سيتي ولا بلاش !!

[surfer3098]

يا جماعة أنا إن شاء الله ناوي أشتري عربية قريب وفكرت في كذا عربية وطبعا أدامي إني أشتري هوندا سيتي 2010 اوتوماتيك كل الكماليات ماعدا فتحت السقف زيرو بس عندي كام استفسار كده لحد مروح التوكيل يا ريت حد يفيدني فييهم
1)هل السيتي عربية واسعة لأن أنا طويل شوية فمثلا اللانسر البومة مبعرفش أقعد فيها
2)هل هي واطيا برده زي السيفك وهتحك في مطباطنا الحلوة
3)اسعار قطاع الغيار إيه نظامها والتوكيل إيه نظامه
4)السيتي 2012 نازلة امتى وهل هتفرق كتير عن el-2010 الفي السوق
أرجو الرد وشكرا مقدما

[surfer3098]

إيه يا جماعة ماحدش عايز ياخد ثواب فينا ولا إيه :( :(

[Shamaa17]

إن شاء الله عصابة الهوندا هيفيدوك بس ممكن يكون محدش منهم قاعد دلوقتى

[SAMEH_FOUAD]

اهلا وسهلا بيك ياباشا ومعلش انا بعتذرلك بالنيابة عن اعضاء قسم هوندا

بالنسبة للسيتى الجديدة مميزاتها :

1- تصميم جميل جدا سواء بالخارج او بالداخل

2- السيارة محركها ممتاز وهادىء جدا واستجابتة سريعة وموفر فى البنزين الصفيحة بتعمل 240 كم

3- بالنسبة للثبات العربية دية ثباتها اتحسن كتير عن الموديلات السابقة وثباتها كويس جدا لحد سرعة 160 كم بعد كدة بتبدأ تخف تدريجا

4- السيارة عزلها ممتاز , تقفيلها كويس جدا , تكييفها جميل جدا

5- العربية من حيث الرحابة مش واسعة ومش ضيقة لكن لو حضرتك طويل مثلا 185 او 188 سم يبقى هتضطر ترجع الكرسى لورا ومش هيضايق الركاب الخلفيين للدرجة اللى حضرتك كنت بتحسها فى اللانسر , لا السيتى سقفها عالى وقعدتها مريحة جدا , بس هية عيبها انها مش عريضة يعنى اتنين ورا وواحد حجمة صغير جنبيهم

6- بالنسبة لمسألة الانخفاض العربية ارتفاعها مناسب للشوارع المصرية وهية اقل من السيفيك بنصف سم , بس مع التحميل اكتر من اتنين فى الخلف لازم العربية هتحك او حتى لو اتنين فى الخلف بس وزنهم تقيل شوية

عيوب السيتى :

1- السيارة صعب ان اى حد يشتغل فيها

2- العربية قطع غيارها غالية بمعنى كلمة غالية ولاسف مش منتشرة خارج التوكيل وناس محدودة هية اللى بتبيعها

3- جودة الخامات مش بالدرجة اللى احنا متعودين عليها من هوندا , بس دة بقى حال كل العربيات الحديثة يعنى مش هية لوحديها

4- السيارة سعرها غالى اوى على عربية تعتبر اوبشنها ضعيف جدا مقارنة بمنافسيها

بالنسبة لموديل 2012 فطبعا هيتعملة face lift جامد جدا بس مش عارفين هينزل مصر امتى والتعديل دة هيشمل اضافة اكصدامات رياضية تحفة و جنوط مقاس 16 بوصة و17 بوصة , مصابيح امامية , وخلفية بنظام led واوبشن جامد للحماية من السرقة وايضا انظمة حديثة ومتطورة بس هل الحاجات دية الفطيم هينزلها هو دة السؤال لان العربية لو نزلت كدة سعرها هيعدى وممكن توصل الى 180 الف جنية الهاى لاين و160 الف الفئة البيز لاين , وكمان التعديل هيشمل الصالون الداخلى من اضافة اماكن تخزين والتطعيمات الخشبية

[surfer3098]

باشا ألف مليون شكرا على وقتك وتعبك معايا الرد ما شاء الله وافي جدا أنا هحاول أروح اركبها في معرض وربنا يسهل ويوفق للفيه الخير وادعيلي بقى xd شكراااااااااااا

[OmaR_FekrY]

