتير مقتنعة بال تويوتا عشان اسمها قديم اوى فى مصر و لية سمعة بالذات عند الناس الكبيرة على العكس بالنسبة للهوندا ان سعر اعادة بيعها مش فى صالح المالك . مع ان دة غلط كبير . فعلا الهوندا احسن عربية يابانى فى العالم حتى فى السوق الأمريكية بيحبو يركبو الهوندا عن باقى اليابانى مع ان كلو تقريبا بيوفر فى البنزين و دة اهم حاجة لكن الهوندا موتور قوى جدا كمان واسعة و مريحة فى المسافات الطويلة. و عموما بالنسة للصيانة مش هتروح كل يوم عند التوكيل. و ربنا يوفقك لاختيار الأفضل بالنسبة ليك .

100000000000000000000000000+

[CosmicOne]

بصراحة يا جماعة مش عارف اشكركم ازاى على المساعدة دى و بالاخص CosmicOne بجد الف شكر على الرد المفصل و الاكتر من رائع ده .. تعبت حضرتك معايا

فى نقطة كمان نسيت اوضحها .. ان والدى قلقان برضه من موضوع الصيانة و قطع الغيار و هو مقتنع تماما ان النقطة دى فى صالح الكورولا و مش عارف ايه الحل فيها بصراحة خصوصا اننا فى المنصورة مش القاهرة او بورسعيد .. فياريت لو حد عنده فكرة يوضحها برضه و ربنا يكرم

ماظنش ان الكرولا الجديدة حتكون ارخص من الهوندا فى قطع الغيار

عموما انا التوكيل قلى ان كل 5000 كيلو حدفع صيانة 375جنية لحد ال 40000 كم
و دة 205جنية Mobil1
44 جنية فلتر زيت
80 جنية مصنعية
10 جنية تشحيم
+ الضرائب

البوجيهات بتعد 100000كم
سير الكاتينة سلسلة معدن اظن بيعد 200000 كم

[egawady]

السلام عليكم ورحمة الله وبركاته
انا عاوز اسأل سؤال لملاك الهوندا سيفيك الجديدة ... انا عارف انها عربية ممتازة وهايلة وعشرة على عشرة .. بس انا شايف انها واطية شوية عن الأرض .. يعنى ممكن تخبط كتير فى المطبات الصناعية والبلاعات .... الخ .... وطبعاً احنا عارفين شوارعنا عاملة ازاى !!!
يا ريت مالكى الهوندا يردوا عليا ويوضحولنا النقطة دى
هل هى فعلاً واطية ولا انا بيتهيألى ؟

وشكراً

[CosmicOne]

هيا وطية على الارض
بس مش بالشكل الى بتوحى بية معادا الشنب قدام
لكن بصراحة انا حكيت بيها مرتين تلاتة بس اول مجبتها و كان راكب معايا 4
بس من ساعتها لو كنت حريص كولو بيكون تمام
اظن بردوا ان الكرولا الجديدة شرحوا

[NaBeLeOn]

و أخيرا تم الحجز بحمد الله

باركولى يا جماعة حجزنا خلاص من فرع الفطيم فى اسكندرية و بعد مغامرات شاقة فى جو عاصف جدا فى الاسكندرية .. اللى حصل انى كلمت ال3 فروع اللى فى القاهرة اتنين قالوا دفعة مارس خلصت و بنحجز فى دفعة أبريل حاليا و فرع التجمع قال أبريل كمان خلص و بيحجزوا مايو .. طبعا قلقت جدا و قلت اجرب اسكندرية و امرى لله قالى فاضل عربيتين بالظبط فى دفعة مارس واحدة سيلفر و واحدة شامبين انا ما صدقت خدت بعضى و طلعت على اسكندرية مع ان الجو كان صعب جدا و المطر شغال طول الطريق .. و الحمد لله حظى كويس كان فى واحد هناك فى التوكيل لما رحت بيستلم عربيته و كانت سيلفر عجبنى اللون عليها جدا و توكلت على الله و حجزتها .. و فى نقطة تانية مهمة برضه ان الشامبين الفرش بتاعها بيج و طبعا مش محتاج اقول انه بعد فترة بسيطة بيكون عامل ازاى لكن الفرش الرمادى اللى مع السيلفر احسن بكتير طبعا فى النقطة دى

ان شاء الله المفروض الاستلام 20 مارس .. دعواتكم

[mostafa.sharkawy]

أولا الف مبروك يا باشا ممكن تقولى اية اللى عملتو بالظبط يا نابيليون . يا ريت بالتفصيل لو سمحت.

[NaBeLeOn]

الله يبارك فيك يا أستاذ مصطفى

مش عارف حضرتك عايز تعرف ايه بالظبط غير اللى انا موضحه .. عموما أنا أفضل ان حضرتك تسألنى أسئلة محددة عن المعلومات اللى عايز تعرفها و انا مش هتأخر ان شاء الله .. عشان بس انا مش عارف اتكلم فى ايه بالظبط

[mostafa.sharkawy]

خلاص يا باشا الف شكر انا كنت عند التوكيل امبارح و حجزت السيفيك الفرانى و هستلم يوم 25 مارس .الف مبروك لينا