abs هوندا سيفيك 2008

[bakser]

هوة ال abs بيشتغل على السرعات العالية ولا دة عيب عندى فى الفرامل يعنى مثلا لما اجى امشى 150 واجى ادوس ففرامل بحس بهزة جامدة فى الفرامل زى هزة ال abs دة ايه ؟

[eng_maged]

ده احتمال كبير تكون مشكله في الطنابير والسبب كالاتي:
1- اعوجاج في سطح الطنابير
2- وجود تراب او نتؤات على سطح الطنابير

الحل:
1- تغيير الطنابير
2-سنفره الطنابير وده حل عملي وكويس جدا وبيتعمل في التوكيل كمان

وممكن تسنفر الطنابير مرتان او تلاته وبعدين تغيرها

[Horsepower]

هوة ال abs بيشتغل على السرعات العالية ولا دة عيب عندى فى الفرامل يعنى مثلا لما اجى امشى 150 واجى ادوس ففرامل بحس بهزة جامدة فى الفرامل زى هزة ال abs دة ايه ؟

السلام عليكم،
دي مش abs ،،، دي زي ما قال باشمهندس ماجد مشكلة طنابير وحلها زي ما قال برضه ،،، ومشكلة شائعة في كل السيفيك الجيل الثامن ،،، الفكرة ان ده عيب نوع الطنابير بتاعت السيفيك و حل السنفرة ده مؤقت وهاترجع تاني ولو غيرت لطنابير جديدة برضه هاتظهر لان زي ما باقولك المشكلة في نوع الطنابير نفسها ،،، كنت قرات في منتدي اوروبي (ماعرفش لانهي دولة) ان اصحاب السيفيك الجيل الثامن هناك بيخرطوا طنابير بسبب المشكلة دي.

[eng_maged]

انا عندي نفس المشكله في الهوندا سيتي
وخرطتها قبل كده بس رجعت تاني
اي فرامل قويه فوق ال 150 بتخلي العربيه ترعش

كنت بفكر في حل جذري اني اجيب طنابير مختلفه ومش عارف ايه النظام

[wdramiz]

شئ غريب جدا ان تكون هذه المشكلة الخطيرة موجودة في الهوند
دة انا لسة شاري هوندا سيفيك 2010 وفي التليين
اعمل اية ابيع واشوف حاجة تانية ولا اية ياجماعة

[Horsepower]

شئ غريب جدا ان تكون هذه المشكلة الخطيرة موجودة في الهوند
دة انا لسة شاري هوندا سيفيك 2010 وفي التليين
اعمل اية ابيع واشوف حاجة تانية ولا اية ياجماعة

لا يا باشا تبيع إيه بس ،،، دي مشكلة مش كبيرة وموجودة في معظم العربيات مش هوندا بس ،،، إحنا بنتكلم عن فرملة من سرعة فوق ال 120 كم/س بيحصل معاها إحساس برفة شبه عمل ال abs وماحدش بيحس بيها غير اللي سايق.
على فكرة أنا اشتريت السيفيك وانا عارف الموضوع ده ومجربه كمان.
غير كدة العربية فراملها جيدة جداً وافضل من عربيات ثانية.
وعلى فكرة كمان الموضوع ده لسة فيه كلام لان الرفة اللي بتحصل مع الفرملة من سرعة عالية بتفضل موجودة حتى لما سرعة العربية بتنزل ولحد تقريبا 40 كم/ س وما بتروحش غير لما ترفع رجلك من على الفرامل على الاقل 10 ثواني مع انك لو فرملت من سرعة 90 كم/س مش هاتحس بيها خالص وده اللي أنا مش فاهمه ولا التوكيل قادر يقول سبب مقنع ليه.

[mezo_88]

انا على حد علمى ان دا ال abs لأن نفس الصوت عندى لأنى عارف صوت ال abs كويس غير الصوت الى قصدوكوا عليه

[eng_maged]

التفسير العلمي كالاتي
الفرامل مع سرعات عاليه جدا يساوي احتكاك عالي
يساوي حراره عاليه جدا تسبب ارتخاء في طبيعهة تيل الفرامل بسبب الحراره اللي بتوصل ل 300 درجه مئويه واكثر
ويحصل حاجه من الاتنين
لو التيل كويس والطنابير مستويه تماما ---- يبقى مفيش مشكله
لو التيل مش مستوي او الطنابير فيها خدوش او نتوؤات ----- هتحس بالرعشه

طيب السؤال الرعشه هتروح امتى
لما التيل يبرد وده معناه انك تشيل رجلك من على الفرامل لمده 5 ثواني مثلا وترجع تاني

طيب الحل
اولا تغير تيل الفرامل بدري لان لو سبته لغايه لما يتاكل هيبوظلك الطنابير والمشكله هتزيد
ثانيا لو في مشاكل في الطنابير اخرطها وساعات بيسموها سنفرها عشان تعالجها وبكده تحافظ على التيل
ثالثا متفرملش من سرعه 150 وحتى 10 كيلو مره واحد لان كده الاحتكاك دائم لفتره طويله يعني حراره اكتر لو تقدر ريح الفرامل ثانيتين في النص
رابعا متسوقش فوق ال 120 اصلا وحافظ على عربيتك وعلى نفسك وعلى غيرك (طبعا الكلام ده موجه ليا برضه)

وشكرا

[bakser]

الف شكر ياجماعة هوة فعلا زى ماحضرتكم قولتم دة فعلا الطنابير عاوزة تتخرط لانى وديتة للعفشجى النهاردة وقالى نفس كلام الاستاذ ماجد بالظبط وبعدين ياباشا مينفعشى يبقى معانا سيفيك ومنجريش بيها المشكلة الجديدة اللى ظهرت معايا انا عندى مركب جنط 17 واكلت بية مطب جامد المهم ظهرتلى صوت ونة كدة بعد ال 60 ومش عارف دى منين روحت كشفت على العفشة والزوايا كلو زى الفل والصوت زى ماهوة وهتجنن واعرف دة جاى منين انا بكرة هشوف جهاز الزينون اللى فى الشبورة ممكن يكون ساب يارب يكون هوة

[eng_maged]

صوت الونه ممكين يكون البلي بتاع العجل

[bakser]

بس لو البلى عتقد انو هيظهر على السرعة البطيئة بس هى بتظهر بعد 60

[Horsepower]

ممكن الجنط هو اللي فيه مشكلة ،،، ممكن تلاقي شفته متنية.

[tksy1260]

لا أعتقد أن دي مشكلة في الطنابير لأن فرامل ال abs هي تعمل فقط عند الضغط علي الفرملة أقوى من المعتاد يعني في ظروف قهرية ولابد من التوقف السريع فيصاحبها هذا الصوت وهذه الرعشة البسيطة ولاتوجد أي مشكلة في الفرامل لذلك وده كلام التوكيل