يا جماعة أنا إن شاء الله ناوي أشتري عربية قريب وفكرت في كذا عربية وطبعا أدامي إني أشتري هوندا سيتي 2010 اوتوماتيك كل الكماليات ماعدا فتحت السقف زيرو بس عندي كام استفسار كده لحد مروح التوكيل يا ريت حد يفيدني فييهم
1)هل السيتي عربية واسعة لأن أنا طويل شوية فمثلا اللانسر البومة مبعرفش أقعد فيها
الموديل الجديد مش واسع زى اللى قبله بس اوسع من اللانسر
2)هل هي واطيا برده زي السيفك وهتحك في مطباطنا الحلوة
للاسف واطيه بس مش هتحك غير لو فى ناس كتير معاك لكن لو لواحدك لا ... بس ده تاثيره ايجابى على الثبات طبعا
3)اسعار قطاع الغيار إيه نظامها والتوكيل إيه نظامه
غاليييييييه جدا الشكل الجديد و صعب تلاقيه بسهوله بره التوكيل لانها لسه منتشرتش اوى و مفيش قطع غيار من الشكل ارلقديم تنفع تركب عليها
4)السيتي 2012 نازلة امتى وهل هتفرق كتير عن el-2010 الفي السوق
دى معرفش :)
أرجو الرد وشكرا مقدما

[Sindibad]

أضافه

أحب أضيف لما قيل سابقا ان هذه السياره اعتماديتها عاليه جدا , يعنى تدور وتمشى , مفيش مشاكل مفاجأه وتتحمل ظروف القياده فى مصر (انا كان معايا ال2004 وندمت انى بعتها)

[OmaR_FekrY]

أحب أضيف لما قيل سابقا ان هذه السياره اعتماديتها عاليه جدا , يعنى تدور وتمشى , مفيش مشاكل مفاجأه وتتحمل ظروف القياده فى مصر (انا كان معايا ال2004 وندمت انى بعتها)

دى حقيقه انا العربيه معايا من 2008 و مبصرفش عليها غير زيت بس و كل فتره تيل او بوجيهاات .. بس :)

[eng_maged]

ممكن كمان تبص على المواضيع ده

http://www.nilemotors.net/Nile/190680-5.html

http://www.nilemotors.net/Nile/191751-5.html

[shero379]

الفطيم اللى على الدائرى ممكن تعمل عندهم test drive

[checo4lamor]

ولله انا مركبتهاش بس على الى شوفتو هى شكلها حلو و علوها يعنى هى الهوندا معروفة انها واطية عشان الثبات و كده المكنة برضو كويسة لانى مشوفتهاش عند حد بتتصين اما السعر فا غالة جدا جدا و قطع الغيار برضو غالية جدا و مش متداولة و لو عاوز رايى هى سعرها قريب جدا من الهوندا ال 2000 هتلك واحدة و هتلاقى منها فايق كتير لان اغلب الى ركبها ناس كبيرة و شكلها حلو عائلية و رياضية برضو و هى اعلى من الموديل الجيل الخامس بشوية و كمان اكبر و اوسع و ممكن تجيب حاجة 2002 برضو هتبقا ملهاش حل و لو مصر تجيب زيرو انا العربية الى دخلت دماغى فى العربيات الزيرو و سعرها جميل هى البروتون المليزى جين 2 و زى الفل صالون و كماليتا و اوتومتيك و زى الفل و ب 85000 تقريبا و بالتوفيق ان شاء الله بس ارشحلك الهوندا السيفيك الى قولتلك عليها احسن بكتير من كل دول

[hitham_sh]

انا معايا سيتي 2009 بقالها سنه ونص بصراحه احسن عربيه جبتها لحد دلوقتي مبسوط جدا معا ومرتاح جدا على فكره انا طولي 183 ووزني 125 :) وبقعد فيها مرتاح والي ورايا مش مزنوق انا مرجع الكرسي على الاخر فعلا كل الي الي اتقال قبل كده مزبوط فعلا بس بالنسبه لقطع الغيار مش غاليه اوي يعني لاني كان معايا قبلها سريون 2007 كان تيل الفرامل بتاعها اغلى والفلاتر بتاعهتا اغلى من الستي معرفش بقه قطع الغيار الكبيره اسعراها ايه لاني الحمد لله محتجتهاش وخلي بالك حتى لو قطع غيارها غاليه شويه لاكن بتعيش يعني انا الحمد لله معدي 38000 كلم دلوقتي ومغيرتش فيها اي حاجه غير فلتر الهواء بس حتى تيل الفرامل لسه مخلصش
بس باختصار عربيه حلوه مريحه من جوه موتور هادي وسحبه حلو جدا مع الاوتماتك ولو جبت الهاي لاين هتتبسط جدا وربنا يوفقك للخير