محتاج رأى حضراتكو فى هوندا accord model 1982/1983

[chipse]

اولا بسم الله الرحمن الرحيم
انا عضو معاكو فى المنتدى بقالى مدة كبيرة
بس دة اول توبيك ليا
لانى محتاج رايكو فى حاجة مهمة
انا مهندس شاب خريج السنة دى
معايا حوالى 25000
و عايز لشترى عربية فى الرينج دة
و كنت بفكر فى هوندا اكورد 82/84
شكلها بيعجبنى اوى
بس بصراحة معرفش عنها اى حاجة
ف ياريت تساعدونى بالمعلومات
ل هيا عربية كويسه
سعرها فى حدود قد اية
قطع الغيار و اعادة البيع
مع العلم ان دى ان شاءالله هتكون اول عربيه ليا
و لو حضراتكو شايفين ان فى عربيه تانيه احسن فى حدود ال 25000 قولولى
شكرا
و اسف للاطالة

[SAMEH_FOUAD]

اهلا بيك ياباشا

الاكورود سيارة كويسة بس يعيبها حاجتين

غلاء قطع الغيار وانها نادرة - لو ماتورها الاصلى اللى هو 2000 سى سى هيبقى حاجتة قليلة لكن لو متسقطلها ماتور مش هتبقى فيها مشكلة

وهية فعلا بتعمل من رينج 21 الى 24 الف

[AHMED REFAT]

اخى الحبيب .. انا ها اقولك على الهوندا الاكورد بكل وضوح وشفافية لانى كان عندى اثنين من قبل واحدة اكورد 83 سيدان مانيوال والاخرى 84 كوبيه اتوماتيك .. والحقيقة ان العربية ممتازة ممتازة الى ابعد الحدود وها تلاقى فيها الفخامة والوسع والثبات والكماليات اللى قلبك يحبها وفعلا عربية ممتعة جدا ... كماليات كتير ... وطول وعرض وعربية من الاخر كانوا بيقولوا عليها زمان اتوميبل .. ولكن يشوبها الكثير فعلا من المشاكل .. اولا قطع الغيار متوفرة بس مش قوى برضة ساعات كتير فعلا بتدوخ لما بتلاقيها وغالية جدا دى حقيقة .. موجود منها جديد عندة قورة فى جسر السويس والمستعمل ( الاستيراد ) فى الحرفين .. بس اللى فاضى بقى وينزل يدور .. الاكسسوار بتاعها غير موجود نهائيا وكان بيطلع روحى علشان الاقيه منها النواكل الخارجية اللى على النوافذ والاكصدامات والشنب الفبر اللى فى الاكصدامات وداخل السيارة فى الابواب والتابلوه .. هذا لانها سيارة قديمة اولا ولم تكن متوفرة بكثرة ده ثانيا ... وعلى فكرة مواتير الاكورد القديم 1600 مش 2000 كماسبق فى تعليق احد الاخوة ومعظم العربيات مواتيرها بتاعة الفابريكة وطبعا بيتعرف من اول ما بتشوف العربية .. خلاصة القول ان العربية دى فعلا ركوبة مميزة ولكن لابد من البحث عن حالة نادرة جدا تكون مرفوعة ومتحافظ عليها وجديدة وانت تكون غاوى الهوندا لانها عربية ناعمة ومريحة وقوية وثابتة متعة بصراحة بس لما تدور على قطع غيارها عايز تبقى حاببها علشان تستحملها .. انت قولتك الحق بتاعها والله وربنا يوفقك الى الخير ان شاء الله

[Yones]

الاكورد من 82-85 الجيل التانى ونزلت بمواتير 1600-1800 سى سى
فيه اوتوماتيك ومانيوال سيدان وهاتشباك
فيه منها بفتحة سقف كهربائيه وفيه من غير
ايريال كهربائى+ستنر لوك+زجاج كهربائى+ تكييف +باورستيرنج +فرش جلد بلون العربية حاجات تانية كمان
بس المشكلة ان السوق عندنا فى مصر ظالمها للاسف بالنسبة للسعر وقطع الغيار بس ان شاء الله ربنا يوفقك للخير ويكرمك

[Yones]

الاكورد الجيل التانى 82-85 نزلت بمحركات 1600 سى سى -1800 سى سى
وفيه منها مانيوال او اتوماتيك و سيدان او وهاتشباك
ده غير الباور ستيرنج-زجاج كهربائى -ايريال كهربائى-تكييف-سنترلوك-فتحةسقف كهربا فى بعض الموديلات-وحاجات تانية كمان زى فرش الجلد بلون العربية ولون التابلوه فى الصالون الداخلى وغيره
بس للاسف سوق السيارات فى مصر كسعر وكقطع غيار بس ان شاء الله ربنا يوفقك للخير وربنا يكرمك بحالة نضيفة ويياركلك فيها

[chipse]

alf shokr l 7adaratkoo 3ala sor3t el estgaba

b el nesba ll a5 elly kan 3andoo el 3arabya abl keda
momken yedeeny ma3mloomat aktar 3an as3ar keta3 el gheyar

[Yones]

العفو واهلا بيك فى المنتدى
اسعار بعض قطع الغيار:
شبكة امامية :150 جنيه
فوانيس جانبية :35 جنيه
فلتر بنزين : 15 -20 جنيه
فلتر زيت: 15 جنيه تقريبا
فلتر هواء: 20-25 جنيه تقريبا
مرايه جانبية: 85-95 جنيه
تيل فرامل امامى:50 جنيه
كبالن : 200-210 جنيه تقريبا
كاوتش كوبلن بالشحم الداخلى: 20-25 جنيه

ودى قطع غيار تايوانى بس الاصلى اغلى منها طبعا
وبالنسبة لاماكن قطع الغيار :
-حفنى فى عمارات السعودية فى حدائق القبة
-شارع دمشق فيه محل منهم قدام مدرسة الكواكب وفيه محل تانى بعد ميدان الجامع بشوية فى شارع جانبى
-توشكى فى الحرفيين
-ممكن تلاقى قطع غيار استيراد فى الحرفيين فى كذا مكان
- قورة فى جسر السويس
-محل هوندا فى شارع ابن الحكم بعد ميدان التجنيد