تجربتى مع سحب السيفيك

[hany63]

[OVERLINE]
صباح الخير ياشباب
اسمحوا لى اقولكم على حاجه بسيطه بس بصراحه فرقت معايا كتير فى السحب
انا معاى سيفيك 2010 vti و كنت دايما حاسس ان سحبها ضعيف و دايما تنقل بدرى غصب عنى يعنى باختصار العربيه تقيله ومش فايقه رغم اني غيرت فلتر الهوا ل k&n ستوك
وكشفت عليها فى التوكيل قالوا كله تمام لدرجة انى كنت باكلم نفسى و اقول معقوله دى الهوندا اللى كل الناس بتحكى عليها؟
لحد ما جه اليوم اللى اكتشفت السبب
السبب طلع فى تصميم بدال السرعه ما تستغربوش
كلنا متعودين من زمان فى السواقه على ارتكاز القدم اليمنى على الكعب امام دواسة الفرامل مباشره وعند الضغط على بدال السرعه تاخذ القدم زاويه 45 درجه لان الحركه تكون بمشط القدم فقط لان الكعب ثابت وهنا المشكله
لأن بدال السرعه مرتكز على الارضيه زى الالمانى وبالتالى هندسيا هاتكون الدوسه ضعيفه مهما ضغطت لان مكان الضغط فى النصف الاسفل من البدال و بطرف القدم مهما ظبطت الكرسي و بالتالى يترجم هذا الى قياده اقتصاديه من وحدة ECU
غصب عنك

و لتلافى ذلك يتم الضغط على بدال السرعه بكامل القدم اى وضع الكعب امام البدال و عند استخدام الفرامل يجب سحب القدم للخلف قليلا باتجاه الفرامل ثم الضغط على الفرامل و هكذا وسوف يترجم هذا الى قياده رياضيه من ECU

وفى حالة الزحام تتم القياده بالاسلوب المعتاد
بصراحه يا جماعه العربيه اتغيرت 180 درجه و بقت ممتعه فى السواقه بس خلوا بالكوا كويس و انتوا بتجربوا ويا ريت يكون فى حته فاضيه في الاول واسف انى ازعجتكم

[masterzmind]

بص يا باشا معلش يعنى انا مش مقتنع بكلام دة واستنى رائى الاعضاء

[medododo]

متابع بإستغراب

[yasserelsayad]

تقريبا كل الموضوع ان انت لما بتدوس على الدواسة بكل رجلك بتحرق اسرع على الغيار عشان دوستك بتكون تقيلة شوية ودا اللى مديك الاحساس دا .. اصل الدواسة عندى كدا باردوا فى البى ام

[hany63]

ارجوا التجربه قبل الرد مع العلم ان هذا الموضوع للموديلات الجديده اللتى بها خاصية drive by wire

[hany63]

وعلى فكره مش انها بقت بتسحب بس انما العربيه بقت فايقه جدا

[SAMEH_FOUAD]

شوف ياباشا هو عربيتك مافيهاش economy mode عشان تعمل كدة انك على حسب دوستك توفرلك فى البنزين لأ هو الطبيعى فى الهوندا انك لما بتعود العربية على اسلوب قيادة بتخلى الكمبيوتر ينقل بدرى لان رجلك خفيفة والاربى ام بيرتفع بالراحة فبيضطر ينقل والعربية لسة عزمها مش قوى عشان كدة انت بتحس ان العربية مخنوقة

لكن لما انت دوست جامد بتقل رجلك خليت العزم يطلع لانك زود بنزين فى اول طلعة ولسة العربية على الترس الاول وبالتالى امر النقل بقى اسرع عشان كدة بقى بيجمع احسن

وعلى فكرة لو عايز تسوق من غير ماتغير وضعية رجلك يبقى حرك مشط رجلك فقط وشوف النتيجة هتلاقيها احسن وأأمن من الطريقة اللى حضرتك بتقولها ومش محتاج تتعود عليها

وبعدين عشان تخرج طاقة الماتور صح من فتيس اتوماتيك اوعى تضغط مرة واحدة لأ دوس نص دوسة وسيب ودوس نص دوسة وسيب كدة الكمبيوتر فهم انك هتسوق رياضى وهيضطر يزود الهواء عشان يكفى نسبة البنزين اللى دخلت وبالتالى سحب واداء اعلى يارب اكون قدرت اشرح طريقة قيادة السيفيك 2010 والحصول على اعلى تسارع , وعلى فكرة نفس الطريقة تتطبق على الاجيال السابقة من السيفيك او اى موديل من هوندا سابق

[م/محمد صلاح]

انا معايا السيفيك من 2007 بس بعد الموضوع ده حاسس انهم ضحكو عليا وباعولى حاجه غير الهوندا انا مستغرب جدااااااااااااااااا

[medo12]

الهوندا زي الفل ماشاء الله وانا معايا 2010 والله اكبر ماشاء الله ماشيه زي الفل موضوع غريب فعلا يعني

[tarekomar66]

++1

[khaledfox]

موضوع جميل جداااا

[hany63]

على فكره ياجماعه انا عملت الموضوع للى حاسس ان العربيه سحبها ضعيف و بالفعل تصميم البدال فى السيفيك رأسى يديبلك احساس انه تقيل و خصوصا للناس اللى حجم رجلها صغير بعكس باقى العربيات اللى دواستها افقيه زى الفرامل وعشان تتخيلوا الموضوع حط قدامك قزازه مياه و حاول توقعها من غير ما تحركها هتلقى لازم تخبطها من اعلى نقطه فيها

اما بالنسبه ان الواحد يدوس و يسيب و يرجع يدوس انا شايف ان ده لا يناسب الاوتوماتيك لانك بمجرد ما بتشيل رجلك العربيه بتاخد الغيار الاعلى و اشكر ليكو اهتمامكم

[hlmnz]

على فكره ياجماعه انا عملت الموضوع للى حاسس ان العربيه سحبها ضعيف و بالفعل تصميم البدال فى السيفيك رأسى يديبلك احساس انه تقيل و خصوصا للناس اللى حجم رجلها صغير بعكس باقى العربيات اللى دواستها افقيه زى الفرامل وعشان تتخيلوا الموضوع حط قدامك قزازه مياه و حاول توقعها من غير ما تحركها هتلقى لازم تخبطها من اعلى نقطه فيها

اما بالنسبه ان الواحد يدوس و يسيب و يرجع يدوس انا شايف ان ده لا يناسب الاوتوماتيك لانك بمجرد ما بتشيل رجلك العربيه بتاخد الغيار الاعلى و اشكر ليكو اهتمامكم

1- عيب الواحد يرد عليك بالكلام لاني خلقي ديق اوي وبالذات في الفتي
نرجو الالتزام بأدب الحوار ولو خلق حضرتك ضيق يفضل عدم المشاركة اصلا بأي تعليق حتى لا تتعرض للوقف

2- لو مش عارف حاجه قول مش عارف احسن من الخزعبلات اللي بتتقال لان فيه ناس بتكلمني وصدقت الكلام ده
من حق العضو ابداء وجهة نظره وما ذكرته حضرتك يعتبر شخصنة وتطاول مرفوض ولا نقبل به في المنتدى حتى لو مع حضرتك دكتوراه في ميكانيكا الهوندا

3- يرجى من الاداره الغاء الموضوع لان فيه مغالطات كتيره سواء من كاتب الموضوع او من الردود
ليس من حقك الحجر على آراء الآخرين ولكن من حقك تماما الاعتراض بشكل يليق بأدب الحوار

4- على العموم الرد في الموقع ده ولو فيه حد عنده خلق يترجم ويرد على الباشا
Technical Overview of Honda's new R18 i-VTEC Implementation

المنتدى ليس call center لشركة هوندا بحيث ان من يكتب فيه يجب ان يكون كلامه صحيح 100% وانما هو مكان للحوار وابداء الرأي والتجارب الشخصية للأعضاء ومن حق الجميع المشاركة والاعتراض

مشرف الياباني
5أ

[SAMEH_FOUAD]

1- عيب الواحد يرد عليك بالكلام لاني خلقي ديق اوي وبالذات في الفتي
2- لو مش عارف حاجه قول مش عارف احسن من الخزعبلات اللي بتتقال لان فيه ناس بتكلمني وصدقت الكلام ده
3- يرجى من الاداره الغاء الموضوع لان فيه مغالطات كتيره سواء من كاتب الموضوع او من الردود
4- على العموم الرد في الموقع ده ولو فيه حد عنده خلق يترجم ويرد على الباشا
technical overview of honda's new r18 i-vtec implementation

يأستاذ hlmnz ماينفعش الرد دة خالص اهدى شوية ومش كدة الراجل حتى لو قال حاجة هو حاسسها بس اكيد ماعرفش يوصلها او ممكن يكون عندة عيب فى العربية وفاكر انها كلها كدة

ياريت بس نهدى شوية احنا كلنا اخوات واسلوب الحوار لا يجوز فى قسم الهوندا ابدا

ياريت تتقبل كلامى انا عارف انكم راجل محترم ومش مصدق الصراحة ان الكلام يطلع منك اعذرنى انا بكلمك كأخ

[hlmnz]

يأستاذ hlmnz ماينفعش الرد دة خالص اهدى شوية ومش كدة الراجل حتى لو قال حاجة هو حاسسها بس اكيد ماعرفش يوصلها او ممكن يكون عندة عيب فى العربية وفاكر انها كلها كدة

ياريت بس نهدى شوية احنا كلنا اخوات واسلوب الحوار لا يجوز فى قسم الهوندا ابدا

ياريت تتقبل كلامى انا عارف انكم راجل محترم ومش مصدق الصراحة ان الكلام يطلع منك اعذرنى انا بكلمك كأخ

يا استاذ سمسم ماينفعش المواضيع ديه تتكتب عيب اوي اوي اوي ولو في اي منتدى تاني كانت الادراه قفلوه من زمان لان فيه ناس على قدها في المعلومات عن السيفيك فتروح انت كاتب معلومه غلط وكارثه بكل الاشكال في نفس الوقت الناس اللي بره بتتكلم ازاي نحل التسارع في مواتير Rعن طريق تغيير torque cam وانها مشكله حتى بعد تركيب التربو ومحاولات كل يوم في مكان مختلف وبعدين واحد يطلعلك يقلك دواسه

حط نفسك مكاني وانت بتقرا المواضيع

لازم نحارب الموضوعات ديه شويه ونحاول نتكلم في حاجات مفيده